Tuman Veterinariya va chorvachilikni rivojlantirish boʻlimi tomonidan uy hayvonlariga sifatli veterinariya xizmatlari koʻrsatilmoqda

1. Qishloq xoʻjaligi va uy hayvonlarini kasalliklardan himoya qilish, boshqa hududlardan yuqumli kasalliklar kirib kelishining oldini olish, yagona davlat veterinariya nazoratini amalga oshirish, veterinariya-sanitariya muammmolarini hal etish borasida tuman Veterinariya boʻlimi tomonidan samarali ishlar amalga oshirilmoqda.

Bugungi kunda Amudaryo tumani Veterinariya boʻlimida 31 nafar ishchi-xodim, shundan  26 nafar veterinariya mutaxassisi faoliyat koʻrsatib kelmoqda. Ularning 11 nafari oliy, 20 nafari oʻrta maxsus maʼlumotli mutaxassislardir. Tumandagi mavjud 49 ta ovul va mahalla hududlarida 9 ta veterinariya boʻlinmalari faoliyat kursatmokda.

Yil boshidan tuman hududidagi fermer va aholi qaramogʻida 161 ming 900  bosh yirik shoxli mol, 48 ming 496 bosh sigirlar, 104 ming 400 bosh qoʻy va echkilar, 1 mln.dan ziyod parranda, 633 bosh ot, 6,5 ming xonadonda saqlanayotgan itlarga veterinariya xizmatlari koʻrsatilmoqda. Shuningdek, hayvonlarni diagnostik tekshirish, ehtiyotdan emlash, dezinfektsiya, dezinsektsiya va deratizatsiya ishlari olib borilmoqda.

Tuman veterinariya boʻlimi tomonidan joriy yilning 8 oy davomida 35 ming 450 bosh yirik shoxli, 12 ming 787 bosh mayda shoxli mollarga brutsellyoz kasalligiga diagnostik tekshirish oʻtkazilib, emlandi. Shuningdek, hududdagi chorva mollari kuydirgi,  chechak,  korason, teri boʻrtmasi va boshqa kasalliklarga qarshi emlash ishlari olib borildi.

Quturish kasalligiga qarshi 5 ming 650 bosh itlar emlanib, shundan 978 bosh itlarga pasportlar rasmiylashtirildi. Ayni paytda ham boshqa yuqumli kasaliklarga qarshi ehtiyotdan emlash ishlari tashkil etilmoqda.

Bundan tashqari, ektoparazitlarga qarshi 163 ming 753 bosh yirik shoxli mollar, 95 ming 513 bosh mayda shoxli mollarda choʻmiltirish ishlari olib borildi. Tuman hududidgi mavjud 49 ta ovul va mahallalarda veterinariya xodimlari tomonidan profilaktik emlash tadbirlari davomida  650 ta buklet va varaqalar tarqatildi. 

Bugungi kunda tuman Tashxis markazi tomonidan hayvonlarda uchraydigan koʻplab kasalliklarga qarshi diagnostik tekshirish ishlari oʻtkazilmoqda. Mangʻit dehqon bozorida veterinariya-sanitariya ekspertiza laboratoriyasi mutaxassislari tomonidan bozorga olib kelingan qishloq xoʻjalik mahsulotlarining sotilishi ustidan doimiy nazorat ishlari olib borilmoqda.

Prezidentimizning 2006-yil 23-martdagi hamda 2008-yil 23-apreldagi tegishli Qarorlarining ijrosini taʼminlash maqsadida 11 ta zooveterinariya punktlariga qarashli sunʼiy urugʻlantirish shoxobchalari,  hududiy “Nasl xizmat” masʼuliyati cheklangan jamiyati tomonidan 16 ta sunʼiy urugʻlantirish nuqtalari tashkil etilgan boʻlib, bugungi kunda ular toʻliq faoliyat yuritib kelmoqda.

Veterinariya tadbirlarini amalga oshirish uchun 53 ta chorvachilik, 8 ta parrandachilik fermer xoʻjaliklari va aholi qaramogʻidagi qoramollar uchun ovul hamda mahallalar bilan shartnomalar tuzilib, shu asosda veterinariya xizmatlari amalga yoʻlga qoʻyilgan. Tumandagi mavjud 1 ta zamonaviy kurinshdagi avtomatlashtirilgan kushxonada veterinariya mutaxassislari nazorati ostida shu kungacha 3 ming 15 bosh qoramollar goʻsht uchun soʻyildi.

Sohani rivojlantirish va veterinariya xizmati koʻrsatish darajasini yaxshilash maqsadida Qoraqalpogʻiston Respublikasi Veterinariya qoʻmitasi va tuman hokimligi tomonidan tuman Veterinariya boʻlimi xodimlariga 7 ta xizmat mototsikli, 25 ta maxsus kiyim, 14 ta termojamlama, 25 ta veterinariya sumkasi va 19 ta xizmat velosipedlari berildi.   

Tuman veterinariya va chorvachilikni rivojlantirish boʻlimi mutaxassislari tomonidan qishloq xoʻjalik va uy hayvonlari orasida uchraydigan yuqumli, yuqumsiz va parazitar kasalliklarning oldini olish, aholini sifatli chorvachilik mahsulotlariga boʻlgan ehtiyojini qondirish boʻyicha veterinariya xizmati oʻz xissalarini qoʻshib kelmoqda.  

A.Matkarimov, tuman Veterinariya va chorvachilikni rivojlantirish boʻlimi boshligʻi.