IShChI GURUH TOMONIDAN MUHTOJ AYoLLARGA HUQUQIY YoRDAM KOʻRSATILDI

Joriy yilning 26-fevral kunida Prezidentimiz raisligida “Xotin-qizlarning muammolarini hal qilish va ijtimoiy qoʻllab-quvvatlash” masalalari yuzasidan oʻtkazilgan videoselektor yigʻilishida prokuratura organlariga huquqiy yordam olishga muhtoj va zoʻravonlikka uchragan xotin-qizlarga huquqiy yordam koʻrsatish choralarini koʻrib borish topshirilgan edi. Shu munosabat bilan Qoraqalpogʻiston Respublikasi prokurorining tegishli farmoyishi qabul qilindi.

Farmoyishga asosan prokuratura organlarining tezkor xodimlaridan, yaʼni ayol-qizlardan iborat ishchi guruhlar tuzildi. Ishchi guruhga huquqiy yordamga muhtoj, zoʻravonlikka uchragan xotin-qizlarga huquqiy yordam koʻrsatish va boshqa masalalarda ham koʻmak berish kabi vazifalar topshirildi. Ayni paytda ishchi guruh tomonidan hududlarga chiqqan holda ushbu vazifalar ijrosini taʼminlash maqsadida ayol-qizlar bilan uchrashuvlar oʻtkazilmoqda.

Shu yil 11-mart kuni Respublika prokurorining jamoatchilik bilan aloqalar va huquqiy axborot boʻyicha katta yordamchisi G.Bekniyazova rahbarligidagi mazkur ishchi guruh aʼzolari tumanimizga ham tashrif buyurib, Mahalla va oilani qoʻllab-quvvatlash boʻlimi binosida tegishli masʼullar va ayol-qizlar bilan uchrashuv tashkil etishdi. Ishchi guruh tomonidan Farmon ijrosining Amudaryo tumanidagi ijro etilish holatini oʻrganildi.

Oʻrganish mobaynida tumanda xotin-qizlarning muammolarini oʻz vaqtida aniqlash, ijtimoiy himoyaga muhtoj, nogironligi boʻlgan ayollarga manzilli yordam koʻrsatish, xotin-qizlarning maʼlum bir toifasi bilan yakka tartibda ishlash kabi masalalar masʼullar ishtirokida atroflicha tahlil qilindi. Shuningdek, ayol-qizlarning davlat va jamiyat ishlarini boshqarishdagi ishtirokini kengaytirish, mahallalarda ogʻir ijtimoiy vaziyatga tushib qolgan, turmush sharoiti ogʻir xotin-qizlarning huquq va manfaatlarini taʼminlash borasida olib borilayotgan ishlar holati bilan ham tanishildi.

Shundan soʻng, ishchi guruh rahbari, Respublika prokurorining jamoatchilik bilan aloqalar va huquqiy axborot boʻyicha katta yordamchisi G.Bekniyazova ayol-qizlar bilan ochiq muloqot tarzida suhbat oʻtkazdi. Suhbat chogʻida dastlab xotin-qizlarning ijtimoiy-siyosiy faolligini oshirish, tadbirkorligini qoʻllab-quvvatlash, bilim va kasbiy koʻnikmalar egallab munosib ish topishlariga koʻmaklashish, salomatligini saqlash, uy-joy masalalarini hal etish borasida tizimli ishlar olib borilayotgani haqida soʻz yuritdi. “Ayollar daftari”ga kiritilgan xotin-qizlar muammolarini hal qilish, tikuvchilik, hunarmandchilik, kasanachilik, parrandachilik va ekin maydonlaridan yer ajratish orqali ularning bandligini taʼminlash, kasbga oʻqitish choralari koʻrilayotganini taʼkidladi.

Undan tashqari, tadbirkor boʻlish istagini bildirgan “Ayollar daftari”dagi ayol-qizlar biznes va mehnat bozorida talab yuqori boʻlgan kasblarga oʻqitish yoʻlga qoʻyilayotganini, tadbirkorlikni yoʻlga qoʻyishlari uchun tijorat banklari tomonidan kredit mablagʻlari yoʻnaltirilayotganini maʼlum qildi. Bu borada ayol-qizlarni qiziqtirgan savollarga batafsil javoblar berib, yoʻl-yoʻriq koʻrsatib oʻtdi.

Tadbir davomida tumandagi “Ayollar daftari”ga kiritilgan jami 12 nafar huquqiy yordam olishga muhtoj va zoʻravonlikka uchragan xotin-qizlarning muammolari oʻrganildi. Oʻrganish davomida aniqlangan muammolarga joyida yechim topilib, ijobiy hal qilinishi taʼminlandi.

Ozoda Xudoyberganova.