MAʼNAVIYaTLI VA MADANIYaTLI YoShLAR DAVLATNI TARAQQIYoTGA YeTAKLAYDI

Jamiyat hayotini rivojlantirishda ham madaniy va milliy qadriyatlarga tayaniladi. Prezidentimiz taʼkidlaganlaridek, mamlakatimizda madaniyat va sanʼat taraqqiy etmasa, jamiyat rivojlanmaydi. Shu sababli yurtimizning eng bebaho boyligi, milliy taraqqiyotimizning tayanchi boʻlgan yoshlarimizning maʼnaviyatini boyitish, madaniyat va sanʼatga keng jalb qilish bugungi kundagi eng dolzarb vazifalarimizdan biri hisoblanadi.

Beshta muhim tashabbus doirasida yoshlarni qoʻllab-quvvatlash, boʻsh vaqtlarini mazmunli tashkil etish, madaniyat sohasining turli yoʻnalishlariga qiziqtirish, madaniy dam olishlarini samarali oʻtkazish maqsadida tuman Madaniyat boʻlimi tasarrufidagi 7 ta madaniyat  markazlari, 3 ta xalq jamoalari, 2 ta bolalar musiqa va sanʼat maktabi, madaniyat va istirohat bogʻi, maxsus koʻzi ojizlar kutubxonasi faoliyat koʻrsatib kelmoqda. Madaniyat markazlarida 20 dan ortiq havaskorlik toʻgaraklari mavjud boʻlib,   ularda 250 nafardan ziyod yoshlar tahsil olishmoqda.

Tumanimizdagi  2 ta Bolalar musiqa va sanʼat maktabida 11 ta yoʻnalish boʻyicha 500 nafardan ortiq yoshlarimiz sanʼat sirlarini oʻrganib, Respublikada oʻtkazilayotgan koʻrik-tanlov, festivallarda ijobiy natijalarga erishmoqda.

Yosh avlodni madaniyat va sanʼat sohasiga keng jalb etish, ularning boʻsh vaqtlarini mazmunli oʻtkazish maqsadida madaniyat markazlarida maqom, nazm va nasr, sahna tsirki, askiya, ovoz yozish studiyasi, raqs, bichish-tikish, badiiy oʻqish, baxshichilik, estrada va masxarabozlik sanʼati kabi qoʻshimcha toʻgaraklar  tashkil qilingan.

Milliy maqom sanʼatini rivojlantirish hamda yoshlarga milliy mumtoz navolarni oʻrgatish va mehr uygʻotish maqsadida, ustoz-sanʼatkorlar bilan “Uchrashuv”, “Aytishuv”, “Jonli ijro” “Ustoz-shogird” kechalari tashkil qilinib, yosh tomoshabinlar eʼtiboriga havola etilmoqda.

Maqsadimiz – yosh avlodni madaniyat va sanʼatga jalb etish orqali maʼnaviyatini boyitishdir. Chunki maʼnaviyatli va madaniyatli yoshlar kelajagi buyuk davlatni taraqqiyotga yetaklaydi.

Sh.Yusupov,

tuman Madaniyat boʻlimi rahbari.