KORRUPTsIYaGA QARShI KURAShISh VA YoShLARNI HARBIY VATANPARVARLIK RUHIDA TARBIYaLAShGA BAGʻIShLANGAN KENGAYTIRILGAN YIGʻILISh OʻTKAZILDI

Hozirgi kunda korruptsiyaga qarshi kurashish – kunning eng dolzarb  va muhim vazifasi boʻlib qoldi. Ushbu illatga qarshi nafaqat bizning mamlakatimizda, balki dunyodagi barcha mamlakatlarda keskin va murosasiz kurash olib borilmoqda.

Davlatimiz mustaqilikka erishgach, korruptsiyaga qarshi kurash doirasida koʻplab normativ-huquqiy hujjatlar, dasturlar qabul qilinib, shu asosda keng qamrovli ishlar, korruptsiyaga qarshi kurashish va uning oldini olishga qaratilgan tushuntirish-targʻibot tadbirlari, huquqiy-maslahat uchrashuvlari amalga oshirilib kelinmoqda.

9-dekabr kuni Xalqaro korruptsiyaga qarshi kurashish kuni munosabati bilan tuman madaniyat markazi binosida mutasaddi tashkilotlar rahbarlari va xodimlari ishtirokida boʻlib oʻtgan kengaytirilgan yigʻilishda ham ushbu illatga qarshi kurashishda davlat organlari va tashkilotlari  tomonidan aholining, ayniqsa oʻsib kelayotgan yosh avlodning huquqiy ongi va huquqiy madaniyatini yuksaltirishga, shu bilan birga jamiyatda korruptsiyaga qarshi murosasiz munosabatni shakllantirishga qaratilgan maʼruzalar oʻqilib, fikr-mulohazalar bildirildi.

Yigʻilishda Amudaryo tumani xalq taʼlimi boʻlimi, Davlat Xavfsizlik xizmati, Mudofaa ishlari boʻlimi va tumandagi umumtaʼlim maktablarining direktorlari, oʻqituvchilar ishtirok etdilar.

Yigʻilishni Amudaryo tumani Xalq taʼlimi boʻlimi mudiri Akmal Ismoilov kirish soʻzi bilan ochib, yigʻilganlarni kun tartibidagi masalalar bilan tanishtirib oʻtdi hamda tuman xalq taʼlimi boʻlimi tomonidan korruptsiyaga qarshi kurashish borasida amalga oshirilayotgan huquqiy-tarbiyaviy ishlarga batafsil toʻxtaldi.

Yigʻilishda Oʻzbekiston Respublikasining “Korruptsiyaga qarshi kurashish toʻgʻrisida”gi Qonuni mazmun-mohiyati toʻgʻrisida maʼruza qilindi. Jumladan, mazkur Qonun 6 bob, 34 moddadan iborat ekanligi, korruptsiya soʻzi - shaxsning oʻz mansab yoki xizmat mavqeidan shaxsiy manfaatlarini yoxud oʻzga shaxslarning manfaatlarini koʻzlab, moddiy yoki nomoddiy naf olish maqsadida qonunga xilof ravishda foydalanishi xususida toʻxtaldi.

Soʻzga chiqqanlar “Oʻquvchi-yoshlarning diniy ekstremizm, terrorizm, turli diniy oqimlarga kirib qolishining oldini olish boʻyicha ham oʻz fikr-mulohazalarini bildirib oʻtdilar. Jumladan, tinchlik – taraqqiyot va farovonlikning asosiy omili ekanligi, davlatimiz taraqqiyot yoʻlida qanday ulkan, boshqalarning havasini tortadigan yutuq va marralarga erishgan boʻlsa, barchasining negizi yurtimizdagi tinch va osuda hayot, millatlar va fuqarolararo totuvlik, oʻzaro mehr-oqibat va hamjihatlikni asrab-avaylab kelayotganimizda ekanligi taʼkidlab oʻtildi.

Yigʻilishda Amudaryo tumani Mudofaa ishlari boʻlimi boshligʻi yoshlarni milliy gʻoya va Vatanga sadoqat ruhida tarbiyalash borasida amalga oshiriladigan ishlar xususida maʼruza qildi.

Ushbu tadbirda yosh avlodni turli yot illatlardan himoyalash, ularni Vatanga muhabbat, milliy va umuminsoniy qadriyatlarga hurmat ruhida tarbiyalashda taʼlim muassasalarining oʻrni beqiyos ekanligini, bunda oʻquvchi-yoshlar oʻrtasida targʻibot-tashviqot ishlarini samarali tashkil qilish, mavzuga doir uchrashuvlar va davra suhbatlari, dunyodagi siyosiy vaziyat boʻyicha videoroliklar namoyishlarini tashkil qilish kerakligi boʻyicha tavsiyalar berildi.  

Muzokaralarda ishtirok etgan 40-sonli umumiy oʻrta taʼlim maktabi direktori Sanobar Xoʻjamurotova, 22-sonli maktab direktori Azim Bekberganov, 21-sonli maktab direktori T.Doschanov, 18-sonli maktab direktori vazifasini vaqtincha bajaruvchi S.Yeshboyeva, 46-sonli maktabning ChQBT rahbari A.Yeshimbetovlar muhokama etilgan masalalar boʻyicha oʻz taklif va tavsiyalarini berdilar.

Robiya YOʻLDOShEVA.