Tomchilatib sugʻorish texnologiyasiga bagʻishlangan seminar oʻtkazildi

Mamlakatimizda aholi sonining tobora oshib borayotgani sababli insonlarning oziq-ovqatga boʻlgan ortib borayotgan ehtiyojini qondirish uchun dehqonchilikni yanada rivojlantirishga alohida eʼtibor berilmoqda. Dehqonchilik sohasida eng muhim vazifa bu ekinlarga keraklicha suv yetkazib berishdir. Soʻnggi yillarda butun dunyo aholisini qiynab kelayotgan suv tanqisligi muammosini yumshatish maqsadida mavjud suv zahiralarini tejash muhim ahamiyatga ega.

Qishloq xoʻjaligi mahsulotlarini nobud qilmasdan yetishtirish, ularni kerakli suv bilan taʼminlash, suv zahiralarini tejash maqsadida ekinlarni tomchilatib sugʻorish texnologiyasini joriy etish yaxshi samara bermoqda.

Joriy yilning 19-iyun sanasida tumanimizdagi “Rajapov Omonboy” fermer xoʻjaligida tomchilatib sugʻorish boʻyicha seminar oʻtkazildi. Seminarda Qoraqalpogʻiston Respublikasi Suv xoʻjaligi vazirligi mutaxassisi Abu Qidirbayev, tuman xokimining qishloq va suv xoʻjaligi masalalari boʻyicha oʻrinbosari Fayzulla Saʼdullayev, “Asl qishloq taraqqiyot" masʼuliyati cheklangan jamiyati direktori Jasur Yunusov, tuman Irrigatsiya boʻlimi boshligʻi Jamol Rajapov, tuman Suv isteʼmolchilari uyushmasi rahbari Erkaboy Oʻrazboyev hamda tumandagi fermer hoʻjaliklari rahbarlari ishtirok etdilar.

Aytish kerakki, bugungi kunda tumanimizda qishloq xoʻjaligi ekinlarini tomchilatib sugʻorish yuzasidan tizimli ishlar qilinmoqda. Joriy yilda tumandagi jami 3800 gektar ekin maydonida suvni tejaydigan texnologiyalarni joriy qilish belgilangan boʻlib, shundan 3730 gektar yer tomchilatib sugʻorish, 30 gektar maydon yomgʻirlatib sugʻorish, 40 gektar yer esa diskret sugʻorish texnologiyasi orqali sugʻorish rejalashtirilgan.

Shu kunga qadar jami 169 ta fermer xoʻjaligi va 1 ta klaster tashkiloti tomonidan 2815 gektar ekin maydonida suvni tejaydigan texnologiyalarni joriy qilish boʻyicha pudratchi tashkilotlar bilan shartnomalar tuzilgan.

Shuningdek, paxta xomashyosini yetishtirishda tomchilatib sugʻorish texnologiyasini joriy qilish boʻyicha 145 ta fermer xoʻjaligi tomonidan 2581,4 gektar, 1 ta klaster tashkiloti tomonidan 34,5 gektar maydonda, mevali bogʻ va boshqa ekin maydonlarida tomchilatib sugʻorish texnologiyasini joriy qilish boʻyicha 19 ta fermer xoʻjaligi tomonidan 130 gektar maydonda pudratchi tashkilotlar bilan shartnomalar qilingan.

Seminarda yigʻilganlarga tomchilatib sugʻorish texnologiyasining afzalliklari, texnologiyadan foydalanishning oʻziga xos jihatlari xususida maʼlumotlar berib oʻtildi.

Taʼkidlanganidek, tomchilatib sugʻorish texnologiyasining anʼanaviy sugʻorishdan qator afzalliklari mavjud. Xususan, tomchilatib sugʻorishda ekinlarning faqat ildiz tizimi namladi. Bunday holda, suv oʻsimlik tomonidan kerakli miqdorda va tez soʻriladi hamda uning oʻsishi va rivojlanishiga zarar yetkazmaydi. Anʼanaviy sugʻorish bilan solishtirganda, tomchilardan foydalanganda, tuproqning tabiiy tuzilishi buzilmaydi. Kuchli quyosh nurlari bilan oʻsimliklar nobud boʻlmaydi, bu barglarga tomchilar tushganda kuzatiladi. Avtomatlashtirilgan tomchilatib sugʻorish tizimi bilan sugʻorish insonning minimal aralashuvi bilan amalga oshiriladi. Suv tuproqqa faqat ildiz tizimi yotadigan joylarda kiradi, u har bir oʻsimlik uchun bir tekis va doimiy ravishda zarur boʻlgan miqdorda yetkazib beriladi.

Seminar ishtirokchilari tomchilatib sugʻorish texnologiyasi boʻyicha mutaxassislarga savollar bilan murojaat qildilar va tegishli javoblar oldilar.

Charos Arslonova, tuman hokimligining Axborot xizmati rahbari.