“Hormang, fidoyi yoshlar” loyihasi doirasida tadbir boʻlib oʻtdi

17-oktyabr kuni Amudaryo tumanidagi paxta-yigʻim terim ishlariga oʻz hissasini qoʻshayotgan fidoyi yoshlarni ragʻbatlantirish hamda ularga hush kayfiyat ulashish maqsadida “Hormang, fidoyi yoshlar” loyihasi doirasida tadbir boʻlib oʻtdi.

Oq oltin ovulidagi “Yakubova Gavhar” fermer xoʻjaligi paxta dalasida tashkil qilingan tadbirda Oʻzbekiston Respublikasi Oliy Majlisi Senati aʼzosi, Oʻzbekiston Respublikasi Yoshlar ishlari agentligi Qoraqalpogʻiston Respublikasi boshqarmasi boshligʻi Abatboy Daniyarov, Respublikadagi faol yoshlar, yosh volonterlar, shuningdek, tumandagi fidoyi yoshlar otryadi aʼzolari, uyushmagan yoshlar ishtirok etdilar. Tadbir koʻtarinki hamda bayramona ruhda tashkil qilindi. Loyiha doirasida oʻtkazilgan tadbirda Qoraqalpogʻiston Respublikasidagi hamda tumanimizdagi madaniyat boʻlimida faoliyat yuritayotgan estrada xonandalari, soʻz ustalari, oʻzlarining ajoyib kuy-qoʻshiqlari va chiqishlari bilan fayz bagʻishladi.

Shu oʻrinda taʼkidlash joizki, tumanimizdagi mirishkor dehqon va fermerlari tomonidan yetishtirilgan paxta hosilini nes-nobud qilmasdan qisqa muddatlarda yigʻib-terib olishda Oʻzbekiston Yoshlar ishlari agentligi tumani boʻlimi tomonidan tashkil qilingan “Fidoyi yoshlar otryadlari” aʼzolari oʻzlarining munosib hissalarini qoʻshib kelmoqdalar. Vaqtincha band boʻlmagan yoshlarni mavsumiy ishlarga jalb qilish maqsadida tuzilgan “Fidoyi yoshlar otryadlari” aʼzolari soni 825 nafarni tashkil qiladi. Mavsum davomida mazkur otryad aʼzolari kuniga oʻrtacha 100-120 kg paxta terib, yuksak xirmon barpo qilishga koʻmak bermoqdalar. Paxta dalalarida tumanimiz  mirishkor dehqon va fermerlari tomonidan otryad aʼzolari uchun barcha shart-sharoitlar yaratilgan.

Tumanimizning ana shunday mehnatsevar, fidoyi yoshlarining “oq oltin” xirmonini yaratishdagi xizmatlarini munosib ragʻbatlantirish maqsadida oʻtkazilgan tadbirda Oʻzbekiston Respublikasi Oliy Majlisi Senati aʼzosi, Oʻzbekiston Respublikasi Yoshlar ishlari agentligi Qoraqalpogʻiston Respublikasi boshqarmasi boshligʻi Abatboy Daniyarov yurtimizdagi yoshlar siyosatida amalga oshirilayotgan islohotlar xususida nutq soʻzladi. Senat aʼzosi oʻz soʻzida vatanimiz ertasi boʻlgan yosh avlod egalarining jamiyat hayotida oʻz oʻrnini topishlari uchun yaratilayotgan shart-sharoitlar va ulardan oqilona foydalanish, yoshlar bandligini taʼminlash borasida qilinayotgan ishlar, yoshlarimizning ertangi taqdiri har doim davlat eʼtibori markazida ekanligi borasida toʻxtaldi.

Tadbirda estrada yulduzlari, sanʼat ustalari, iqtidorli yoshlar tengdoshlarini oʻz ijod namunalaridan bahramand qildilar. Vatan, doʻstlik va yoshlikni tarannum qiluvchi qoʻshiqlar, kuylar va raqslar paxtakor yoshlarga katta kuch-gʻayrat bagʻishladi.

Aytish joizki, joriy yil erta bahordan Amudaryo tumanidagi 362 ta fermer xoʻjaliklari tomonidan 15 ming 250 gektar maydonga chigit ekildi. Shundan 3 ming 350 gektariga “C 47-27” navli, 8 ming 985 gektar ekni maydoniga “Sulton” navli, 2 ming 915 gektar maydonga yangi navli chigit ekildi. Mehnatsevar paxtakorlarimizning oʻz vaqtida amalga oshirgan agrotexnik tadbirlari natijasida gʻoʻza nihollari bir tekis unib chiqdi. Vegetatsiya davrida barcha agrotexnik tadbirlar sifatli olib borildi. Jumladan, gʻoʻza nihollarini yaganalash, qator oralariga ishlov berish, begona oʻtlardan tozalash, sugʻorish va oziqlantirish, chekanka qilish kabi tadbirlar malakali mutaxassislarning tavsiyalari va dehqonlarimizning koʻp yillik tajribalari asosida tajribali amalga oshirildi.

Yigʻim-terim ishlarini qisqa muddatlarda amalga oshirish maqsadida chora-tadbirlar dasturi  ishlab chiqilib, 290 ta terim otryadlari tashkil qilindi. Ushbu terim otryadlariga tajribali xoʻjalik faollaridan iborat otryad rahbarlari tayinlandi. Terim otryadlariga esa jami  23 ming 266 nafar terimchilar jalb qilindi. Shundan 9283 nafarini fermer xoʻjaligi ishchilari tashkil etgan boʻlsa, qolgan 13 ming 983 nafari uyushmagan aholi boʻlib, ular shartnoma asosida paxta terimida ishtirok etdilar. Terimchilar uchun barcha sharoitlar yaratilib, dala boshida issiq ovqatlar tashkil qilindi. Terim pullarining oʻz vaqtida, dala boshida berib borilgani terimchilarning terimga boʻlgan ishtiyoqlarini yanada oshirib, yigʻim-terim surʼatining koʻtarilishiga xizmat qilmoqda. Shuningdek, aholini majburiy mehnatga jalb qilmaslik boʻyicha nazorat tadbirlari muntazam olib borildi.

Tumanimizda terimchi yoshlarni qoʻllab-quvvatlash maqsadida tashkil qilingan “Xormang, fidoyi yoshlar” loyixasi doirasidagi tadbirda faol terimchi yoshlar Oʻzbekiston Respublikasi Yoshlar ishlari agentligi Qoraqalpogʻiston Respublikasi boshqarmasi tomonidan qimmatbaho esdalik sovgʻalari bilan ragʻbatlantirildi.

Charos Arslonova, tuman hokimligining Axborot xizmati rahbari.