Aholining murojaatlari oʻrganildi

Barchamizga maʼlumki, soʻngi yillarda tabiiy iqlim sharoiti tufayli koʻplab suv tanqisligi muammolari vujudga kelyapti. Bunday muammolar Oʻzbekistonning barcha hududida boʻlgani kabi Qoraqalpogʻiston Respublikasini ham chetlab oʻtmayapti. Asosan, qishloq xoʻjaligi sohasi bilan shugʻullanuvchi janubiy tumanlar aholisi suv yetishmovchiligi muammosidan qattiq aziyat chekmoqdalar. Bu kabi muammolar natijasida bir qancha tushunmovchiliklar hamda noroziliklar kelib chiqmoqda.

Xususan, ijtimoiy tarmoqlarda Amudaryo tumani Amir Temur ovuli Tuvulgʻa aholi punktida yashovchi bir guruh fuqarolar tomonidan bildirilgan videomurojaat tumandagi tegishli mutasaddi tashkilotlar tomonidan oʻrganilib, muammolarni barataraf qilish yuzasidan qator amaliy ishlar olib borilmoqda.
Aytish kerakki, Amir Temur ovuli Mangʻit Arna kanalining eng quyi qismida joylashgan boʻlib, Amudaryodan olinayotgan mavjud suv zahirasi oʻtgan yilga nisbatan 50 foizga kamayganligi ovul hududiga suv yetkazib berishda koʻplab muammolarni keltirib chiqarmoqda.

Mazkur muammolarni bartaraf qilish maqsadida “SNP-500” nasosi olib kelindi. Nasos Tuvulgʻa aholi punktiga oʻrnatilishi rejalashtirilgan. Shuningdek, daryodagi mavjud suv zahirasi kamligi bois Qoraqalpogʻiston Respublikasi Suv xoʻjaligi boshqarmasi tomonidan Mangʻit Arna kanali boshidagi 6 ta nasoslardan 3 tasini qoʻshishga ruxsat berilgan boʻlib, agar ushbu cheklov olib tashlansa, 6 ta nasoslarning barchasini qoʻshish imkoniyati yuzaga keladi va Amir Temur ovuli suv bilan taʼminlanadi.

Qolaversa, suv taqchilligi muammosini yumshatish maqsadida Mangʻit Arna kanali Mangʻit shahridan Amir Temur ovuligacha ekskavator orqali qazilmoqda.

Qolaversa, hozirgi kunda Amir Temur ovuli xududiga 11 km ichimlik suv tarmoqlarini tortish xamda 1 ta suv tarqatish inshooti qurish ishlari amalga oshirilmoqda.

Hozirgi kunda 7 km ichimlik suvi quvurlari olib kelinib, 1 km suv tarmoqlari yotqizildi va qurilish-montaj ishlari davom ettirilmoqda.

Bu ishlar toʻliq amalga oshsa, Amir Temur ovulidagi mahallalarni belgilangan tartib asosida, navbatma-navbat suv bilan taʼminlash rejalashtirilgan.

Tuman hokimligining Axborot xizmati.