“YoSh ChEGARAChILAR” HARBIY-SPORT MUSOBAQASI BOʻLIB OʻTDI

Yoshlarni vatanparvarlik ruhida tarbiyalash, ularni jismonan sogʻlom va maʼnaviy yetuk inson sifatida kamol toptirish, sogʻlom turmush tarzini targʻib qilish, oʻz yurti va xalqi taqdiri uchun yuksak masʼuliyat va javobgarlik tuygʻularini shakllantirish maqsadida barcha hududlardagi umumtaʼlim maktablari oʻquvchi-yoshlari oʻrtasida “Yosh chegarachilar” harbiy-sport musobaqasi oʻtkazilib kelinmoqda. Tumanimizda ham Xalq taʼlimi, Mudofaa ishlari, Jismoniy tarbiya va sport boʻlimi hamkorligida umumtaʼlim maktablarining 10-11-sinf oʻquvchilari oʻrtasida ushbu musobaqa tashkil etilib, yoshlar qalbida Vatan taqdiriga daxldorlik, yurtga muhabbat va sadoqat kabi ezgu hislar yanada mustahkamlanmoqda.

Shu yil 30-mart kuni tumanimizda ham ushbu musobaqaning hududiy bosqichi 8 ta, yaʼni Mangʻit shahri, shahar atrofi, Qilichboy, Doʻrman, Xitoy, Jumurtov, Toʻlqin, Qipchoq ovullarida oʻtkazildi. Barcha hududlarda qizgʻin tarzda oʻtkazilgan musobaqalarda shartlarni chaqqonlik, abjirlik, bilimdonlik bilan bajarib, gʻolib boʻlishga erishgan jamoalar saralanib, tuman bosqichida qatnashishga muvaffaq boʻldilar.

31-mart kuni mudofaaga koʻmaklashuvchi Vatanparvar tashkilotida yuqori saviyada oʻtkazilgan mazkur musobaqaning tuman bosqichida hududiy bosqich gʻoliblari kuch sinashdilar. Musobaqaga jami  umumtalim maktablaridan 8 ta jamoa, 80 nafar oʻquvchi-yoshlar ishtirok etishdi.

Musobaqada ishtirok etgan masʼullar mamlakatimizda amalga oshirilayotgan yoshlarga oid davlat siyosati negizida ham jismoniy, ham maʼnaviy jihatdan sogʻlom, hech kimdan kam boʻlmasdan, boshini baland koʻtarib  yashaydigan, Vatanimizning taqdiri va istiqboli uchun masʼuliyatni oʻz zimmasiga olishga qodir boʻlgan barkamol avlodni tarbiyalashdek ustuvor maqsad mujassamligi toʻgʻrisida soʻzladilar. Yosh avlod qalbida Vatan sarhadlari muqaddas ekanligi haqidagi tushunchani shakllantirish, davlat chegarasining himoyasi sharafli burch ekanligini targʻib qilish, chaqiriqqacha tayyorgarlik yoshidagi oʻsmirlarni chegara qoʻshinlari saflarida xizmat qilishga tayyorlab borish maqsadida har yili anʼanaviy oʻtkazilib kelinayotgan ushbu musobaqaning bu galgi ishtirokchilariga muvaffaqiyat tiladilar.

Jamoalar tomonidan qizgʻin kutib olingan musobaqada ishtirokchilar safda harbiycha yurish, toʻsiqlardan sakrab oʻtash, belgilangan masofaga yugurish, turnikka tortinish, avtomatni qismlarga ajratish va yigʻish, jarohatlanganda birinchi tibbiy yordam koʻrsatish kabi shartlar boʻyicha oʻz mahoratlarini koʻrsatdilar. Jamoalarning barcha aʼzolari faol ishtirok etib, oʻz bilim va mahoratini, chaqqonlik va abjirliklarini, birinchi tibbiy yordam koʻrsatish koʻnikmalarini keng namoyish etdilar. Musobaqa davomida oʻquvchi-yoshlar bilim va mahoratlarini sinovdan oʻtkazdilar. Shuningdek, Vatanparvar tashkilotining oʻquv-sport texnika klubida yaratilgan sharoitlar, mavjud texnikalar bilan yaqindan tanishishdi.

Musobaqa yakuniga koʻra, barcha shartlarni mohirlik bilan bajarib, ustunlikni qoʻlga kiritgan 6-sonli umumtalim maktabi jamoasi 1-oʻrinni, 48-sonli umumtalim maktabi jamoasi 2-oʻrinni, 3-oʻrinni 22-sonli umumtalim maktabi jamoasi 3-oʻrinni egalladi. Gʻolib jamoalar tashkilotchilar tomonidan faxriy yorliq va sovgʻalar bilan taqdirlandilar.

Bu kabi musobaqalar yoshlarning harbiy sohaga qiziqishini yanada kuchaytirib, hayotini Vatan tinchligi, sarhadlar osoyishtaligi, el-yurt xotirjamligi uchun bagʻishlashga daʼvat etayotgani bilan ham ahamiyatlidir.

O.Xudoyberganova.