Tadbirkorlik sohasidagi yangi qonun hujjatlari mazmun-mohiyati tushuntirilmoqda

Mamlakatimizda iqtisodiyotni uzoq muddatli rivojlantirish borasida keng koʻlamli islohotlar amalga oshirilayotgan boʻlib, bunda samarali soliqqa tortish tizimi va davlat soliq xizmati organlarining uygʻunlashgan faoliyati muhim ahamiyat kasb etadi. Soʻnggi yillarda Prezident tashabbusi bilan sohada yangi islohotlar amalga oshirilib, soliq tizimida tadbirkorlik faoliyatini rivojlantirishga toʻsiq boʻlayotgan barcha omillar bartaraf qilinmoqda.

Koronavirus pandemiyasi davrida umumiy ovqatlanish va turizm sohalarida faoliyat yuritayotgan tadbirkorlik subektlarini qoʻshimcha ravishda qoʻllab-quvvatlash, shuningdek, tadbirkorlarning muammo va takliflarini bevosita oʻrganish hamda tadbirkorlikni kelgusida rivojlantirishning asosiy yoʻnalishlarini belgilab olish boʻyicha oʻtkazilgan Oʻzbekiston Respublikasi Prezidentining tadbirkorlar bilan ochiq muloqotida bu borada qator yangi vazifalar belgilab berildi. Shu maqsadda imzolangan Oʻzbekiston Respublikasi Prezidentining “Umumiy ovqatlanish va turizm sohalarini qoʻllab-quvvatlashning qoʻshimcha chora-tadbirlari toʻgʻrisida”gi qarori bu boradagi ishlarni yangi bosqichga koʻtarmoqda.

Amudaryo tumani Davlat soliq inspektsiyasi xodimlari  mazkur hujjat mazmun-mohiyatini tumandagi tadbirkorlarga keng turda tushuntirish maqsadida targʻibot-tashviqot ishlarini olib bormoqdalar. Masʼullar tumandagi qator umumiy ovqatlanish shoxobchalariga borib, tadbirkorlarga qarorda belgilangan qator imtiyozlar xususida keng koʻlamli maʼlumotlar berdilar.

Aytish kerakki, mazkur qaror bilan 2021-yilning 1sentyabridan boshlab, 21-dekabrga qadar umumiy ovqatlanish korxonalari yuridik shaxslardan olinadigan yer soligʻi va yuridik shaxslarning mol-mulkiga solinadigan soliqni toʻlashdan ozod qilinishi, umumiy ovqatlanish korxonalariga mahalliy davlat hokimiyati organlariga ariza yubormasdan turib, soliq organlarini xabardor qilgan holda aylanmadan olinadigan soliq, foyda soligʻi, suv resurslaridan foydalanganlik uchun soliq, yuridik shaxslardan olinadigan yer soligʻi, yuridik shaxslarning mol-mulkiga solinadigan soliq va yigʻimlar boʻyicha 2021-yil 15-avgust holatiga koʻra mavjud qarzdorlikni, shuningdek, barcha soliqlar boʻyicha jarima va penyalarni 2022-yil 1-yanvardan 1-iyulga qadar foizlarni undirmasdan teng miqdorlarda kechiktirib, yaʼni boʻlib-boʻlib toʻlash huquqi berililishi 2023-yil 1-sentyabrga qadar turistik yigʻimni hisoblash va toʻlash toʻxtatililishi belgilab qoʻyilgan.

Maʼlumki, yurtimizda koronavirus pandemiyasi sharoitida tadbirkorlarga keng imtiyoz va imkoniyatlar berilib, ularning samarali faoliyat olib borishlariga sharoitlar yaratib kelinmoqda. Tadbirkorlarimiz ushbu imtiyozlardan samarali foydalangan holda faoliyatlarini yanada kengaytirmoqdalar. Bu esa oʻz navbatida mamlakatda  kambagʻallikni qisqartirish, band boʻlmagan aholi qatlamini ish bilan taʼminlashga xizmat qilmoqda. Tadbirkorlarni qoʻllab-quvvatlash orqali ogʻir sinovli kunlarda mamlakat iqtisodiy hayotida yuzaga kelishi mumkin boʻlgan salbiy holatlarning oldi olinmoqda.

Tumanimizda ham samarali faoliyat yuritib kelayotgan, aholi bandligini taʼminlashda oʻzining munosib hissasini qoʻshib kelayotgan tadbirkorlar soni tobora ortib bormoqda. Tuman davlat soliq inspektsiyasi masʼullari tadbirkorlarga yangi imtiyoz va imkoniyatlar haqida tushunchalar berish barobarida ularning bu boradagi savollarga aniq javoblar keltirdilar.

Taʼkidlash kerakki, masʼullarning qabul qilinayotgan qonun hujjatlari mazmun-mohiyatini tadbirkorlarga oʻz vaqtida tushuntirishi, ular yuzasidan targʻibot-tashviqot ishlarini tashkil etishlari tumanimizda tadbirkorlikni yanada rivojlantirishga hissa qoʻshadi.

Charos Arslonova.