KORRUPTsIYaGA QARShI KURAShIShGA HISSA QOʻShGANLAR DAVLAT MUKOFOTIGA TAVSIYa ETILADI

Oʻzbekiston Respublikasi Vazirlar Mahkamasining 2020-yil 31-dekabr kungi 829-sonli qarori bilan “Korruptsiyaga oid huquqbuzarlik haqida xabar bergan yoki korruptsiyaga qarshi kurashishga boshqa tarzda koʻmaklashgan shaxslarni ragʻbatlantirish tartibi toʻgʻrisida”gi Nizom tasdiqlandi. Nizomga koʻra, korruptsiyaga oid huquqbuzarlik haqida xabar bergan shaxslar bir martalik pul mukofoti bilan ragʻbatlantiriladi.

Jumladan, oʻzlariga nisbatan pora talab qilgan shaxs yoki oʻzlariga maʼlum boʻlgan korruptsiyaga oid huquqbuzarlik haqida korruptsiyaga qarshi kurashuvchi organlar, yaʼni Bosh prokuratura, Davlat xavfsizlik xizmati, Ichki ishlar vazirligi, Bosh prokuratura huzuridagi Iqtisodiy jinoyatlarga qarshi kurashish departamentiga bergan xabari asosida bunday huquqbuzarlik fosh etilsa ushbu holat ragʻbatlantirishga munosib deb topiladi. Shuningdek, korruptsiyaga oid jinoyatni sodir etganligi uchun qidiruvda boʻlgan shaxs toʻgʻrisida huquqni muhofaza qiluvchi organlarga berilgan xabar asosida qidiruvdagi shaxs ushlansa bunday xabarni yetkazgan shaxs ham ragʻbatlantiriladi. Lekin Nizomga koʻra, huquqni muhofaza qiluvchi organlarning xodimlari bundan mustasno.

Shunga koʻra, korruptsiyaga oid huquqbuzarlik haqida xabar bergan yoki korruptsiyaga qarshi kurashishga boshqa tarzda koʻmaklashgan shaxslar tegishlicha BHMning 3 baravaridan 25 baravarigacha, yaʼni 669 ming soʻmdan 5 mln. 575 ming soʻmgacha miqdorda bir martalik pul mukofoti bilan ragʻbatlantirilishi mumkin.

Agar pora summasi yoki yetkazilgan zarar yoxud oʻzlashtirilayotgan, oʻzlashtirilgan mulkning qiymati BHMning yuz baravaridan koʻp boʻlsa, mukofot quyidagi foiz hisobida hisoblanadi:
- ancha miqdor uchun – mulk qiymatining 15 foizi miqdorida;
- koʻp va juda koʻp miqdor uchun – mulk qiymatining 10 foizi miqdorida.

Shaxs korruptsiyaga qarshi kurashishga munosib hissa qoʻshganligi uchun davlat mukofotiga ham tavsiya etilishi mumkin. Bunday holat uchun shaxslarni ragʻbatlantirish masalalari korruptsiyaga qarshi kurashuvchi organlar huzurida tuziladigan maxsus komissiyalar tomonidan koʻrib chiqiladi.

Maxsus komissiya qarori asosida bir martalik pul mukofoti yoki esdalik sovgʻasi bilan taqdirlash haqida qaror 1 ish kunida chiqariladi. Shuningdek, pul mukofoti xarajatlar smetasiga oʻzgartirish kiritilgandan soʻng 15 ish kuni ichida shaxslarning shaxsiy hisobvaragʻiga oʻtkazib beriladi.

N.Jumaniyozova, Amudaryo tumani “Madad” HMB maslahatchisi.