Tomorqadan unumli foydalanishga bagʻishlangan seminar boʻlib oʻtdi

2. Bugungi kunda mamlakatimizda tomorqadan unumli foydalanish, yilning toʻrt faslida ham arzon, ham sifatli meva-sabzavot va poliz mahsulotlari yetishtirishga alohida eʼtibor qaratilib, bu borada keng qamrovli islohotlar olib borilmoqda.

Amudaryo tumani fermer, dehqon xoʻjaliklari va tomorqa yer egalari kengashi tomonidan ham aholi tomorqalaridan samarali foydalanish borasida qator ishlar amalga oshirilmoqda. Joriy yilning 12-iyun sanasida tumanimizdagi Bobur nomli ovulda tomorqadanunumli foydalanish borasidagi islohotlar, qilinishi lozim boʻlgan vazifalarga bagʻishlanga seminar boʻlib oʻtdi. Seminarda Qoraqalpogʻiston Respublikasi fermer, dehqon xoʻjaliklari va tomorqa yer egalari kengashi raisi oʻrinbosari Duysenbay Otarboyev, Amudaryo fermer, dehqon xoʻjaliklari va tomorqa yer egalari kengashi mutaxasissi Javlon Rajabov hamda Bobur ovuli xududidagi koʻcha boshchilari, mahalla faollari ishtirok etdilar.

Seminarda davlatimiz rahbari tomonidan joriy yil  1-aprel sanasida imzolangan “Dehqon xoʻjaligi toʻgʻrisida”gi qonunning mazmun-mohiyati xaqida keng tushunchalar berib oʻtildi. Shuningdek, tajribali tomorqa yer egalari seminar ishtirokchilariga oʻzlarining uzoq yillar davomida tomorqadan foydalanish borasidagi tajribalari bilan oʻrtoqlashdilar.

Taʼkidlanganidek, “Dehqon xoʻjaligi toʻgʻrisida”gi qonunga koʻra, 18 yoshga toʻlgan, muomalaga layoqatli boʻlgan, oʻziga dehqon xoʻjaligini yuritish uchun yer uchastkasi meros qilib qoldiriladigan umrbod egalik qilish yoki ijara huquqi asosida berilgan Oʻzbekiston fuqarosi yoki Oʻzbekiston hududida doimiy yashovchi fuqaroligi boʻlmagan shaxs dehqon xoʻjaligi boshligʻi boʻlishi mumkin. Shuningdek, qonun bilan belgilanganidek, dehqon xoʻjaliklaridan davlat boji va yigʻim undirilmaydi, dehqon xoʻjaligini yuritish uchun 6 sotixdan 1 gektargacha boʻlgan oʻlchamda yer uchastkalari beriladi, qishloq xoʻjaligiga moʻljallangan yerlarning asosiy ekindan boʻshagan qismi 6 sotixdan 10 gektargacha boʻlgan oʻlchamda bir yilgacha boʻlgan muddatga ikkilamchi ijaraga berilishi mumkin, berilgan yer uchastkasidan faqat qishloq xoʻjaligi mahsulotlari yetishtirish uchun foydalanilishi kerak.

Qolaversa, dehqon xoʻjaligi oʻz ixtisoslashuvini, shu jumladan, qishloq xoʻjaligi ekinlarining turlari va hajmlarini, ularni yetishtirish hamda agrotexnik tadbirlarni oʻtkazish usullarini mustaqil ravishda belgilaydi. Oʻzi ishlab chiqarayotgan qishloq xoʻjaligi mahsulotlariga bozordagi talab va taklif nisbatidan kelib chiqib mustaqil ravishda narxlar belgilaydi.

Seminarda maʼlumot tariqasida qayd etilishicha, tumanda jami 39 ming 583 ta tomorqa yer egalari mavjud boʻlib, ularda 6 ming 652 gektar ekin yerlari mavjud boʻlib, 2021-yil may oyi holatiga koʻra 5 ming 513 gektar yer maydoniga ertaki ekin ekish ishlari nihoyasiga yetkazilgan. Bugungi kunda aholi tomorqalarida 13,9 gektar tomorqa yer maydonida 1183 ta issiqxonalar mavjud.

2021-yilda tumandagi mahallalarni "Bir mahalla - bir mahsulot" tamoyili asosida jami 49 mahallalar ixtisoslashtirish hamda jami 14 ta mahallada, shundan 8 ta gavjum mahallalarda yengil konstruktsiyali “dala doʻkonlari” va kichik sigʻimli muzlatkich omborlar qurish rejalashtirilgan.

Seminar ochiq mulroqot tarzida oʻtkazildi. Ishtirokchilar oʻzlarini qiziqtirgan savollarga javoblar oldilar.

Charos Arslonova, tuman hokimligining Axborot xizmati rahbari.