«ShIRIN BULOQ»LIK PAXTAKORLARNING HOSIL XIRMONI 250 TONNADAN OShDI

Kuzning quyoshli kunlarini gʻanimat bilib, paxta yigʻim-terim mavsumini kun sayin avj oldirayotgan fermer xoʻjaliklari ijarachilar va koʻngilli hasharchilar yordamida birin-ketin shartnomaviy rejalarini ado etib, majburiyat hisobiga paxta topshirishmoqda.

Tumanimizning Xizr eli mahallasi aholisi esa hududdagi fermer xoʻjaliklari ijarachi-dehqonlariga paxta yigʻim-terimida yaqindan yordam berishmoqda. Mahalla hududidagi “Shirin buloq” fermer xoʻjaligi dalalarida har kuni 200 nafarga yaqin koʻngilli hasharchilar yigʻim-terimda ijarachilar bilan bir safda mehnat qilishmoqda.

“Shirin buloq” fermer xoʻjaligi nafaqat Qilichboy hududida, balki Amudaryo tumanidagi ilgʻor paxtachilik  xoʻjaliklaridan biri hisoblanadi. Nodirbek Allaberganov rahbarligidagi mazkur fermer xoʻjaligi dehqonlari joriy dehqonchilik yilida 90 gektar yerga chigit ekdilar.

Xoʻjalik dalalariga chigit oʻz vaqtida, sifatli qilib ekilgach, gektarlarda bir tekis nihol olindi. Bahorgi, yozgi agrotexnik tadbirlarga alohida eʼtibor qaratildi. Ayniqsa, gʻoʻza yaganasi, begona oʻtlardan tozalash, sugʻorish, oziqlantirish va chilpish ishlariga alohida eʼtibor qaratildi. Mavsum davomida qilingan fidokorona mehnat oʻz samarasini berdi, dalalarda moʻl hosil toʻplandi va oʻz vaqtida, sifatli amalga oshirilgan gʻoʻza defoliatsiyasi tufayli dalalarda pishib-yetilgan koʻsaklar qiygʻos ochildi.

“Amudaryotex” klaster koronasi bilan tuzilgan shartnomaga koʻra, 182 tonna yuqori sifatli sanoat xom ashyosini yetishtirish belgilandi. Paxta yigʻim-terimini koʻtarinki kayfiyatda boshlagan xoʻjalik paxtakorlari yigʻim-terim mavsumining dastlabki kunlaridanoq shartnomaviy rejalarini sharaf bilan ado etdilar.

Ayni kunlarda majburiyat hisobiga paxta topshirishayotgan “Shirin buloq”lik paxtakorlar rejadagidan 68 tonna ziyod, yuqori sifatli paxta topshirishib, fermer xoʻjaligining umumiy hosil xirmonini 250 tonnaga yetkazdilar.

“Amudaryo tex” klaster korxonasi rahbari Bozorboy Safarboyev va Xizr eli mahalla fuqarolar yigʻini raisi Otabek Toʻrayevlar “Shirin buloq” fermer xoʻjaligi dalalarida boʻlishib, yigʻim-terimda ishtirok etayotgan ijarachi-dehqonlar va Xizr eli mahalla fuqarolar yigʻinining bir guruh koʻngilli hasharchilari bilan uchrashdilar.

Pensioner, lekin yoshlar bilan bab-baravar paxta terayotgan Xizr elilik onaxonlarga paxtakorlar mehnatini yengillashtirib, qoʻl-qanot boʻlayotganliklari uchun minnatdorchilik bildirishdi. Kuniga 150-180 kilodan paxta terib, fermer xoʻjaligi xirmoniga munosib hissalarini qoʻshayotgan ilgʻor terimchilardan Tozagul Ortiqovaga televizor, Darmonjon Abdullayevaga suv qaynatgich, Venera Menojevaga duxovka sovgʻa qildilar.

Oʻz navbatida halol va fidoyi mehnatlari ragʻbatlantirilgani uchun ijarachi va koʻngilli hasharchi-terimchilar “Amudaryo tex” klaster korxonasi rahbari Bozorboy Safarboyevga va Xizr eli mahalla fuqarolar yigʻini raisi Otabek Toʻrayevlarga oʻz minnatdorchilik izhor etishib, tumanimizning yuksak hosil xirmonini bunyod etishga oʻzlarining munosib hissalarini qoʻshajaklarini bildirdilar.

Robiya YOʻLDOShEVA.