“QON TOPShIR – HAYoT INʼOM ET!” AKTsIYaSI DAVOM ETMOQDA

Maʼlumki, pandemiya sababli joriy etilgan karantin cheklovlari barcha sohalar qatori Sogʻlikni saqlash tizimida ham jiddiy muammolarni yuzaga keltirdi. Ayniqsa, turli qon guruhlariga boʻlgan talab oshib, tizimda yetarli qon zahirasini shakllantirishda qiyinchiliklar paydo boʻldi. Biroq hamisha mehr-oqibatli va elparvar xalqimizning begʻaraz himmati tufayli, shuningdek, turli davlat va jamoat tashkilotlari tashabbusi bilan tashkil etilayotgan begʻaraz donorlik aktsiyalari samarasi bois mamlakatimizdagi barcha sogʻlikni saqlash muassasalarida qon zahirasiga boʻlgan ehtiyoj qondirilishi uchun zamin yaratildi.

Oʻzbekiston Respublikasi Sogʻlikni saqlash Vazirligi tashabbusi bilan bolalar va katta yoshdagi bemorlar uchun begʻaraz yordam sifatida tashkil etilgan “Qon topshir – hayot inʼom et!” aktsiyasida ayni paytda yuzlab vatandoshlarimiz faol ishtirok etishib, hayotga mushtoq, xastadil insonlar qalbiga madad boʻlishmoqda.

Joriy yilning 29-mart sanasida “Qon topshir – hayot inʼom et!” aktsiyasida Amudaryo tuman Tibbiyot birlashmasining 10 nafar koʻngilli shifokor va oʻrta tibbiyot xodimlari ham ishtirok etishib, ushbu xayrli va savobli ishga munosib hissalarini qoʻshdilar.

Shuni alohida qayd etish kerakki, “Qizil yarim oy” jamiyati tomonidan tuman aholisi orasida jarrohlik amaliyotlari, gematologik xastaliklarda bemorlarga donor qoni tarkibiy qismlaridan foydalanish, donorlikni targʻib qilish borasida oʻtkazilgan “Qon topshirish – insonning insonga hadya etgan oliy darajadagi sovgʻasidir”, “Hayot hadya etish – savob ishning eng oliy ifodasi” kabi mavzularda oʻtkazilgan targʻibot tadbirlari natijasida uyushmagan aholi vakillaridan 34 nafari koʻngilli ravishda donor boʻldilar. Ularning himmati bilan tuman boʻyicha jami salkam 20 litr qon zaxirasi yaratildi.

Amudaryo tuman Tibbiyot birlashmasi huzuridagi Qon banki tomonidan bir yil davomida bemorlar uchun oʻrtacha 100 litrdan ortiq qon yigʻiladi. Shu bois, Amudaryo tuman tibbiyot birlashmasi boʻlimlarida qon zahirasi bilan bogʻliq muammolar boʻlmaydi. Qolaversa, donorlikning ahamiyati beqiyos. Oʻzini sogʻlom deb bilgan, irqi, kasbi, jinsidan qatʼiy nazar har bir inson qon va uning komponentlari uchun donor boʻla oladi.

Inson organizmi shunday moʻʼjizaki, qon topshirish uning umumiy salomatligi uchun nihoyatda foydalidir. Donorlik – inson organizmiga yangilanishni, yosharishni hadya etadi.

Shunday ekan, biz yurtdoshlarimizni “Qon topshir – hayot inʼom et!” aktsiyasida faol ishtirok etishga, ushbu savobli ishi tufayli hayot uchun kurashayotgan xastadil insonlar qalbiga mador boʻlishga chaqiramiz.

Qon topshiring va xasta koʻngillarga goʻzal hayotdan bahra olib yashashlari uchun imkon yarating!

I.Nurimbetov, Qizil yarim oy jamiyati Amudaryo tuman boʻlimi ijrochi direktori.

Rayhon Xoʻjametova, Respublika qon quyish markazi shifokori.