OʻZBEKISTON RESPUBLIKASINING ITALIYaDAGI FAVQULODDA VA MUXTOR ELChISI TUMANIMIZGA TAShRIF BUYuRDI

Joriy yilning 14-dekabr kuni Oʻzbekiston Respublikasining Italiyadagi Favqulodda va Muxtor elchisi Otabek Akbarov Amudaryo tumaniga tashrif buyurdi. 

Elchi Amudaryo tumani hokimi Sultonboy Yoʻldashev tomonidan kutib olindi va Amudaryo ustiga qurilayotgan koʻprik va temir yoʻl qurilishi ishlarining borishi bilan tanishdi. Shuningdek, elchi tumanda investitsiya dasturi doirasida amalga oshirilayotgan loyihalar bilan tanishish maqsadida “Amudaryo tomorqa xizmati” MChJ tomonidan tashkil etilgan tomorqachilik klasteri va “MANGIT XOLODILNIK” MChJning muzlatgichli omborxona loyihalarini koʻzdan kechirdi.

Shu kuni tuman hokimligi majlislar zalida tomonlar va salohiyatli tadbirkorlar ishtirokida uchrashuv oʻtkazildi. Unda tumanning asosiy iqtisodiy koʻrsatkichlari, investitsion salohiyati, amalga oshirilayotgan hamda istiqbolli loyihalar toʻgʻrisida taqdimot oʻtkazildi.

Taqdimotda tuman hokimi oʻrinbosari, investtsiyalar va tashqi savdo boʻlimi rahbari Rashid Salayev loyihalar haqida batafsil maʼlumot berdi. Shuningdek, tomonlar tumanda intensiv bogʻlar tashkil qilish, meva-sabzavotni qayta ishlash kabi loyihalarni amalga oshirish uchun mavjud sharoitlarni inobatga olib, investorlarni jalb qilish masalasini ham muhokama qildilar.

Tashrif davomida elchi tumandagi tadbirkorlik subʼektlari bilan qishloq xoʻjaligi mahsulotlarini qayta ishlash orqali djem, pyure, sharbat ishlab chiqarish kabi loyihalarni amalga oshirish boʻyicha ogʻzaki kelishuvlarga erishildi.

Hozirda ushbu loyihalarni amalga oshirishda xorijiy investorlar aniqlanmoqda.

Shuni alohida taʼkidlash kerakki, oʻtgan yilning 23-dekabr kuni ham Prezidentimiz Shavkat Mirziyoyev tashabbusi bilan hududlarning investitsiya va eksport salohiyatini oshirish, yangi eksport bozorlarini topish boʻyicha amaliy yordam koʻrsatish maqsadida Oʻzbekiston Respublikasining Singapurdagi Favqulodda va Muxtor elchisi Qaxramon Shakirov, Oʻzbekiston Respublikasining Italiyadagi Favqulodda va Muxtor elchisi Otabek Akbarov, Oʻzbekiston Respublikasining Xitoy Xalq Respublikasidagi Favqulodda va Muxtor elchisi  Baxtiyor Saidovlar tashrif buyurgan edi.

Uchrashuv davomida Elchilar bilan tumanning investitsion salohiyatini va eksport koʻrsatkichlarini oshirish, aholiga ijtimoiy gumanitar yordamlar koʻrsatish va turmush sifatini oshirish boʻyicha muzokaralar olib borilgan edi.

Natijada joriy yilning mart oyida Oʻzbekiston Respublikasining Xitoy Xalq Respublikasidagi elchixonasi tomonidan tumandagi ishsiz ayollar bandligini taʼminlash va ijtimoiy yordam koʻrsatish maqsadida zamonaviy tikuv mashinalari yetkazib berildi.

Ushbu tikuv mashinalardan foydalangan holda tumandagi “Temir daftar” va “Ayollar daftari”ga kiritilgan 10 nafardan ortiq ishsiz xotin-qizlar kasbga oʻrgatilib, bandligi taʼminlandi.

Oʻylaymizki, Oʻzbekistonning Italiyadagi Favqulodda va Muxtor elchisi Otabek Akbarovning tashrifi ham tumanimiz investitsiya va eksport salohiyatini oshirishda muhim oʻzgarishlarga asos boʻladi.

Oygul RAJABOVA.