HUQUQNI MUHOFAZA QILISh ORGANLARI XODIMLARI OʻQUVChI-YoShLAR BILAN UChRAShDI

Tumanimizdagi 16-sonli umumtaʼlim maktabida 9-dekabr – Xalqaro korruptsiyaga  qarshi kurashish kuni munosabati bilan huquqni muhofaza qilish idoralari rahbar xodimlari va oʻquvchi-yoshlar bilan boʻlib oʻtgan uchrashuvda yoshlarga bu haqda batafsil tushunchalar va maʼlumotlar berildi. Sana munosabati  bilan oʻtkazilgan uchrashuv tadbirida tuman prokurori Javlonbek Muftullayev, Jinoyat ishlari boʻyicha tuman sudi raisi Sultonmurod Davletmurodov, IIB boshligʻi oʻrinbosari Nurbek Kamolov, xalq deputatlari tuman Kengashi deputati Oybek Begimovlar ishtirok etishdi.

Uchrashuv tadbirini xalq deputatlari tuman Kengashi deputati O.Begimov ochib, uchrashuv ishtirokchilarini kun tartibida koʻrilayotgan masala bilan tanishtirib oʻtdi va 9-dekabr – Xalqaro korruptsiyaga qarshi kurashish kuni haqida qisqacha maʼlumot berdi.

Shundan soʻng, tuman prokurori Javlonbek Muftullayev 2003-yil 9-dekabr kuni Meksikadagi Merida shahrida Birlashgan Millatlar Tashkiloti tashabbusi bilan Korruptsiyaga qarshi kurash boʻyicha xalqaro konventsiya imzolanganligi, ayni paytga qadar ushbu konventsiyaga 172 davlat qoʻshilgani, 2003-yil BMT Bosh Assambleyasining 53-sessiyasida qabul qilingan rezolyutsiyaga muvofiq, ushbu kun xalqaro Korruptsiyaga qarshi kurashish kuni deb eʼlon qilinganligi va 2004-yildan beri ushbu sana dunyo miqyosida keng nishonlanib kelinayotgani haqida oʻquvchi-yoshlarga batafsil tushunchalar berib oʻtdi.

Shuningdek, Jinoiy ishlar boʻyicha tuman sudi raisi Sultonmurod Davletmurodov Xalqaro Standartlashtirish tashkiloti tomonidan 2016-yilda Korruptsiyaga qarshi boshqaruv tizimi joriy qilingani haqida aytib oʻtdi. Shuningdek “Sudʼyalarning chinakam mustaqilligini taʼminlash hamda sud tizimida korruptsiyaning oldini olish samaradorligini oshirish chora-tadbirlari toʻgʻrisida”gi Prezident Farmoniga koʻra, mamlakatimizda ham korruptsiyaga qarshi kurashish borasida samarali ishlar olib borilayotganini taʼkidladi.

Tuman IIB boshligʻining oʻrinbosari Nurbek Kamolov jinoyatchilik va huquqbuzarliklarning salbiy oqibatlari, ularning oldini olish choralari haqida soʻz yuritib, bu borada tumanimizda amalga oshirilayotgan ishlarga toʻxtaldi.

Oʻz navbatida oʻquvchi-yoshlar oʻzlarini qiziqtirgan savollar bilan murojaat qildilar, takliflarini bildirdilar.

Oʻquvchi-yoshlar tomonidan berilgan savollarga masʼullar batafsil javob berdilar. Shuningdek, yoshlar tomonidan bildirilgan takliflar boʻyicha ham oʻz fikrlarini bayon qildilar.

Uchrashuv yakunida maktab oʻquvchi-yoshlariga kitoblar sovgʻa qilindi. Maktab direktori Ravshanoy Oʻrozboyeva korruptsiyaga qarshi kurashish – jamiyatimizni yanada rivojlantirishga xizmat qilishini taʼkidlab, bu borada oʻquvchi-yoshlarga keng tushunchalar berganliklari uchun uchrashuv mehmonlariga samimiy minnatdorchilik bildirdi.

Boʻlib oʻtgan uchrashuv maktab oʻquvchi-yoshlarida katta taassurotlar qoldirdi. Shu bilan birga, korruptsiyaga qarshi kurashishning ahamiyati haqidagi bilimlarini yanada mustahkamladi.

Robiya YOʻLDOShEVA.