Nosoz yoʻl taʼmirlandi

Tumanimizda faoliyat yuritayotgan 3-sektor rahbari, tuman Ichki ishlar boʻlimi boshligʻi Ulugʻbek Xudoyberganovga va Oʻzbekiston Respublikasi Prezidentining tumanimizdagi Xalq qabulxonasi mudiri Erkin Rajabovga Mangʻit shahrining Boyovul mahallasi fuqarolari shaharning Samarqand va Madaniyat koʻchalarini bogʻlovchi Tadbirkorlar koʻchasining 600 metr uzunlikdagi qismi juda taʼmirtalab ahvolda ekanligi yuzasidan murojaat kelib tushgan edi.

Murojaatni ijobiy hal qilish yuzasidan 3-sektor tomonidan tezkor chora-tadbirlar belgilanib, muammo bartaraf etildi, yaʼni 600 metrlik yoʻl joriy taʼmirlandi. Yoʻlovchilarga, avtotransport vositalari haydovchilariga noqulaylik tugʻdirib kelgan taʼmirtalab, oʻydim-chuqur yoʻlga va shu yoʻl boʻyida joylashgan “Yusuf eshon bobo” jomʼe masjidi roʻparasidagi avtoturargohga 140 kubmetr shagʻal, 60 kub metr tosh qumi yotqizildi va kamchilik bartaraf etildi.

Amalga oshirilgan ishlarga tuman Obodonlashtirish boshqarmasidan 20 nafar ishchilar, 3 ta maxsus texnikalar, tuman yoʻllardan foydalanish unitar korxonasidan 10 nafar ishchilar va 2 ta maxsus texnikalari ham 2 ta yuk tashuvchi transport vositalari jalb qilindi va xayrli ish bir kunning oʻzida poyoniga yetkazildi.

Odamlarning turmushi sifatini oshirish, ularni oʻz hayotlaridan rozi boʻlib yashashlarini taʼminlashda sektorlar faoliyati muhim ahamiyat kasb etmoqda. Ular ayol-qizlar, yoshlar bandligini taʼminlab, daromad topishlariga imkoniyat yaratish, oilasida boʻlib ham daromad manbalarini yaratishlariga ulkan eʼtibor qaratilmoqda. Buningdek xayrli ishlar davom etaveradi.

Oygul RAJABOVA.