“YoShLAR FESTIVALI” DOIRASIDA OʻTKAZILGAN TADBIRLAR IShTIROKChILARDA OʻChMAS TAASSUROTLAR QOLDIRDI

Ayni kunlarda mamlakatimizning barcha hududlarida turli koʻngilochar tadbirlar, taʼlim  va sportga oid bellashuvlar, badiiy  koʻrgazmalar, muvaffaqiyatga erishayotgan tadbirkorlar bilan uchrashuvlarni oʻz ichiga qamrab olgan “Yoshlar festivali” davom etmoqda.

Yoshlar maʼnaviyatini yuksaltirish borasida Muhtaram Prezidentimiz belgilab bergan 5 muhim tashabbus ijrosini taʼminlash yoshlarning boʻsh vaqtlarini mazmunli oʻtkazishlariga sharoit yaratish, sanʼatga, sportga keng jalb qilish kompyuter savodxonligini oshirish, kasb-hunar egallab, hayotda oʻz oʻrinlarini topishlariga  koʻmaklashish maqsadida oʻtkazilayotgan festival doirasidagi tadbirlarda yoshlar faol ishtirok etmoqdalar.

Festival doirasida Yoshlar ishlari agentligi tuman boʻlimi tashabbusi bilan Mangʻit shahridagi 82-sonli maktabda ham qator tadbirlar oʻtkazildi. Dastlab, yoshlarni ish bilan taʼminlash, tadbirkorlik faoliyatiga jalb qilish va qoʻllab-quvvatlash maqsadida boʻsh ish oʻrinlari yarmarkasi oʻtkazildi. Tuman Aholi bandligiga koʻmaklashish markazi bilan hamkorlikda oʻtkazilgan yarmarkada 54 ta korxona-tashkilotlar jami 170 dan ortiq boʻsh ish oʻrinlari bilan qatnashdi, 12 nafar yoshlar oʻzlari tanlagan boʻsh ish oʻrinlariga joylashdilar.

Boʻsh ish oʻrinlari yarmarkasidan soʻng maktab faollar zalida yoshlar bilan samarali muloqot qilish, ularning taklif-istaklarini oʻrganish va  birgalikda hal etish maqsadida “Sektor rahbarlari va yoshlar” uchrashuvi tashkil etildi.
Sektor rahbarlari va yoshlar uchrashuvidan soʻng tumanimizda faoliyat yuritayotgan 92-02 “K” harbiy qismi harbiy xizmatchilarining yoshlar bilan uchrashuvi boʻlib oʻtdi.

Harbiy xizmatchilar yoshlarga mamlakatimiz chegaralari daxlsizligini saqlash, muddatli harbiy xizmat burchini ado etish har bir yigitning oliy vazifasi ekanligi xususida, mudofaa tizimida amalga oshirilayotgan islohotlar xususida qiziqarli bayon qilib berdilar. Ishtirokchi yoshlar harbiy xizmatchilarga muddatli harbiy xizmat, muddatli xizmat burchini oʻtagan yigitlarga ishga joylashish, oliygohlarga oʻqishga kirishda yaratilgan imtiyozlar toʻgʻrisida oʻzlarini qiziqtirgan savollarini berib, javoblar oldilar.

Suhbat tugagach, harbiy yigitlar va tumanimizning sportsevar yigitlari oʻrtasida mini futbol musobaqasi oʻtkazildi. Chordara mahallasida joylashgan sunʼiy qoplamali minni futbol maydonchasida boʻlib oʻtgan minni futbol musobaqasini tomosha qiluvchilar, jamoalarni qoʻllab-quvvatlovchilar koʻp boʻldi.

Gʻoliblar Yoshlar ishlari agentligi tuman boʻlimi tomonidan ragʻbatlantirildi. Eng muhimi, muddatli harbiy xizmat burchini oʻtayotgan yigitlar va tumanimizning sportsevar yoshlari musobaqa tufayli yaqindan tanishdilar. Oʻrtalarida iliq doʻstona munosabat shakllandi. Natijada musobaqa davomida oʻyin qoidalariga toʻla amal qilindi va bir-birlarining oʻyindagi mahoratlariga gʻoliblik uchun sidqidildan intilishlariga tan berdilar.

“Yoshlar festivali” doirasidagi oʻtkazilgan tadbirlarning barchasi ishtirokchilarda unutilmas taassurotlar qoldirdi, ezgu maqsadlar sari intilishga ragʻbatlantirdi.

Oygul RAJABOVA.