Amudaryo tumanidagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi samarali faoliyat yuritmoqda

Soʻngi yillarda mamlakatimizda tadbirkorlarning huquqlari va qonuniy manfaatlarini himoya qilish borasida keng koʻlamli ishlar amalga oshirilib, tadbirkorlar uchun koʻplab imkoniyatlar yaratilmoqda.

Oʻzbekiston Respublikasi Prezidentining 2019-yil 14-maydagi “Tadbirkorlik faoliyatini qoʻllab-quvvatlash va himoya qilish tizimini tubdan takomillashtirish chora-tadbirlari toʻgʻrisida”gi farmoniga binoan tumanimizda Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi tashkil etilib, tadbirkorlik subʼektlarining murojaatlarini qabul qilish, ularning huquqlari va qonuniy manfaatlariga rioya qilinishini taʼminlash, tadbirkorlikni rivojlantirishga toʻsqinlik qilayotgan muammoli masalalarni koʻrib chiqish va mavjud toʻsiqlarni bartaraf etish boʻyicha tizimli ishlar olib borilmoqda.

Joriy yilning shu davriga qadar Amudaryo tumanidagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi samarali faoliyat yuritib kelmoqda.

Oʻzbekiston Respublikasi Prezidentining “Tadbirkorlik faoliyatini qoʻllab-quvvatlash va himoya qilish tizimini tubdan takomillashtirish chora-tadbirlari  toʻgʻrisida”gi Farmoni ijrosini taʼminlash maqsadida qabulxona  faoliyati toʻgʻri tashkil etilib, aniqlangan muammolarni tahlil qilish hamda ularni hal etish boʻyicha tizimli ishlar qilinmoqda.

Shu maqsadda tumandagi qator muassasalarning vakillaridan iborat ishchi guruhi vakolatli organlar vakillari, qabulxona huzurida tashkil etilgan tumandagi faol tadbirkorlar, huquqshunoslar va tadbirkorlarning boshqa vakillaridan iborat Tadbirkorlar jamoatchilik kengashi bilan hamkorlikdagi ishlar olib borildi.

Xususan, joriy yilning 1-iyul sanasiga qadar qabulxona tomonidan hududlarda 26 ta sayyor qabullar tashkil etildi. Tashkil etilgan sayyor qabullar hamda oʻtkazilgan suhbatlar davomida tumandagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi tomonidan jami  106 ta masala boʻyicha 104 ta murojaatlar roʻyxatga olingan. Roʻyxatga olingan 104 murojaatlardagi 106 ta masalalardan 62 tasi, yaʼni 58 foizi qanoatlantirilgan, 44 tasiga tushuntirishlar berilgan.

Mazkur murojaatlarning 53 tasi, yaʼni 50 foizi kredit masalasida, shundan “Har bir oila tadbirkor” dasturi boʻyicha 41 ta, tadbirkorlik faoliyatiga kredit olish uchun 12 ta murojaat kelib tushgan boʻlib, ularning 34 tasi qanoatlantirilgan, 19 tasiga tushuntirish berilgan.

Amudaryo tumanidagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasiga kelib tushayotgan murojaatlar qabulxona huzuridagi tadbirkorlarning jamoatchilik kengashi tomonidan muntazam ravishda tahlil qilinib, tumanda kichik biznes va tadbirkorlikni rivojlantirishga toʻsiq va gʻov boʻlayotgan muammolarni bartaraf etish borasida amaliy ishlar qilinmoqda.

Taʼkidlash kerakki, davlatimiz rahbari tashabbusi bilan ogʻir sinovli kunlarda, yaʼni koronavirus pandemiyasi barcha sohalar rivojiga oʻzining zararli taʼsirini oʻtkazayotgan davrda tadbirkorlik va ishbilarmonlik har tomonlama qoʻllab-quvvatlanmoqda. Ogʻir epidemiologik sharoitda tadbirkorlar faoliyatlarini davom ettirishlari uchun qator imtiyozlar, imkoniyatlar yaratildi.

Kichik biznes va xususiy tadbirkorlik iqtisodiyotning oʻsish nuqtalaridan ekanligini inobatga olgan holda pandemiya sharoitida ham iqtisodiyotning barqaror ishlashiga tadbrikorlar va ishbilarmonlar oʻzlarining munosib hissalarini qoʻshib kelmoqdalar.

Shuningdek, murakkab sinovlarga qaramay, davlatimiz rahbari boshchiligida biznesni qoʻllab-quvvatlash, tadbirkorlar va ishbilarmonlar sonini koʻpaytirish, yangi ish oʻrinlarini yaratish uchun tizimli chora-tadbirlar koʻrildi, yetarli resurslar ajratildi, zarur sharoitlar yaratildi.

Joriy yilda ham tadbirkorlik va kichik biznesni rivojlantirish boʻyicha yanada keng imkoniyatlar yaratilib, pandemiya davrida muammolarga duch kelgan tadbirkorlarning oʻz faoliyatlarini tiklab olishlari uchun ularga koʻmak berish izchil davom ettirilmoqda.

M.Urazbayev, Tadbirkorlarning jamoatchilik kengashi kotibi.