“TAMAKIDAN VOZ KEChISh VAQTI KELDI” ShIORI OSTIDA SALOMATLIK TADBIRI OʻTKAZILDI

Maʼlumki, 31-may 1988-yildan Jahon Sogʻlikni saqlash tashkiloti tomonidan “Xalqaro chekishga qarshi kurashish kuni” sifatida belgilangan va har yili ushbu sana munosabati bilan butun dunyoda turli mavzularda tadbirlar oʻtkazilib, keng nishonlanadi. Sana munosabati bilan yil shiorlari belgilanib, turli xil tadbirlar, salomatlik saboqlari boʻyicha davra suhbatlari, sport tadbirlari va marofonlar oʻtkaziladi.

2021-yildagi “Xalqaro chekishga qarshi kurashish kuni”, “Tamakidan voz kechish vaqti keldi!” shiori ostida, aholining barcha qatlamlari vakillari ishtirokida nishonlanmoqda.

Tumanimizda ham “Xalqaro chekishga qarshi kurashish kuni” arafasida tuman Tibbiyot birlashmasi  Salomatlik  markazi shifokorlari Jumaboy Yavkashev, Matyoqub  Ernazarov, Tamara  Saidovalar, koʻp tarmoqli markaziy poliklinika oilaviy shifokorlari  Tamara  Nurmaganbetova, Mehri Husainova, Gulnora Eshmurodova,  ftiziatr Gularo Abdullayeva, tibbiyot birlashma sport targʻibotchisi Ibodulla Nurimbetovlar hamkorligida  2021-yil 29-may kuni  Mangʻit shahridagi Istirohot bogʻida  “Biz tamakisiz xududni tanlaymiz!” shiori ostida madaniy-maʼrifiy tadbir oʻtkazildi. Unda chekishning inson organizmiga zarari toʻgʻrisida ishtirokchilar bilan savol-javob tarzidagi suhbatlar,  “Assalom tong” mavzusida nafis gimnastika sporti boʻyicha sportchi-qizlarning koʻrgazmali chiqishlari, “Biz tamakisiz muxitni tanlaymiz!” deklaratsiyasini qullab-quvvatlash uchun imzolarni toʻplash tashkil etildi. Shuningdek, antropometrik oʻlchovlarni oʻtkazish, semizlik darajasi va vazn indeksini aniqlash orqali kuzatuv natijalaridan kelib chiqib, tushuntirish ishlarini olib boruvchi salomatlik maydonchasi, toʻgʻri ovqatlanish taomillariga rioya  qilish toʻgʻrisida  tavsiyalar berilib, sogʻlom ovqatlanish yarmarkalari tashkil qilindi. Yarmarkada Olmazor, Gulzor MFYlarning uyushmagan aholisiga hamda salomatlik kuni tadbiri ishtirokchilariga Prezidentimizning 2020-yil 30-oktyabrdagi 6099-son Farmonida belgilangan vazifalardan kelib chiqib, aholi oʻrtasida sogʻlom turmush tarzi, jismoniy faollik, kun tartibi qoidalariga amal  qilish, ommaviy sport bilan shugʻullanish, sogʻlom va toʻgʻri ovqatlanish, zararli odatlarga berilmaslik, ayniqsa, kashandalik, tamaki chekishning ayanchli va salbiy oqibatlari xususida tushuntirishlar, tavsiyalar berildi. Shifokorlar har yili tamaki isteʼmoli  natijasida dunyoda 6 millionga yakin kishi hayotdan koʻz yumishi va agar unga qarshi kurashilmasa, bu koʻrsatkich 8 milliondan oshishini misollar bilan batafsil tushuntirdilar.

Ishtirokchilarga “Tamaki chekish va salomatlik”, “Sogʻlom boʻlishning oltin qoidasi”, “Yoshlar oʻrtasida sogʻlom turmush tarzini shakllantirish”, “Yoshlar - zararli odatlarga qarshi”  mavzularida  bukletlar tarkatildi. Tadbir davomida tuman madaniyat bulimi tomonidan tayyorlangan dam olish kontsert dasuri namoyish etildi.

Tadbirda ishtirokchilar shifokorlar bilan bevosita muloqotga kirishishlari, oʻzlarini qiziqtirgan savollar bilan murojaat qilishlari uchun imkoniyat yaratildi. Mutaxassis shifokorlar tadbir ishtirokchilarining barcha savollarini batafsil tingladilar. Shu barobarida, tushgan savollar mazmun-mohiyatidan kelib chiqib, hayotiy misollar orqali keng tushuncha va maʼlumotlar berdilar. Ishtirokchilar chekishning insoniyat nasli uchun juda jiddiy oqibatlar keltirishi va xavf-xatari haqida zarur tushunchalarga ega boʻldilar.

J.YaVKAShEV, Tuman tibbiyot birlashmasi shifokori.