Amudaryoda emlash rejasiga kiritilgan aholining 21,4 foizi emlandi

Aholining joriy etilgan karantin qoidalariga rioya etmasliklari, oʻrnatilgan tartib-intizomga bepisandlik bilan qarashi natijasida COVID-19 kasalligiga chalinish holatlari kundan-kunga kupaymoqda. Qasallik bilan zararlanganlarning aksariyati bemorlar bilan muloqotda boʻlib, yuqtirib olganliklari aniqlanmoqda.

Mamlakatimiz boʻylab koronavirus infektsiyasi bilan kasallanganlar soni tobora ortayotganligi tufayli kasallikka qarshi vaktsina bilan emlash ishlari yanada kuchaytirilmoqda. Aholini ommaviy emlash koronavirus tarqalishi kuchayishining oldini olishi, aholi salomatligini tiklashda asosiy vosita ekanligini insonlarga tushuntirish-targʻibot ishlari olib borilmoqda. Amudaryo tumanida ham  COVID-19ga qarshi aholini ommaviy vaktsinatsiya qilish borasida samarali ishlar qilinmoqda.

Xususan, tuman Sanitariya-epidemiologik osoyishtalik va jamoat salomatligi boʻlimi va tuman Tibbiyot birlashmasi tomonidan Oʻzbekistan Respublikasi Sogʻliqni saqlash vazirligining “Koronavirus infektsiyasiga qarshi ommaviy emlashni oʻtkazish toʻgʻrisida"gi buyrugiga asosan COVID-19 kasalligiga qarshi emlashni tashkil qilish va emlash jarayonlarini nazoratga olish shtabi tuzildi. Tumanimizda ommaviy emlash jarayonlarini oʻtkazishga davolash profilaktika muassasalarda jami 23 ta emlash brigadalari, shundan 10 tasi statsionar va 13 tasi mobil brigadalar tashkil qilindi. Tashkil qilingan brigadalarga aholini COVID-19 kasalligiga qarshi sifatli va xavfsiz emlash jarayonini amalga oshirish boʻyicha tajribali mutaxassislar biriktirildi.

Vaktsinatsiyani ommaviy tarzda amalga oshirishni jadallashtirish maqsadida tashkil etilgan mobil brigadalar korxona-tashkilotlar xodimlarini ish joyining oʻzida emlash jarayonlarini tashkil etib kelishmoqda. Xususan, tuman IIB xodimlarini emlash ishlari boʻlimning oʻzida olib borildi. Tuman IIBda 90 nafarga yaqin xodimlar faoliyat yuritayotgan boʻlib, xodimlarning barchasi vaktsina bilan emlash jarayonlarida faol ishtirok etdilar. Xodimlarni koronavirusga qarshi emlashdan oldin ularning qon bosimlari hamda tana haroratlari mutaxassis shifokorlar tomonidan tekshirildi. Koʻrsatkichlar meʼyoriy darajada ekanligiga ishonch hosil qilingach, boʻlim xodimlari COVID-19 ga qarshi emlandi.

Koronovirus infektsiyasiga qarshi emlash maqsadida Respublikamizga olib kelingan Astra Zeneca, ZF-UZ-VAC 2001, Sputnik V vaktsinalari bilan tumanimiz aholisini kasallikka qarshi emlash ishlari olib borilmoqda.

Qayd etish kerakki, tuman aholisining 18 yoshdan oshgan, emlash rejasiga kiritilganlar soni 118 ming 545 nafarni tashkil etadi.  Shu kunga qadar ulardan 25 ming 422 nafari, yaʼni 21,4 foizida emlash oʻtkazildi.

Olimlarning taʼkidlashicha, kasallik yuqishining epidemik jarayoni zanjirini uzish uchun axolining kamida 70 foizida immunitet mavjud boʻlishi kerak. Buning uchun axolini COVID-19 ga qarshi emlash va immunitetni hosil qilish eng muhim vazifa hisoblanadi. Emlash-pandemiyani yengishdagi yagona chora ekanligini toʻgʻri anglab yetgan, oʻzi va yaqinlari salomatligiga befarq boʻlmagan yurtdoshlarimiz belgilangan tartibda koronovirus infektsiyasiga qarshi vaktsinatsiya jarayonlarida faol qatnashmoqdalar.

Shu oʻrinda yurtdoshlarimizdan belgilangan tartib-qoidalarga qatʼiy amal qilgan holda, nikob taqishlarini, antiseptik vositalardan foydalanishlarini, shaxsiy gigiyenaga rioya etib, jamoat joylarida ijtimoiy masofani saqlashlarini hamda kasallikka qarshi vaktsina bilan emlanishlarini soʻraymiz.

Shuni unutmangki, oʻz salomatligingiz va yaqinlaringiz salomatligi uchun, eng avvalo, oʻzingiz masʼulsiz!

T.Babaniyozov, Amudaryo tumani Sanitariya-epidemiologik osoyishtalik va jamoat salomatligi boʻlimi boʻlimining oliy toifali sanitariya vrachi.