“Agrobank” boshqaruvi raisining birinchi oʻrinbosari Amudaryo tumanida ehtiyojmand oilalarga sovgʻalar topshirdi

Yangi yil bayrami arafasida Oʻzbekiston Respublikasi Agrobank boshqaruvi raisining birinchi oʻrinbosari Shuhrat Rasulov tumanimizda boʻlib, “Temir daftar”ga kiritilgan oilalarning iqtsodiy ahvoli va tumanda kambagʻallikni  qisqartirish yuzasidan amalga oshirilayotgan ishlar bilan tanishdi. Shu bilan birga kam taʼminlangan, ehtiyojmand oilalarga kirib borib, ularning muammolarini  oʻrgandi hamda Yangi yil sovgʻalarini topshirdi.

Tumanimiz nafaqat Qoraqalpogʻiston Respublikasi balki mamlakatimizdagi aholisi va yer maydoni jihatidan katta tumanlardan biri hisoblanadi. Ayni paytda tumanimizda 200 ming nafardan ziyod aholi istiqomat qiladi. Tumanda “Temir daftar”ga kiritilgan oilalar soni dastavval 2467 tani tashkil etgan. Ushbu oilalarning iqtisodini koʻtarish, kambagʻallikdan chiqarish maqsadida masʼullar tomonidan amalga oshirilgan samarali ishlar tufayli, bugungi kunda “Temir daftar”dagi 2361 ta oilada istiqomat qiluvchi 4204 nafar kishi ish bilan taʼminlangan va bu oilalarga koʻrsatilgan ijtimoiy yordamlar natijasida ushbu 2361 ta oilaning yashash sharoitlari yaxshilanib, “Temir daftar” roʻyxatidan chiqarilgan.

“Temir daftar” – bu oilalarni kambagʻallikdan chiqarishga qaratilgan dastur hisoblanadi. Ushbu dasturga koʻra, tumanimizda ham ijtimoiy ahvoli hamda turmush sharoiti ogʻir boʻlgan, sektor rahbarlari tomonidan alohida nazoratga olingan oilalar kiritilgan edi. Koronavirus pandemiyasi sharoitida ijtimoiy ahvoli va turmush sharoiti ogʻirlashgan oilalarning bandligini taʼminlash orqali ularga daromad manbai yaratishning vaqtinchalik tartibiga asosan, tumanimizdagi “Temir daftar”ga kiritilgan ehtiyojmand oilalar aʼzolariga ish topib berish hamda ularning doimiy daromadga ega boʻlishlariga koʻmaklashildi.

Hozirgi paytda tumanimizda “Temir daftar” roʻyxatida 106 ta oila mavjud boʻlib, ushbu oilalar aʼzolarining bandligini taʼminlash maqsadida Agrobank tomonidan tizimli ishlar yoʻlga qoʻyilgan. Xususan, yakunlanayotgan 2020-yil davomida Agrobank tomonidan tumandagi ehtiyojmand oilalarga 200 mln. soʻmlik homiylik yordamlari koʻrsatildi. Ayrim xonadonlarga 71,2 mln. soʻm mablagʻ evaziga echkilar olib berilib, chorva boqishga yoʻnaltirildi. Shuningdek, kam taʼminlangan oilalarga 9,7 mln. soʻmlik koʻmir mahsulotlari ham yetkazib berildi.

Tumanimizda “Ayollar daftari” roʻyxatiga kiritilgan 98,6 ming nafar ayol-qizlarning 663 nafari ishsiz boʻlib, ulardan 9 nafari oliy maʼlumotli mutaxassislar, 195 nafari oʻrta maxsus va 459 nafari oʻrta maʼlumotga ega ayollardir. “Yoshlar daftari”ga roʻyxatga olingan 18-30 yosh oraligʻidagi 44 ming 340 nafar yoshlardan 5 ming 196  nafari ish bilan taʼminlanmagan. Ushbu muammolarni bartaraf etish, tumanda kambagʻallikni qisqartirish, ayniqsa, yoshlarning doimiy ish bilan bandligini taʼminlash maqsadida  tumanda “Yoshlar va bogʻdorchilik” oʻquv markazi binosini yangidan barpo etish uchun “Agrobank” tomonidan 1,2 mlrd. soʻmlik homiylik mablagʻlari ajratildi.

Ayni kunlarda butun mamlakatimizda, shu jumladan, tumanimizda ham yangi yil bayram shukuhi kezmoqda. Xalqimizni ushbu qutlugʻ kunlarda toʻkis va baxtiyor koʻrish barchamizga quvonch bagʻishlaydi. “Temir daftar”, “Ayollar daftari” “Yoshlar daftari” roʻyxatiga kiritilgan oilalar aʼzolariga quvonchli kayfiyat ulashish maqsadida Agrobank tomonidan yana bir ezgu ish amalga oshirildi. Yuqoridagi daftarlar roʻyxatidagi oilalarni ijtimoiy qoʻllab-quvvatlash maqsadida 111,5 mln. soʻmlik moddiy yordam ajratildi. “Temir daftar” roʻyxatidagi 106 ta  oilalarga esa Yangi yil sovgʻasi sifatida kundalik zarur oziq-ovqat mahsulotlari tarqatilmoqda.

Robiya YOʻLDOShEVA.