Qoraqalpogʻistonda Hosil bayrami keng nishonlandi

19-dekabr kuni Nukus shahridagi Otchopar maydonida Qishloq xoʻjaligi xodimlari kuni keng nishonlanib, Hosil bayrami oʻtkazildi. Bayram tadbirida qoraqalpogʻistonlik dehqon va fermerlar, qishloq xoʻjaligi sohasi faollari, keng jamoatchilik vakillari ishtirok etdi. Tadbirda Qoraqalpogʻiston Respublikasi Joʻqorgʻi Kengesi Raisi Murat Kamalov ishtirok etib, el dasturxoni toʻkinligiga hissa qoʻshayotgan soha xodimlarini bayram bilan tabrikladi.

Hosil bayrami oʻtkazilgan Otchopar maydonining kirish qismida har bir shahar va tumanlarning, vazirliklarning maxsus qora uylari tiklanib, dehqonlarimiz yetishtirgan mahsulotlar koʻrgazmasi tashkil etildi.

Bayram tadbirida amudaryolik qishloq xoʻjaligi sohasi xodimlari ham faol ishtirok etdilar.

Tumanimiz dehqon va fermerlari bu yil ham barcha qishloq xoʻjaligi ekinlaridan moʻl hosil olib, yuksak xirmonlar bunyod etdilar. Joriy qishloq xoʻjaligi yilini ham amudaryolik paxtakor va gʻallakorlar, pillakor-u chorvadorlar, qoʻyingki, qishloq xoʻjaligining barcha tarmoqlari vakillari mehnatdagi yutuqlari sababli yorugʻ yuz bilan yakunlab, kelgusi yilgi moʻl hosil uchun puxta taraddud koʻrmoqdalar.

Bu yilgi ilk hosil xirmonini koʻtargan pillakorlarimiz shartnomaviy rejadagi 221 tonna oʻrniga 223,7 tonna yuqori sifatli hosil olib, bu boradagi rejani 101,2 foizga ortigʻi bilan ado etdilar.

Gʻallakorlarimiz esa 3800 gektar maydonda boshoqli don yetishtirib, 9 500 tonnadan ortiq "qirmizi don" hosilini davlat omborlariga topshirdilar.

Paxtakorlarimiz rejadagi 45 750 tonna oʻrniga 45 800 tonnaga yaqin paxta hosilini yigʻib-terib olib, mehnat zafariga erishdilar.

Tumanimizda Qoraqalpogʻiston Respublikasidagi eng salmoqli “oq oltin” xirmoni birinchilar qatorida boʻy tiklab, dehqon va fermerlarimiz masʼuliyati cheklangan jamiyat shaklidagi “Amudaryotex” xorijiy korxonasi klasteri bilan tuzilgan shartnoma shartlarini ortigʻi bilan bajardilar.

Qolaversa, amudaryolik fidoyi dehqon va fermerlar, tomorqachilar meva-sabzavot hamda poliz ekinlaridan ham moʻl hosil olib, xalqimiz dasturxonining toʻkinligi va bozorlarimizda narx-navoning barqaror boʻlishiga zamin yaratdilar.

Shuningdek, chorvachilik va parrandachilik, asalarichilik hamda boshqa sohalarda ham yirik loyihalar amalga oshirilib, xalqimizni goʻsht, sut, tuxum, asal va boshqa zarur kundalik isteʼmol mollari bilan taʼminlashda ham soha xodimlari fidoyilik namunalarini koʻrsatib, mehnat qildilar.

Bir soʻz bilan aytganda, Amudaryo tumani qishloq xoʻjaligi sohasi jonkuyarlari oʻzlarining halol va barakali mehnati bilan Qoraqalpogʻiston Respublikasi va mamlakatimiz miqyosida yuksak natijalarga erishdilar.

Bayramning asosiy tomosha maydonida arqon tortish, ot choptirish, kurash musobaqalari boʻlib oʻtdi. Arqon tortishda Chimboy tumani vakillari 1-oʻrinni qoʻlga kiritgan boʻlsa, kurash bahslarida shumanaylik Zarapat polvonning qoʻli baland kelib, bosh sovrin - Gentra avtomobili bilan taqdirlandi. Chavandozlar esa Otchopar maydonini 5, 7, 10 aylanish boʻyicha kuch sinashdilar. Murosasiz kechgan musobaqalarda toshkentlik chavandoz gʻolib chiqdi.

Tadbir davomida qishloq xoʻjaligida yuqori natijalarga erishgan dehqon va fermerlar, bogʻbonlar, chorvador va pillakorlar, suvchilar va irrigatorlar, agronom va mexanizatorlar, agroklasterlar rahbarlari hamda ishchi-xodimlariga qimmatbaho sovgʻalar topshirildi.

Amudaryo tumani hokimligining axborot xizmati