“UMID NIHOLLARI - 2022” SPORT MUSOBAQASINING TUMAN BOSQIChI YaKUNLANDI

Mamlakatimizda muhtaram Prezidentimiz Shavkat Mirziyoyev tashabbusi bilan oʻquvchi-yoshlar oʻrtasida sportni rivojlantirish, ularni ommaviy ravishda jismoniy tarbiya va sportga jalb qilishga qaratilgan tizimli ishlar amalga oshirilmoqda. Buning natijasida yoshlarimizning sportga boʻlgan qiziqishlari kundan kunga orta borib, ular sogʻlom, irodasi mustahkam, vatanimizning sodiq farzandlari boʻlib voyaga yetmoqda.

Respublikamiz miqyosida umumiy oʻrta taʼlim maktablari oʻquvchi-yoshlari orasida oʻtkazilib kelinayotgan “Umid nihollari” sport musobaqalari ham bu borada muhim ahamiyat kasb etmoqda. Ishtirokchilar uchun bayram tusini oladigan ushbu musobaqa joriy yilda ham koʻtarinki ruhda oʻtkazilmoqda.

Shu kungacha ushbu musobaqaning maktablararo, hududiy bosqichlarida sportning 11 ta turi yaʼni futbol, veleybol, basketbol, gandbol, mini futbol, stol tennisi, shaxmat va shashka, badminton, yengil atletika, stritbol, kurash, sport va badiiy gimnastika turlari boʻyicha musobaqalar oʻtkazilib, gʻoliblar aniqlandi. Musobaqalar 1-4, 5-6, 7-8 va 9-11-sinflar oʻquvchilari orasida oʻtkazildi.

Shu yilning 5-6-yanvar kunlarida “Umid nihollari - 2022” sport musobaqalarining 8 ta hududiy gʻoliblari orasida musobaqalari oʻtkazildi va ushbu bosqich gʻoliblari tuman bosqichiga yoʻllanmani qoʻlga kiritishdi. 7-yanvar kuni “Umid nihollari - 2022” sport musobaqasiniing tuman bosqichiga start berildi.

Shu kuni tumanimizdagi Bolalar-oʻsmirlar sport maktabi, 33- va 16-maktablar sport zallarida sportning stritbol, stol tennisi va kurash turlari boʻyicha musobaqalar oʻtkazilib, gʻoliblar aniqlandi.

Ushbu musobaqalarda quyi bosqichlarda gʻoliblikka erishgan mahoratli va epchil 600 nafar oʻquvchilar ishtirok etishdi. Shuning 230 nafarini qizlar tashkil qiladi. Musobaqaning gʻolib va sovrindorlari Oʻzbekiston “Yoshlik jismoniy tarbiya va sport jamiyati” Amudaryo tumani hududiy boʻlinmasining diplom va esdalik sovgʻalari bilan taqdirlandi.

“Umid nihollari - 2022” musobaqasining tuman bosqichida oʻzaro bahs olib borib, raqiblaridan ustun kelgan jamoa va oʻquvchilar ushbu sport musobaqasining final, yaʼni Qoraqalpogʻiston Respublika bosqichida qatnashish uchun yoʻllanmani qoʻlga kiritdilar.

Keyingi kunlarda ushbu musobaqaning sportning boshqa turlari boʻyicha tuman bosqichi bahslari davom ettirildi. Yuqori kayfiyatda, gʻoliblik uchun astoydil intilib, maktabi, yashash hududi sport sharafini yuqori koʻtarishga intilayotgan oʻquvchi-yoshlar uchun hayajonli kunlar davom etib, 10-yanvar kuni musobaqalar nihoyasiga yetdi, sportning 11 ta turi boʻyicha ham gʻoliblar aniqlandi.

Yoshlarda sportga boʻlgan havas va intilishni, jamiyatda sogʻlom turmush tarzi tamoyillarini yanada kuchaytirish, yosh iqtidorli sportchilarni tanlab olish, ularda professional mahorat va koʻnikmalarni rivojlantirish, sport turlari boʻyicha mamlakat terma jamoalariga sport zahirasini tayyorlash, oʻquvchi-yoshlarni sport mashgʻulotlariga uzluksiz jalb etilishini taʼminlash maqsadida hukumatimiz qabul qilgan qaroriga koʻra oʻtkazib kelinayotgan “Umid nihollari” sport musobaqalari ishtirokchilar uchun haqiqiy sport bayramiga aylanib bormoqda, yoshlar oʻzligini namoyon etadigan minbarga aylanmoqda.

Sevara Ismoilova.