BOSh VAZIR OʻRINBOSARI AMUDARYoDA YaNGIDAN QURILAYoTGAN KOʻPRIKNING QURILISh IShLARI BILAN TANIShDI
Prezidentimiz 2019-yil 20-21-avgust kunlaridagi Qoraqalpogʻiston Respublikasiga qilgan tashrifi davomida 2020-2022-yillar mobaynida tumanimizdagi Amudaryo daryosi ustidan oʻtadigan temir yoʻl va avtomobil yoʻli qoʻshma koʻprigi qurilishini loyihalashtirish va loyihani amalga oshirish boʻyicha topshiriqlar bergan edi. Shunga koʻra va Davlatimiz rahbarining 2020-yil 12-13-dekabr kunlari Xorazm viloyatiga qilgan tashrifi chogʻidagi Qoraqalpogʻiston Respublikasi va Xorazm viloyatini bogʻlovchi Amudaryo daryosi ustiga avtomobil va temir yoʻl qoʻshma koʻprigini qurish ishlarini boshlash boʻyicha bergan tegishli topshiriqlariga muvofiq qisqa muddat ichida qurilish ishlari boshlab yuborildi.
Amudaryoliklarning koʻp yillik orzusi boʻlgan eskirib qolgan ponton koʻprik oʻrniga zamonaviy temirbeton konstruktsiyali koʻprikning qurilishi ayni kunlarda jadal surʼatlarda davom etmoqda. Yangi koʻprikning qurilishi orqali Qoraqalpogʻiston Respublikasi va Xorazm viloyati aholisi uchun savdo-iqtisodiy, ijtimoiy va maishiy aloqalarning yanada rivojlantirilishi kutilmoqda.
21-aprel kuni Xorazmni Qoraqalpogʻiston bilan bogʻlaydigan ushbu avtomobil va temir yoʻl koʻprigida olib borilayotgan qurilish ishlari bilan tanishish maqsadida tumanimizga Oʻzbekiston Respublikasi Bosh vazirining birinchi oʻrinbosari Ochilboy Ramatov tashrif buyurdi.
Bosh vazirning birinchi oʻrinbosari Ochilboy Ramatov Xorazm viloyati hokimi Farhod Ermanov, Qoraqalpogʻiston Respublikasi Vazirlar Kengashi raisi Qahramon Sariyev hamda tuman hokimi Sultonboy Yoʻldashevlar hamrohligida yangidan barpo etilayotgan koʻprikning qurilish maydonida boʻlib, “Oʻzbekiston temir yoʻllari” aktsiyadorlik jamiyatining “Koʻprik qurilish tresti” unitar korxonasi ishchilari tomonidan amalga oshirilayotgan katta hajmdagi qurilish ishlari bilan tanishdi.
Yangi koʻprik qurilishi loyihasiga buyurtmachi etib - “Oʻzbekiston temir yoʻllari” aktsiyadorlik jamiyati, bosh loyihachi etib - “Boshtransloyiha” aktsiyadorlik jamiyati, bosh pudratchi etib - “Oʻzbekiston temir yoʻllari” aktsiyadorlik jamiyatining tarkibiy boʻlinmalari belgilangan. Ushbu qoʻshma koʻprikning uzunligi 412,7 metr, balandligi 11,5 metr, kengligi 8,5 metrni tashkil qiladi va shu bilan bir qatorda 79 km. uzunlikda “Shovot-Gurlan-Jumurtov-Qoraoʻzak” temir yoʻl liniyasini qurish boʻyicha ham ishlar boshlab yuborilgan. Yangi temir yoʻl liniyasi qurilishi natijasida Rossiya va Qozogʻiston Respublikasidan yuklarni tashish masofasini 240 km.ga vaqtini esa 6 soatga qisqartirishga erishiladi.
Yuk tashish hajmi ikki baravar koʻpayib, yiliga 25 million tonnani tashkil etadi. Mintaqalarning rivoji natijasida iqtisodiy samaradorlik yiliga 100 milliard soʻmga oshadi. Bundan tashqari, Qoraqalpogʻiston Respublikasidan Xorazm viloyatiga qurilish materiallarini yetkazib berish xarajatlari kamayadi, bu esa ijtimoiy obʼektlar va infratuzilmalarni qurish xarajatlarini kamaytiradi. Muxtasar qilib aytilganda, mazkur koʻprikning ishga tushirilishi natijasida hududlar farovonlashib, aholining turmush darajasi yanada yaxshilanadi.
2021-yilga ushbu loyihani amalga oshirish uchun respublika byudjetidan 40 mln. AQSh dollari miqdorida mablagʻ ajratilishi koʻzda tutilmoqda.
Yangi koʻprik qurilishi maydonida amalga oshirilayotgan ishlar holati bilan tanishgan masʼullar tomonidan pudratchi tashkilotlar rahbarlari va ishchilarga samaradorlikni oshirish boʻyicha tegishli tavsiyalar, muhim maslahatlar berildi. Shuningdek, ish jarayonida duch kelinayotgan, mavjud muammolar bilan ham tanishilib, ularni bartaraf etish boʻyicha tegishli rahbarlarga vazifalar topshirildi.
O. Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
