ONALIK VA BOLALIK MUHOFAZASI – barkamol avlodni voyaga yetkazishning asosidir
Onalik va bolalikni muhofaza qilish - davolash va xastalikning oldini olishga qaratilgan tibbiy yordam, homilador ayollarga maslahat berish, ularni onalikka tayyorlash, chaqaloqqa tugʻilish vaqtida malakali tibbiy yordam koʻrsatish, chaqaloqni parvarish qilish, maktabgacha boʻlgan davrda bolaning salomatligini muhofaza qilish, jismoniy rivojlanishini, toʻgʻri ovqatlanishini, immunologik holatini nazorat qilish, maktab yoshidagi bolalarning salomatligini muhofaza qilish, uni jismoniy rivojlantirish, oʻsib kelayotgan organizm asosiy tizimlarining faoliyatini baholash, salomatlik holatida paydo boʻlgan oʻzgarishlarni aniqlash kabi masʼuliyatli vazifalardan iboratdir.
Ota-onaning farzand oldidagi burchi nihoyatda masʼuliyatli. Har bir ota-ona farzandi oldida oʻz otalik, onalik burchini xis etishi, unga javobgarligini toʻliq anglab yetishi lozim. Farzandlar tarbiyasi quyidagi bosqichlarda amalga oshirilishini har bir ota-ona bilishi lozim.
Birinchi bosqich - nasl tarbiyasi, yaʼni bola tarbiyasi bola tugʻilmasidan 3-4-yil oldin boshlanishi zarur. Bunda farzand koʻrishni istagan ota-onaning boʻlajak farzandlari taqdiriga masʼuliyat bilan qarab, oʻzlarining salomatliklarini yaxshilashlari nazarda tutilgan.
Ikkinchi bosqich - homiladorlik davridagi parvarish. Bu masala oʻta muhim ahamiyatga ega boʻlib, ayniqsa, rivojlangan mamlakatlarda homiladorlik davrida onalarga katta gʻamxoʻrlik koʻrsatiladi.
Uchinchi bosqich - bola tugʻilganidan to 6-7 yoshgacha boʻlgan davr. Shu davrga kelib bolada ilk maʼnaviy tarbiyani boshlash, rivojlantirish davri boshlanadi. Bolaning bundan keyingi tarbiyasi oiladagi muhitga chambarchas bogʻliq boʻladi. Bunda oʻzaro hurmat va qattiq tartib boʻlmasa, oilaning barcha aʼzolari oʻz burchlarini ado etmasa, bir-biriga nisbatan mehr oqibat koʻrsatmasa, oilada voyaga yetayotgan farzandlar tarbiyasiga salbiy taʼsir etadi. Chunki oilada demokratik negizlarga asos solinadi, odamlar bir-birining, qoʻshnilarining salomatligi toʻgʻrisida gʻamxoʻrlik qilishni birinchi oʻringa qoʻyadi. Bu esa eng oliy darajadagi maʼnaviy qadriyat, inson qalbining gavharidir. Har qaysi millatning oʻziga xos maʼnaviyatini shakllantirish va yuksaltirishda, hech shubhasiz, oilaning oʻrni va taʼsiri beqiyosdir. Chunki, insonning eng pokiza tuygʻulari, ilk hayotiy tushuncha va tasavvurlari birinchi galda oila bagʻrida shakllanadi. Bolaning xarakterini, tabiati va dunyoqarashini belgilaydigan maʼnaviy mezon va qarashlar-yaxshilik va ezgulik, oliyjanoblik, mehr-oqibat, or-nomus va andisha kabi muqaddas tushunchalarning poydevori oila sharoitida qaror topadi. Shunday ekan, farzandi barkamol boʻlmogʻini istagan ota-ona avvalo oilasida sogʻlom turmush tarzini yaratishi lozim.
O.Halimov,
tuman tibbiyot birlashmasi boshligʻi, tibbiyot fanlari nomzodi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
