MATBUOT ANJUMANI OʻTKAZILDI

27-yanvar kuni Amudaryo tumani hokimligining majlislar zalida “Yangi hududda yangi imkoniyatlar. Aholining iqtisodiy-ijtimoiy farovonligini taʼminlashga yoʻnaltirilayotgan istiqbolli loyihalar” mavzusida matbuot anjumani oʻtkazildi.

Anjumanda, tuman hokimining oʻrinbosari – investitsiya va tashqi savdo boʻlimi boshligʻi Rashid Salayev, tuman hokimligi bosh mutaxassisi Rashid Abdullayev, moliya-iqtisodiyot va kambagʻallikni qisqartirish boʻlimi bosh mutaxassisi Akbar Gulmurzayev, siyosiy partiyalarning tuman Kengashlari rahbarlari, hokimlik masʼul xodimlari hamda ommaviy axborot vositalari vakillari ishtirok etishdi.

Anjumanda dastlab Rashid Salayev Amudaryo tumanida investitsiya masalalari boʻyicha amalga oshirilayotgan ishlar toʻgʻrisida maʼlumot berdi.

Qayd etilishicha, 2022-2023-yillarda investitsiya loyihalarini amalga oshirish dasturi boʻyicha 79 ta, umumiy qiymati 458 mlrd. soʻmlik loyihalar amalga oshirilishi belgilangan. Shundan 2022-yilda qiymati 302 mlrd. soʻmlik 63 ta loyihalar amalga oshirilishi rejalashtirilgan boʻlib, 2 ming 515 ta yangi ish oʻrinlari yaratilishi koʻzlanmoqda.

Shundan soʻng kun tartibidagi masala yuzasidan tuman moliya-iqtisodiyot va kambagʻallikni qisqartirish boʻlimi bosh mutaxassisi Akbar Gulmurzayevning hisoboti tinglandi.

Akbar Gulmurzayev tumanning asosiy oʻsish nuqtasiga aylangan xizmat koʻrsatish sohasida 2022-yil uchun belgilab olingan parametrlar haqida keng turda maʼlumotlar berdi.

Maʼlumotlarga koʻra xizmat koʻrsatish yoʻnalishida umumiy qiymati salkam 54 mlrd.soʻm boʻlgan 49 ta xizmat koʻrsatish loyihalarining manzilli roʻyxati shakllantirildi hamda bundan tashqari qiymati 120 mlrd. soʻmlik 540 ta loyihalar ishlab chiqilmoqda. Ushbu loyihalarni amalga oshirish hisobiga yil yakuniga qadar 2 ming 68 nafar ishsiz fuqarolarning xizmat koʻrsatish yoʻnalishida bandligini taʼminlash koʻzda tutilgan.

Shuningdek, mahallalarda ish boshlagan hokim yordamchilarining oʻz vazifalarini amalga oshirishda foydalanadigan moliyaviy instrumentlar haqida ham tushunchalar berildi. Anjumanda hokim yordamchilari mahallasiga ajratilayotgan resurslardan samarali foydalanish yuzasidan doimiy monitoringni amalga oshirishi aytib oʻtildi. Ajratilayotgan mablablagʻlar mahalla infratuzilmasini yaxshilashga, tadbirkorlikni rivojlantirishga, aholi bandligini taʼminlashga yoʻnaltirilishi taʼkidlandi.

Anjuman yakunida jurnalistlar oʻzlarini qiziqtirgan savollar bilan tuman hokimligi mutasaddilariga murojaat qilib, tegishlicha javoblar oldilar.

Amaldagi qonunchilikka koʻra davlat hokimiyati va boshqaruvi organlarining rasmiy nashrlari, rahbarlarning, shuningdek ushbu organlar tomonidan vakolat berilgan mansabdor shaxslarning chiqishlari va bayonotlari, axborot xizmatlarining xabarlari, rasmiy veb-saytlarining materiallari va ommaviy axborot vositalarining materiallari davlat hokimiyati va boshqaruvi organlarining faoliyati toʻgʻrisidagi axborot manbalari sanaladi. Fuqarolar davlat hokimiyati va boshqaruvi organlarining faoliyati toʻgʻrisidagi ishonchli axborotni olish huquqiga egalar. Oʻtkazilgan matbuot anjumani ham fuqarolarni uman hokimligining faoliyati hamda kelgusidagi rejalari bilan tanishtirishda muhim ahamiyatga ega boʻldi.

Tuman hokimligining axborot xizmati