OLIY MAJLIS QONUNChILIK PALATASI DEPUTATLARI SAYLOVChILARI BILAN UChRAShDI

Oʻzbekiston “Milliy tiklanish” demokratik partiyasidan Oʻzbekiston Respublikasi Oliy Majlisi Qonunchilik palatasiga 4-Amudaryo saylov okrugidan saylangan deputat Zumrad Bektova, 1-Nukus saylov okrugidan saylangan deputat Ruslan Jumamurodovlar saylovchilar bilan uchrashib, yuzma-yuz muloqot qilish, hayotidagi muammolarini oʻrganib, turmushi sifatini oshirishga hissa qoʻshish maqsadida tumanimizga tashrif buyurdilar.

Dastlabki uchrashuv 17-dekabr kuni 82-sonli maktabning faollar zalida boʻlib oʻtdi. Uchrashuv yigʻilishini tuman hokimi Sultonboy Yoʻldoshev ochdi va olib bordi. U oʻz soʻzida Oliy Majlis Qonunchilik palatasi Reglamentiga muvofiq 15-20-dekabr kunlari deputatlarning saylovchilar bilan uchrashuv davri qilib belgilanganligini, shunga muvofiq deputatlar Zumrad Bekatova, Ruslan Jumamurodovlar ham oʻz saylovchilari bilan uchrashish, Qonunchilik palatasining qonun ijodkorligi va nazorat faoliyati, siyosiy partiyalar fraktsiyalarining  faoliyati, saylovoldi dasturlarida koʻtarilgan masalalarning bajarilish holati yuzasidan aholini xabardor qilish uchun tumanimizga tashrif buyurganini maʼlum qildi.

Uchrashuv yigʻilishida Oliy Majlis Qonunchilik palatasi deputatlari soʻzga chiqib, quyi palataning joriy yildagi faoliyati, mamlakatni ijtimoiy-iqtisodiy jihatdan yanada rivojlantirish, fuqarolar huquq va erkinliklari hamda qonuniy manfaatlarining mustahkam kafolatini taʼminlash borasida amalga oshirilayotgan ishlari xususida batafsil maʼruza qildilar.

Ommaviy uchrashuvdan soʻng, deputatlar Zumrad Bekatova, Ruslan Jumamurodovlar saylovchilar bilan yakka qabul ham oʻtkazib, murojaatlarini tingladilar.

Shunisi eʼtiborliki, uchrashuv yigʻilishida  bildirilgan murojaatlarning ayrimlari joyida hal etildi, ayrimlari tegishli korxona-tashkilotlarga koʻrib chiqish va hal etish yuborilib, ijrosi nazoratga olindi.

Shu kuni Oliy Majlis Qonunchilik palatasiga 4-Amudaryo saylov okrugidan saylangan deputat Zumrad Bekatova Qilichboy ovulidagi saylovchilari bilan ham uchrashdi. Uchrashuv Qilichboy Madaniyat markazida boʻlib oʻtdi va uni tuman Mahalla va oilani qoʻllab-quvvatlash boʻlimi boshligʻi Alisher Yoʻldoshev ochdi va olib bordi.

Deputat Zumrad Bekatova Oliy Majlis Qonunchilik palatasining faoliyati haqida qisqacha toʻxtalib oʻtdi. Xususan, Qonunchilik palatasi pandemiya sharoitida ham fuqarolarning huquq va erkinliklarini taʼminlash va himoya qilishni yaxshilashga qaratilgan qonunlarni qabul qilishni davom ettirdi. Shunday qonunlarning ichida “propiska” masalasiga taalluqli qonun alohida ahamiyat kasb etadi. Bu qonun qabul qilinishi munosabati bilan fuqarolarining poytaxt mintaqasida doimiy roʻyxatga olish tartib-taomillari liberallashtirildi hamda ularning erkin koʻchib yurish huquqlari kafolatlari oshirildi. Er-xotinga ular nikohdan oʻtgan kunning oʻzida yashash joyi boʻyicha doimiy roʻyxatga qoʻyish huquqi berildi, “propiska” soʻzining oʻrniga “roʻyxatga olish” soʻzi amaliyotga kiritildi.

Sud-huquq tizimini yanada isloh etish ishlari davom ettirilib, protsessual kodekslarga oʻzgartirish va qoʻshimchalar kiritildi. Bu oʻzgarishlar jamiyatning odil sudlovga boʻlgan ishonchini mustahkamlash, shuningdek, xalqaro standartlar normalarini milliy qonunchilikka joriy qilishga qaratilganligi taʼkidlandi. Saylovchilar deputatlarga Amudaryo tumaniga ham ekologik koeffitsent qoʻshish lozimligi, ayollarning pensiyaga chiqish yoshini qisqartirish, maktablarda rus tilini oʻqitishga eʼtiborni kuchaytirish boʻyicha takliflar bildirdilar.

Uchrashuv yigʻilishida deputatga yoʻllarni taʼmirlash, internet aloqasini yaxshilash, elektr energiyasi taʼminotini yaxshilash yuzasidan murojaatlar qilindi.

Uchrashuv jonli muloqot va samimiy ruhda  oʻtdi.

O.RAJABOVA.