TAKRORIY EKINLARNI EKISh IShLARI YaKUNLANDI

Bugungi kunda aholini oziq-ovqat mahsulotlari bilan taʼminlash dunyo mamlakatlari uchun eng dolzarb masalaga aylangan. Aholi sonining oʻsib borishi, qishloq xoʻjaligida foydalanilayotgan yer va suv resurslarining cheklanganligi, ayniqsa, oʻtgan yildan beri hukm surayotgan pandemiya, tabiatdagi oʻzgarishlar vaziyatni yanada murakkablashtirmoqda. Shu bois yurtimizda mavjud imkoniyatlardan foydalangan holda, kuzgi boshoqli don ekinlari yigʻishtirib olinganidan soʻng, takroriy ekin parvarishlashga jiddiy eʼtibor qaratilmoqda.

Prezidentimiz tomonidan shu yil 8-iyun kuni oʻtkazilgan videoselektor yigʻilishida berilgan topshiriqlarga koʻra Qoraqalpogʻiston Respublikasida ham mazkur yilda gʻalladan boʻshagan maydonlarga takroriy ekinlar eksportbop va ichki bozor talablaridan kelib chiqib  joylashtiriladi. Shunga muvofiq tumanda aholining oziq-ovqat xavfsizligini taʼminlash maqsadida 2021-yil hosili uchun ekilgan gʻalla maydonlaridan boʻshagan maydonlarga takroriy ekinlar ekish rejalashtirildi.

Doʻrman ovuli hududidagi fermer xoʻjaliklarida ham 217 gektar yer maydoniga gʻalla ekilgan boʻlib, boʻshab qolgan yerning 170,4 gektari takroriy ekin ekish uchun ajratib berildi. Ushbu yer maydonlari shu hudud aholisidan 568 nafariga boʻlib berilib, bandligi taʼminlandi. Hozirgi kunda ajratib berilgan yerlar qayta shudgor qilinib, egatlar tortildi. Tayyor boʻlgan yerlarga sabzavotlardan karam, lavlagi, sabzi hamda moyli, dukkakli, chorva uchun ozuqabop ekinlar ekib chiqildi. Ovul hududidagi “Pirnazarov Toʻraboy” hamda “Rahimberdiyev Shuhrat” fermer xoʻjaliklarida ham takroriy ekin ekishga ajratilgan yer maydonlariga sabzavotlar ekilib, parvarishlash ishlari boshlab yuborildi.

Taʼkidlash joizki, tumanda gʻalladan boʻshagan yerlarning 3300 gektariga takroriy ekin ekish rejaga kiritildi. Shundan 258 gektarga sabzavot ekinlari  ekilishi koʻzda tutilgan boʻlib, 208 gektar yerga sabzi, 15 gektarga sholgʻom, 15 gektarga turp,  10 gektarga bosh karam, 10 gektarga osh lavlagi ekildi. Undan tashqari, 35 gektarga kartoshka, 337 gektarga dukkakli ekin mosh ham ekib boʻlindi. Shuningdek, 755 gektarga moyli ekinlar ekish rejalashtirilgan edi. Shunga koʻra 240 gektarga kungaboqar, 515 gektarga kunjut urugʻi qadaldi.

Rejaga koʻra 736 gektarga yerga ozuqa ekinlari ham ekilib, makkajoʻxori don uchun 44 gektar, makkajoʻxori silos uchun  515 gektar yer ajratildi. Shuningdek, gʻalladan boʻshagan yerlarning 1135 gektariga sholi ham ekildi.

Takroriy ekinlarni ekish va mahsulot yetishtirish uchun  talab etiladigan urugʻlik, mineral oʻgʻit, yoqilgʻi moylash materiallari va kredit mablagʻlari uchun jami 16 mln. 851 mln. soʻmlik pul mablagʻlari ajratildi. Shundan 2 mlrd.65 mln. soʻm texnikalar servis xizmatlari uchun, 6 mlrd.239 mln. soʻm 808 tonna mineral oʻgʻit uchun, 3 mlrd. 437 mln. soʻm 458 tonna azot uchun, 2 mlrd. 505 mln. soʻm 251 tonna fosfor uchun, 317 mln. soʻm 99 tonna kaliy uchun, 1 mlrd. 808 mln. soʻm 321 tonna urugʻlik uchun, 3 mlrd. 74 mln. soʻm 427 tonna yoqilgʻi moylash materiallari uchun ishlatildi. Ish haqi uchun esa 3 mlrd. 665 mln. pul mablagʻlari sarf etildi.

Tumanda takroriy ekin ekish ishlari 6-iyulga qadar amalga oshirilib yakunlandi. Ushbu chora-tadbirlar mamlakatimizda oziq-ovqat xavfsizligini taʼminlash, aholiga kuz-qish mavsumlarida roʻzgʻorga kerakli oziq-ovqat mahsulotlarini uzluksiz hamda arzon narxlarda yetkazib berish, eksportni koʻpaytirish orqali dehqon va fermerlarning moddiy manfaatdorligini oshirishga xizmat qiladi.

O. Xudoyberganova.