“SEKTOR RAHBARLARI VA YoShLAR” UChRAShUVI TAShKIL ETILDI

Amudaryo tumanining Olmazor mahallasidagi 82-sonli umumtaʼlim maktabida tuman hokimi Sultonboy Yoʻldashev rahbarligida Sektor rahbarlari va yoshlar uchrashuvi boʻlib oʻtdi.

Uchrashuvda tuman Ichki ishlar boʻlimi boshligʻi Ulugʻbek Xudayberganov, tuman Davlat soliq inspektsiyasi boshligʻi Aydos Seitov, tuman hokimi oʻrinbosari Mahmud Shermetov, tumandagi idora va tashkilot rahbarlari hamda faol yoshlar ishtirok etdilar.

Uchrashuv yigʻilishida Oʻzbekiston Respublikasi Prezidenti Shavkat Mirziyoyev tomonidan 2019-yil 27-dekabr kuni Muhammad Al-Xorazmiy nomidagi ixtisoslashtirilgan maktabda oʻtkazilgan uchrashuvda berilgan topshiriqlar ijrosini taʼminlash maqsadida tumanimiz yoshlari bandligini taʼminlash, muammolarini oʻrganish fikr va takliflarini tinglash, ularni qoʻllab-quvvatlash, munosib shart-sharoitlar yaratish boʻyicha oshkora va samimiy muloqot muhiti yaratildi.

Yigʻilishni tuman hokimi, 1-sektor rahbari Sultonboy Yoʻldashev  ochdi va oʻz nutqida mamlakatimizda yoshlarning yuksak marralarni egallashlari uchun yaratilayotgan shart-sharoitlar, cheksiz imkoniyatlar haqida toʻxtalib, yoshlarni oʻqib, bilim olishga, shijoat bilan olgʻa intilishga hamda Vatan xizmatiga yaraydigan munosib farzand boʻlishga davʼat qildi. Har bir yoshni “Erishgan yutuqlarimiz oʻzimizniki, biz xato va kamchiliklarni oʻrganib, ularni bartaraf qilishga harakat qilmogʻimiz kerak!” – degan ezgu  fikr bilan yashashga chaqirdi. Shuningdek, bilimga chanqoq, izlanuvchan tumanimiz yoshlari haqida oʻzining samimiy fikr-mulohazlarini bildirdi.

Shundan soʻng, tuman Davlat soliq inspetsiyasi boshligʻi Aydos Seitov hozirgi kunda tumanimizda yoshlar, maktab, kollej va oliy taʼlim muassasalari bitiruvchilari bilishi lozim boʻlgan soliq turlari xususida, shuningdek, ishlab chiqarish va  xizmat koʻrsatish sohasida yosh tadbirkorlar safini oshirish, yangi ish oʻrinlarini yaratish yuzasidan oʻz fikrlarini bildirdi.

Tuman Ichki ishlar boʻlimi boshligʻi Ulugʻbek Xudoyberganov tumanimiz yoshlari, maktab, kollej va oliy taʼlim muassasalari bitiruvchilari oʻrtasida amalga oshirilayotgan jinoyatchilikka qarshi kurashish chora-tadbirlari, yoshlar oʻrtasida huquqbuzarliklarning oldini olish maqsadida tashkil qilinayotgan uchrashuvlarning ahamiyati, yoshlarning  boʻsh vaqtlarini mazmunli oʻtkazishga qaratilgan tadbirlarning samarasi haqida hayotiy misollar orqali toʻxtalib oʻtdi.

Shundan soʻng, sektor rahbarlari yigʻilish ishtirokchilari yoshlarning muammolari va takliflarini tingladilar. Oshkora muloqot va samimiyat rahida oʻtgan uchrashuvda Bobur nomli ovul fuqarolar yigʻinida yashovchi fuqarolar Berkbay Begjanov, Ozoda Indirova, Maftuna Yangiboyeva, Surayyo Toʻliboyeva, Malohat Davletboyevalarning oʻz mutaxassisliklari boʻyicha ishga joylashish toʻgʻrisidagi murojaatlari, Toʻlqin ovul fuqarolar yigʻinida yashovchi Akbar Boltaboyev, Jaxongir Boltaboyev, Nigora Bekchanovalarning  oʻz taʼdbirkorlik faoliyatini yoʻlga qoʻyish maqsadida imtiyozli kredit olishda amaliy yordam berishni soʻrab qilgan murojaatlari, Beshtom mahallasida yashovchi fuqaro Safiya Nazarimbetovaning tadbirkorlikni yoʻlga qoʻyish maqsadida tikuv mashinasi olishda amaliy yordam soʻrab qilgan murojaati tinglandi.

Bundan tashqari, Oq oltin ovulida yashovchi Akbar Rajapov subsidiya asosida isiqxona qurib berishda, Boʻz yop ovulida yashovchi fuqaro Valibek Aminov ovul hududiga zamonaviy sport maydonchasini tashkil qilishda amaliy yordam soʻrab qilgan murojaatlari, Chordara mahallasida yashovchi fuqaro Dinora Kamolovaning tuman madaniyat markazida cholgʻu asboblarini koʻpaytirish hamda shuning evaziga toʻgarak mashgʻulotlarini tashkil qilish boʻyicha taklifi ham masʼullar tomonidan tinglanib, roʻyxatga olindi.

Uchrashuvi kun tartibida koʻrilgan yuqoridagi masalalarni belgilangan muddatda va sifatli amalga oshirish yuzasidan tegishli qarorlar qabul qilindi.

Robiya YOʻLDOShEVA.