QUTURISh VA BOTULIZM KASALLIGINING OLDINI OLISh BOʻYIChA SEMINAR OʻTKAZILDI

Kundalik turmushda insonlar hayotiga nafaqat yongʻin, suv toshqini, is gazidan zaharlanish va boshqa turdagi favqulodda hodisalar, balki kasalliklar ham tahdid solishi mumkin. Ehtiyotsizlik tufayli kutilmaganda salomatlikka ziyon yetkazadigan ana shunday quturish va botulizm kasalliklari qanchadan-qancha odamlarning umri qisqarishiga sabab boʻlib kelayotganligi barchaga maʼlum. Ushbu kasalliklar toʻgʻrisida batafsil maʼlumot berib borish, aholi oʻrtasida tushuntirish-targʻibot tadbirlarini muntazam ravishda oʻtkazib borish undan zarar koʻrishning oldini olishda muhim ahamiyatga ega hisoblanadi.

Shu maqsadda Amudaryo tumanidagi 40-sonli umumtaʼlim maktabida tuman Favqulodda vaziyatlar boʻlimi va Xalq taʼlimi boʻlimi xodimlari tomonidan favqulodda sodir boʻladigan hodisalarda xavfdan saqlanish, xavfsizlik qoidalariga amal qilish boʻyicha oʻquvchi-yoshlarda tushuncha, koʻnikma hosil qilish maqsadida seminar tashkil etildi. Seminarda oʻquvchilar bilan birga maktab direktorlari va oʻrinbosarlari, oʻqituvchilar, maktabning texnik xodimlari ham ishtirok etdilar.

Ushbu seminarda maktab binolari va aholi uylarida har xil favqulodda vaziyatlar, yaʼni is gazidan zaharlanish, yongʻin, quturish, botulizm kasalliklarining oldini olish choralari haqida batafsil maʼlumot berildi.

Tadbir davomida mahalla, ovul fuqaro yigʻinlari tomonidan it saqlovchi fuqarolar toʻgʻrisidagi maʼlumotlarni oʻz vaqtida veterinariya idoralariga taqdim etish, bu boʻyicha suhbatlar tashkil qilish va profilaktik targʻibot ishlarini kuchaytirish quturish kasalligining oldini olishda muhim ahamiyatga egaligi aytib oʻtildi. Botulizm kasalligi keltirib chiqaradigan ommaviy zaharlanishning oldini olish uchun ham uy sharoitida konserva mahsulotlarini tayyorlamaslik, zararlangan meva-sabzavotlarni ishlatmaslik kerakligi targʻib qilinishi lozimligi toʻgʻrisida soʻz yuritildi.

Seminarda maktab direktorining xoʻjalik ishlari boʻyicha oʻrinbosarlariga qorovullar va issiqlik taʼminoti boʻyicha ishchilar xizmat vazifalarini tartibga koʻra bajarishlari, tasdiqlangan roʻyxat asosida oʻz vaqtida xizmat joylarida boʻlishlari va sergak xizmat olib borishlarini muntazam ravishda nazorat qilish kerakligi, bu xavfli hodisalarning oldini olishda muhim ahamiyat kasb etishi tushuntirildi. Birlamchi yongʻin oʻchirgichlaridan toʻgʻri foydalanishni bilish, yongʻin oʻchirish qalqonidagi asboblardan boshqa maqsadlarda foydalanmaslik kerakligi taʼkidlab oʻtildi. Evakuatsiya chiqish chizmalari koʻrinarli joyda turishi, oʻquvchilar bundan xabardor boʻlishlari kerakligi va chiqish eshiklari har xil vositalar bilan toʻsmaslik, zinalar va yertoʻlalarda tez alangalanuvchi mahsulotlarni qoʻymaslik lozimligi aytib oʻtildi.

Tuman Favqulodda vaziyatlar boʻlimi xodimlari yongʻindan xabar berish moslamalari doimo tayyor holatda saqlanishi, isitish pechlarining oʻz vaqtida yoqilishi nazorat qilinishi, qozonxonalarga oʻrnatilgan nasoslarni ishlatishda xavfsizlik qoidalariga doim eʼtiborli boʻlish kerakligini tushuntirdilar. Shuningdek, tuman Xalq taʼlimi boʻlimi masʼullari maktabda qattiq yoqilgʻi mahsulotlari saqlanish holati va isitish tizimi qanday ishlatilayotganligini koʻzdan kechirib, kommunal tizim boʻyicha muammoli masalalarni oʻz vaqtida bartaraf qilishni topshirdilar.

Oʻtkazilgan tadbir yakunida maktab oʻqituvchi va oʻquvchilari tomonidan yoʻllangan savollarga atroflicha javob berildi. Oʻquvchilar quturish va botulizm kasalligi bilan kurashish nafaqat veterinariya, tibbiyot va boshqa tegishli tashkilotlarning ishi, balki keng jamoatchilik, qolaversa har bir fuqaroning ham burchi ekanligi toʻgʻrisida keng tushunchalarga ega boʻldilar.

B.Tajiboyev, Amudaryo tumani FVB FVDT va FM FTE, XTB boshligʻi.