“ZOʻRAVONLIKSIZ HAYoTNI BIRGA QURAMIZ!” TADBIRI OʻQUVChI-YoShLAR VA OTA-ONALAR QALBIDAGI MEHR-MUHABBAT TUYGʻUSINI MUSTAHKAMLADI

Joriy yilning 25-noyabridan 10-dekabr sanasiga qadar Respublika Tashxis Markazi tomonidan  “Biz zoʻravonlikka qarshimiz” mavzusida seminar-treninglar tashkil qilish boʻyicha aksiya eʼlon qilindi. Bu aktsiyada maktab oʻquvchilari, pedagoglar, ota-onalar jamoasi ishtirok etib, maktab psixologlari tomonidan turli mavzularda davra suhbatlari, uchrashuvlar, seminar-treninglar oʻtkazildi. Jumladan, 70-sonli maktabda ham “Zoʻravonliksiz hayotni birga quramiz” mavzusida ochiq eshiklar kuni tashkil qilindi. Tadbirda hududdagi ota-onalar, mahalla faollari, pedagoglar va maktab oʻquvchilari ishtirok etdilar.

“Ochiq eshiklar kuni” tadbiri 4-sinf oʻquvchilari tashkil etgan “Bolalarga bering dunyoni!” mavzusidagi koʻrgazma bilan tanishishdan boshlandi. Koʻrgazma oʻquvchilarning qoʻl mehnatlarini, ayniqsa tabiatga boʻlgan munosabatini keng yoritib berdi. Oʻquvchilar koʻrgazmada oʻzlari yasagan turli xildagi qushlar uchun uyalar, uy hayvonlariga uychalar,  aqlli robotlar va boshqa buyumlarni namoyish etdilar.

Ushbu koʻrgazmani tashkil etishdan maqsad, oʻsib kelayotgan yosh avlodni tabiatga, ona Vatanga, ota-onaga mehr-muhabbat ruhida tarbiyalashdan iborat.

Shundan soʻng, ingliz tili fani oʻqituvchisi Oʻgʻiljon Gaipova xorijiy tillar toʻgaragi faollari bilan ochiq dars tashkil qildi. ochiq darsda oʻquvchilar dunyo xalqlari hayoti, turli mamlakatlardagi bolalar huquqlarini himoya qilish boʻyicha maʼlumotlar bilan tanishdilar.

Soʻngra “Zoʻravonliksiz hayotni birga quramiz!” shiori ostida kengaytirilgan tadbir ham tashkil qilindi. Tadbirni maktabning maʼnaviy-maʼrifiy ishlar boʻyicha direktor oʻrinbosari Gulimboy Yusupov ochib berdi. Mahalla faollaridan Sayyora Rajabova soʻzga chiqib, “Biz zoʻravonlikka qarshimiz” aksiyasi doirasidagi tadbir uchun yaxshi mavzu tanlanganligi, asosan ota-onalarning taklif qilinib, bunday tadbirda ishtirok etishi farzandlari bilan ota-onalar oʻrtasidagi mehr-muhabbatning yana ham mustahkamlashini taʼkidladi.

Tadbirda 1-sinf oʻquvchilari sahnalashtirgan “Sholgʻom” ertagi namoyish etilib, kuch birlikda ekanligini tadbir ishtirokchilariga oʻz ijrolari orqali sahnada koʻrsatib berdilar.

Shundan soʻng, maktab psixologi tomonidan “Qalamlar” ertagi ifodali oʻqib eshittirildi. Tadbir soʻnggida “Ibrat” hikoyasi ham oʻqib eshittirildi va ikkala hikoya yuzasidan oʻquvchilarning va ota-onalarning fikrlari tinglandi.

Tadbirni tashkil qilishdan maqsad - har qanday yomon illatlarning oldini olish, oʻquvchilarga mehr-tuygʻusini singdirish, kechirimli boʻlishni oʻrgatishdan iborat. Shunday ekan, azizlar, keling, zoʻravonlikka yoʻl bermaylik, bir-birimizdan mehr-muhabbatimizni ayamaylik!

M.XALILLAYeVA.