QORAQALPOGʻISTON RESPUBLIKASI VAZIRLAR KENGAShI RAISI YoShLAR BILAN UChRAShDI

29-mart kuni Amudaryo tumanida Vazirlar Kengashi raisi hamda vazirlarning yoshlar bilan uchrashuvi oʻtkazildi.

Ochiq muloqot tarzida oʻtkazilgan uchrashuvda Vazirlar Kengashi raisi Qahramon Sariyev, Yoshlar ishlari agentligi Qoraqalpogʻiston Respublikasi boshqarmasi boshligʻi Abat Daniyarov, Oʻzbekiston Respublikasi Qishloq xoʻjaligi vaziri oʻrinbosari Alisher Toʻrayev, Oʻzbekiston Respublikasi Markaziy banki raisi oʻrinbosari Ayyubxon Kamalov, Davlat Statistika qoʻmitasi raisi oʻrinbosari Mahmudjon Ziyadullayevlar ishtirok etib, yoshlar bilan ularning qiziqishlari, muammolari, taklif va istaklari haqida suhbatlashdilar.

Respublika miqyosida tashkil etilgan ushbu uchrashuvda turli tumanlardan kelgan  110 nafar yoshlar bilan birga turli tashkilot va muassasalarning masʼul rahbarlari ham qatnashishdi.

Uchrashuv munosabati bilan oʻtkazilgan yigʻilishni Yoshlar ishlari agentligi Qoraqalpogʻiston Respublikasi boshqarmasi boshligʻi Abat Daniyarov ochib berdi va olib bordi. Yigʻilishda Vazirlar Kengashi raisi Qahramon Sariyev  Prezidentimiz tomonidan 2020-yilning 25-dekabr kuni mamlakatimiz yoshlari bilan boʻlib oʻtgan uchrashuvda hamda joriy yilning 27-yanvar kuni yoshlar bandligini taʼminlash va ularning boʻsh vaqtlarini mazmunli tashkil etishga oid chora-tadbirlarga bagʻishlab oʻtkazilgan yigʻilishda berilgan topshiriqlar ijrosini taʼminlash borasida amalga oshirilayotgan ishlar xususida soʻz yuritdi. Shuningdek, joriy yilning “Yoshlarni qoʻllab-quvvatlash va aholi salomatligini mustahkamlash” yili deb eʼlon qilinganligi bois mazkur sohalarda Amudaryo tumanida olib borilayotgan qator samarali ishlar, xususan, “Yoshlar daftari”ni yuritish boʻyicha dastlab namuna tariqasida Nukus shahri va Beruniy tumanlarida, keyinchalik Qoraqalpogʻiston Respublikasining barcha tumanlarida yoʻlga qoʻyiladigan yoshlarni xatlovdan oʻtkazish ishlari xususida keng toʻxtaldi.

Vazirlar Kengashi raisi ushbu xatlov ishlari 461 ta ovul va mahalla fuqarolar yigʻinida oʻtkazilganligi, shunga koʻra 406 ming nafardan ziyod yoshlar oʻrganib chiqilganligi, oʻrganish yakunlari boʻyicha “Yoshlar daftari”ga 47 ming nafardan ziyod yoshlar kiritilganligi toʻgʻrisida batafsil maʼlumot berib oʻtdi. Undan tashqari, “Yoshlar daftari”ga kiritilgan barcha yoshlarning yoʻnalishlar kesimida bandligini taʼminlash va ijtimoiy muammolarini yechish boʻyicha amalga oshirilayotgan ishlar haqida ham soʻzladi.

Oʻzbekiston Respublikasi Markaziy banki raisi oʻrinbosari Ayyubxon Kamalov ham yigʻilish davomida joylarda yoshlarni tadbirkorlikka keng jalb qilish borasida samarali ishlar olib borilayotganini taʼkidladi. Shuningdek, “Yoshlar: 1+1”  dasturi doirasida yoshlarni tadbirkorlikka keng jalb qilish maqsadida oʻquv kurslari tashkil qilinayotgani, oʻquv kurslarini tamomlagan yoshlarga hafta oxirida sertifikatlar taqdim etilayotganini aytib oʻtdi. Ushbu sertifikatlar asosida esa dehqonchilik qilish uchun yer va tadbirkorlik qilish uchun kreditlar ajratilayotgani haqida gapirib, kredit olish tartibi haqida batafsil tushunchalar berdi.

Shundan soʻng, yoshlar bilan ochiq muloqot tarzida suhbat oʻtkazildi. Ochiq muloqotda yoshlar tomonidan 22 ta murojaatlar qabul qilindi. Murojaatlar asosan kredit, oʻz mutaxassisligi boʻyicha ishga joylashish, chekka hududlarda IELTS ga tayyorgarlik boʻyicha maxsus kurslar tashkil etish, vaqtincha vazir boʻlish, yosh olimlar klubini tashkil etish, kasb-hunar oʻrgatish kurslarini chekka hududlarda ham tashkil etish boʻyicha qabul qilindi. Shuningdek, subtsidiya asosida issiqxona qurib berish, Yoshlar kichik sanoat zonasini tashkil etish, baliqchilikni rivojlantirish uchun yer maydonini ajratib berish  kabi masalalarda ham murojaatlar kelib tushdi. Ushbu murojaatlarning ayrimlari joyida hal etildi. Oʻrganish va muddat talab etiladigan murojaatlar esa tegishliligi boʻyicha masʼullarga topshirildi. Kredit olish, bandlikni taʼminlash boʻyicha berilgan murojaatlarning ayrimlariga tegishli masʼullar koʻmagida shu vaqtning oʻzida yechim topilib berildi. Shuningdek, subsidiya asosida Chordara mahallasida yashovchi Baxtjon Bozorboyevga issiqxona qurib berildi.

Yigʻilish yakunida Vazirlar Kengashi raisining tegishli soha oʻrinbosarlariga barcha murojaatlarni tegishliligi boʻyicha oʻrganish, ijobiy hal etish boʻyicha qatʼiy topshiriqlar berildi va ijrosi nazoratga olindi.

O. Xudoyberganova.