TADBIRKORLIK VA BANDLIK SOHASIDA YaNGI QAROR QABUL QILINDI

Tarixdan maʼlumki, har bir shaxs yaxshi yashashga, yaxshi taʼlim olishga va yaxshi xayot tarzini kechirishga intilib yashaydi. Ammo koʻpchilik ishsizlik, kambagʻalchilik va boshqa sabablarga koʻra bunga erisha olmaydi. Jahon tajribasi shuni koʻrsatadiki, aholini kambagʻallikdan chiqarish va ish bilan taʼminlashda ularni kasbga oʻqitish va shaxsning oʻz tadbirkorlik faoliyatini amalga oshirishga davlat tomonidan koʻmak berilishi eng toʻgʻri yoʻldir.
Aholini tadbirkorlikka jalb qilish tizimini takomillashtirish, kambagʻallikni qisqartirish va tadbirkorlikni rivojlantirish maqsadida Oʻzbekiston Respublikasi Prezidentining 2020-yil 13-oktyabrda PQ-4862-sonli “Aholini tadbirkorlikka jalb qilish tizimini takomillashtirish va tadbirkorlikni rivojlantirishga doir qoʻshimcha chora-tadbirlar toʻgʻrisida”gi Qarori qabul qilindi.
Qarorga muvofiq, 2020-yil 15-noyabrdan yoshlar va xotin-qizlarni kasb-hunar va tadbirkorlik koʻnikmalariga oʻqitishni davlat tomonidan qoʻllab-quvvatlash maqsadida tadbirkorlikni rivojlantirish agentligi, biznes va tadbirkorlik oliy maktabi tomonidan maʼqullangan dasturlar hamda belgilangan talablar asosida tashkil etilgan oʻquv kurslarini tamomlagan har bir bitiruvchi uchun kasb-hunar va tadbirkorlikka oʻqitish boʻyicha nodavlat taʼlim tashkilotlariga sarflangan xarajatlarning 70 foizi, biroq har bir bitiruvchiga 1 million soʻmdan ortiq boʻlmagan miqdorda davlat tomonidan kompensatsiya qilinadi. Eʼtiborlisi, ushbu kurslarni muvaffaqiyatli tamomlab, sertifikat olgan shaxslarga oʻz biznesini tashkil etish uchun mikrokreditlar ajratiladi.
Qarorda belgilab oʻtilganidek, “Mikrokreditbank” ATB tomonidan nodavlat taʼlim tashkilotlari maxsus sertifikatini olgan tadbirkorlik tashabbusiga ega jismoniy shaxslar, shu jumladan, yoshlar va xotin-qizlarga oʻz biznesini tashkil etish uchun 33 million soʻmgacha mikrokreditlar taʼminotsiz ajratiladi.
Shuningdek, mikrofirma va kichik korxona taʼsis etgan shaxslarga uchinchi shaxs kafilligi, sugʻurta polislari, kredit hisobiga sotib olinayotgan mol-mulklar garovi, Tadbirkorlik faoliyatini qoʻllab-quvvatlash davlat jamgʻarmasining kafilligi asosida 225 million soʻmgacha mikrokreditlar ajratiladi.
Mikrokreditlar 3-yil muddatgacha 6 oygacha imtiyozli davr bilan Markaziy bankning asosiy stavkasida ajratiladi.
Qarorga koʻra, Tadbirkorlikni rivojlantirish agentligi aholini tadbirkorlik faoliyatini qoʻllab-quvvatlash, xususan, ularni oʻqitish, mikrokredit ajratish boʻyicha ishlarni muvofiqlashtirish borasida vakolatli davlat organi etib belgilandi.
Bu kabi imtiyozlarning berilishi yoshlar, ayniqsa, xotin-qizlarning ish bilan band boʻlishiga va oʻz tadbirkorlik faoliyatini boshlashiga va rivojlantirishga imkon yaratadi.

J.Bekimbetov, tuman Adliya boʻlimi bosh maslahatchisi.