Amudaryo tumanida kuz-qish mavsumida isteʼmolchilarni gaz bilan uzluksiz taʼminlash boʻyicha qanday ishlar amalga oshirildi?

Bugungi kunda turmushimizni tabiiy gazsiz tasavvur qilish qiyin. Yashash xonadonlarimizni isitishdan tortib, kun davomida ovqat, choy tayyorlashdagi ahamiyatini hech narsaga qiyoslab boʻlmaydi. Shu boisdan ham “Hududgaz Qoraqalpogʻiston” filialining “Amudaryotumangaz” gaz taʼminoti boʻlimi tomonidan 2020-2021-yillar kuz-qish mavsumida aholi xonadonlarini tabiiy va suyultirilgan gaz bilan bir maromda va uzluksiz taʼminlash uchun puxta tayyorgarliklar olib borildi. Korxona tomonidan Amudaryo tumani tumanimiz boʻyicha 13 ming 466 xonadon tabiiy gaz bilan taʼminlanib kelinmoqda.

Bugungi kunda foydalanishda 407 kilometr gaz tarmoqlari mavjud boʻlib, shuning 53 kilometri yuqori bosimli, 65 kilometri oʻrta bosimli, 289 kilometri esa past bosimlidir. Mavjud quvurlarning 15,8 kilometr qismi yer ostida, 392 kilometri esa yer ustida joylashgan. Jami foydalanishda 230 gaz taqsimoti punktlari boʻlib, shundan 26 ta gaz taqsimlash punktlari yuqori bosimli, 204 tasi esa oʻrta bosimli hisoblanadi.

Hozirgi kunda tumanimizdagi mavjud jami 39 ming 574 xonadonning 13 ming 466 tasi tabiiy, 26 ming 108 tasi esa suyultirilgan gaz bilan taʼminlanmoqda. 2020-2021 kuz-qish mavsumida isteʼmolchilarni, 205 ta ulgurji isteʼmolchilarni tabiiy gaz bilan uzluksiz taʼminlash maqsadida filialning “Avariya tiklash” xizmati tun-u kun faoliyat yuritmoqda.

Tabiiy gaz taʼminotida uzilishlar boʻlmasligi uchun rejaga muvofiq jami 230 dona gaz taqsimlash qurilmalarining barchasi taftish qilindi. Gaz taqsimlash qurilmalarini mukammal taʼmirlash, gaz quvurlarini bosim ostida zichlikka sinash, yer osti gaz quvurlarining holatini pribor usuli bilan tekshirish rejalari toʻliq va sifatli bajaraldi. Gaz quvurlarini boʻyash ishlari 178 foizga bajarildi.

Shuningdek, Mangʻit shahrining Gurlan koʻchasidagi oʻrta bosimli 1,2 kilometr, Farovon va Olmazor mahallalari hududlaridagi yuqori bosimli 1,6 kilometr, Qipchoq koʻchasidagi oʻrta bosimli 1,2 kilometr gaz tarmoqlari taʼmirlanib boʻyaldi. Shu kungacha 504 xonadonga yangi elektron gaz hisoblagich oʻrnatildi.

Tumanimizning tabiiy gaz yetmasligi tufayli suyultirilgan gazdan foydalanayotgan 12 ming 786 ta va tabiiy gaz tarmogʻi tortilmagan 13 ming 747 ta xonadonlariga suyultirilgan gaz yetkazib berilmoqda. Buning uchun Xolimbeg servis markazi, Kuyuk koʻpir, Qipchoq, Oq oltin, Qangli, Boʻzyop, Doʻrman ovullaridagi shoxobchalar, filial markaziy omborxonasi aholini uzluksiz suyultirilgan gaz bilan taʼminlayotir.

Mazkur shoxobchalarga uzoq boʻlgan hududlar – Toshqalʼa, Yuqori qishloq, Beshovul, Xizr eli, Choykoʻl, Jumurtov, Qoramon, Toʻlqin, Bosuv, Oʻrta qalʼa, Arna boʻyi, Amir Temur nomli, Nazarxon kabi ovul va mahallalar aholisiga esa maxsus avtomashinalarda suyultirilgan gaz ballonlari yetkazilmoqda.

Aholiga shu yilning 13-oktyabr holatiga 2 ming 775 tonna suyultirilgan gaz yetkazildi. Joriy yil uchun belgilangan limit esa 3 ming 748 tonnadir. Hozirgi kunda aholiga jami ijaraga tarqatilayotgan 27 ming 53 dona maishiy gaz ballonlarining 595 tasi joriy yilda yangidan olinib, foydalanishga berilmoqda.

Amalga oshirilgan buningdek, keng koʻlamli ishlar natijasida yaqinlashib kelayotgan kuz-qish mavsumida isteʼmolchilarga uzluksiz tabiiy va suyultirilgan gaz yetkazib berilishi taʼminlanadi.

Oygul Rajabova