“Qalb shoiri”

El dilida mangu qolgan otashnafas shoir Muhammad Yusuf Andijon viloyatining Marhamat tumani soʻlim goʻshalaridan birida tugʻilib voyaga yetdi. Bolaligi qishloqning yam-yashil bedapoyalari, cheksiz dalalari, oʻt-oʻlanlar bilan qoplanib, betakror goʻzallik kashf etgan qirlari ogʻushida oʻtgan.

U oʻz Vatanining har bir qarich yerini jonidan sevgan, har bir yurtdoshiga eʼtiborsiz qaramagan, har birining mehnatidan hikmat axtargan bulbulizabon shoir edi.

Yer aylanur, Yer aylanur,

Yer aylanib tinmaydi.

Yaktagining yenglaridan

Ter yugurib tinmaydi.

Qoʻling tegmay bu dunyoda

Bitta giyoh unmaydi,

Tin bilmagan jonim mening

Bobodehqonim mening...

Oddiygina, barcha yoshdagi oʻquvchilarga tushunarli tilda yuragidagi bobodehqonga boʻlgan samimiy va iztirobli tuygʻularini shunday ifodalagan shoir.

Muhammad Yusufning aksariyat sheʼrlarida yurt manzarasi, mehnatkash oʻzbekning qiyofasi, oʻzbekona urf-odatlar toʻla namoyon boʻladi. Shuning uchun uning sheʼrlarini katta-yu kichik birdek sevib oʻqiyveradi.

U haqiqiy xalqparvar, xalq sevgan shoir edi. Shuning uchun ham uning asarlari barchaning eng sevimli kitoblari safidan joy olgan.

Shu yilning 26-aprelida hassos, otashnafas shoir tavalludiga 67-yil toʻldi. Shu munosabat bilan 40-sonli umumiy oʻrta taʼlim maktabida “Qalb shoiri” nomli maʼnaviy-maʼrifiy tadbir oʻtkazildi. Tadbirda 8 “V” va 6 “B” sinf oʻquvchilari faol ishtirok etib, sevimli shoirimiz Muhammad Yusuf sheʼrlaridan aytib berishdi. Shuningdek shoir haqida zamondoshlari aytgan eʼtiroflar va sheʼrlar, hayoti va ijodiga doir maʼlumotlar taqdim etildi. Tuman madaniyat boʻlimi sanʼatkorlari shoir sheʼrlariga bastalangan qoʻshiqlarni maromiga yetkazib ijro yetishdi.

Tadbirni tashkil etish va oʻtkazishda ona tili va adabiyot fani oʻqituvchisi Hulkaroy Xoʻjaniyozova, maʼnaviyat va maʼrifat ishlari boʻyicha direktor oʻrinbosari Zamira Xudoyberganova va ijodiy-madaniy masalalar boʻyicha targʻibotchi Umidalar hamkorlikda tashkil etishdi.

Tadbir mazmunli va qiziqarliligi, maroqli kuy-qoʻshiq va raqslarga boyligi bilan oʻquvchilarga manzur boʻldi.

Yillar oʻtaverar, biroq ijodi xalqimiz dilidan chuqur joy olgan xalqparvar shoirni muxlislari, xalqi hech qachon unutmaydi. Muhammad Yusuf asarlari har bir xonadonning kitob javonidagi eng sevimli kitob boʻlib qolaveradi.

Oygul RAJABOVA.