Yuridik xizmat koʻrsatish markazi faoliyati kengaymoqda

Mamlakatimizda davlat organlari va tashkilotlariga yuridik xizmat koʻrsatish faoliyatini yanada takomillashtirish, ular faoliyatini, ayniqsa, quyi boʻgʻinda huquqiy jihatdan taʼminlash, sifatli va professional yuridik xizmat koʻrsatishga qaratilgan islohotlar bosqichma-bosqich amalga oshirib kelinmoqda. Sohaga tajribali  kadrlarning jalb qilinmaganligi hujjatlar loyihalarining iqtisodiy, moliyaviy va huquqiy ekspertizadan oʻtkazilishi sifatiga salbiy taʼsir koʻrsatayotgan edi. Bu oʻz navbatida qabul qilinayotgan hujjatlar yuzasidan joylarda jismoniy va yuridik shaxslarning eʼtiroziga sabab boʻlayotgan edi.

Prezidentimizning tegishli qaroriga koʻra, 2021-yil 1-oktyabrdan boshlab, Qoraqalpogʻiston Respublikasi Adliya vaziriligi, viloyatlar va Toshkent shahar Adliya boshqarmalari huzurida mamlakatimizning barcha tuman va shaharlarida yuridik xizmat koʻrsatish markazlari faoliyati yoʻlga qoʻyildi.

Ushbu markazlar zimmasiga yuridik xizmat koʻrsatiladigan davlat organlari va tashkilotlari faoliyatini  huquqiy jihatdan taʼminlash, ularga malakali yuridik yordam koʻrsatish, davlat tashkilotlari xodimlarining huquqiy savodxonligi va huquqiy madaniyatini oshirish, davlat tashkilotlarining mulkiy hamda boshqa huquqlari va qonuniy manfaatlari oʻz vaqtida samarali himoya qilinishini taʼminlash, davlat tashkilotlari tomonidan qabul qilinayotgan hujjatlarning qonuniy hamda  har tomonlama puxta va sifatli boʻlishini taʼminlash kabi koʻplab masʼuliyatli vazifalar yuklangan.

Shuningdek 2021-yil 1-oktyabrdan boshlab davlat tashkilotlariga yuridik xizmat koʻrsatish bilan bogʻliq  barcha maʼlumot va jarayonlarni toʻliq elektron ravishda yigʻish, qayta ishlash, tahlil qilish imkonini beruvchi “Ye-huquqshunos” elektron tizimini yaratish va unga barcha maʼlumotlarni joylab borish yuklatildi. Qoraqalpogʻiston Respublikasi Adliya vazirligi huzurida tashkil etilgan  Amudaryo tuman Yuridik xizmat koʻrsatish markazida ham qaror ijrosini taʼminlash, belgilab berilgan masʼuliyatli vazifalarni ado etish yuzasidan tizimli ishlar olib borilayapti.

Markaz tomonidan tumandagi  mavjud 12 ta davlat organlari va tashkilotlariga sifatli yuridik xizmat koʻrsatilmoqda. Bunda davlat organlari va tashkilotlari bilan markaz oʻrtasida hujjatlar maʼlumotlar almashinuvi “Ye-huquqshunos” tizimi orqali amalga oshirilayotir. Oʻtgan davr mobaynida  12 ta davlat organlari va tashkilotlarida yuridik ahamiyatga ega boʻlgan hujjatlar loyihalarini huquqiy ekspertizadan oʻtkazish jarayonida 166 ta hujjat qonunga zid ekanligi aniqlanib, muvofiqlashtirildi. 17 hujjat umuman qonunlarimizga mos kelmaganligi uchun huquqiy ekspertizadan oʻtkazish rad etildi, tuman Tibbiyot birlashmasida 12 nafar xodimning ishdan boʻshalatilishining oldi olindi.

Shuningdek, aholidan tushgan 2 ta murojaat ham koʻrib chiqilib, huquqiy yordam berildi.

Kelgusi 2022-yilda markaz huquqiy xizmat koʻrsatadigan davlat organlari va tashkilotlari soni yana 6 taga koʻpaymoqda. Bu markazda faoliyat koʻrsatayotgan 6 nafar xodimlarga yana ham ulkan masʼuliyat yuklaydi.

Oygul RAJABOVA.