Tumanimizda chigit ekish ishlari boshlab yuborildi

Ayni kunlarda yurtimiz bobodehqonlari quyosh nurlarining tafti zamin uzra taralayotgan iliq kunlarda, yerning tobida yetilganidan foydalanib, daladagi ishlarini hamjihatlikda, tezkorlik bilan olib borishmoqda.

Yerdan moʻl va sifatli hosil yetishtirishda agrotexnik tadbirlarni oʻz vaqtida, maromiga yetkazib bajarish, mavjud resurslar, mineral va mahalliy oʻgʻitlar hamda suvdan unumli foydalanish muhim ahamiyat kasb etadi.

Ayniqsa, aprel oyi paxtakorlarimiz uchun chigit ekish va toʻliq koʻchat olishdek masʼuliyatli tadbirlari bilan gʻanimat davr sanaladi. Shu maqsadda ayni kunlarda barcha fermer xoʻjaliklari bahorning iliq kunlaridan unumli foydalangan holda ekish ishlariga kirishmoqdalar.

Bu borada oldinda turgan muhim vazifalar va joriy qishloq xoʻjaligi yilining oʻziga xos jihatlari haqida dehqon va fermerlarga tushunchalar berish maqsadida 1-aprel kuni Amudaryo tumanida koʻrgazmali seminar tashkil qilindi.

Seminarda Qoraqalpogʻiston Respublikasi Vazirlar Kengashi Raisi Qahramon Sariyev, Oʻzbekiston Respublikasi Qishloq xoʻjaligi raisining 1-oʻrinbosari Shuhrat Teshayev, Qoraqalpogʻiston Respublikasi Vazilar Kengashi Raisining oʻrinbosari Daryabay Qaypov hamda Qoraqalpogʻiston Respublikasi prokurori Farhod Allamberganov, shuningdek, sohaga aloqador vazirlik va muassasalar masʼullari ishtirok etdi.

Mehmonlar tuman hokimi Sultonboy Yoʻldashev, sektor rahbarlari hamda qishloq xoʻjaligi masʼullari hamrohligida tumanimizning Tosh yop ovuli hududida joylashgan “Bekman Allaberganov” fermer xoʻjaligida boʻlib, chigit ekish boʻyicha koʻrgazmali seminarda qatnashishdi.

Seminar avvalida Qoraqalpogʻiston Respublikasi Vazirlar Kengashi Raisi Qahramon Sariyev chigit ekish ishlarini qisqa muddatlarda va uyushqoqlik bilan yakunlash, chigitni maqbul muddatlarda, tez va sifatli ekib, tekis nihol olishga erishish – moʻl hosil yetishtirishning garovi ekanini taʼkidlab oʻtdi.

Darhaqiqat, chigit belgilangan muddatlarda ekilsa, ertagi, bir tekis va sogʻlom koʻchat olinadi. Bunga urugʻ yumshoq, nam va harorati yetarli boʻlgan tuproqqa qadalgan paytdagina erishiladi.

Shuningdek, seminar davomida Oʻzbekiston Respublikasi Qishloq xoʻjaligi vazirining 1-oʻrinbosari Shuhrat Teshayev tomonidan qishloq xoʻjaligi mutaxassislariga chigit ekishda eʼtibor qaratish lozim boʻlgan muhim jihatlar haqida batafsil maʼlumotlar berildi. Mutaxassislar chigit ekish ishlarini qisqa muddatlarda va sifatli yakunlash, ekin moslamalarini rostlash, yerni ekishga tayyorlash kabi muhim masalalar boʻyicha zarur tavsiyalar berdilar.

Maʼlumot uchun aytib oʻtish kerakki, tumanda 2022-yil paxta hosili uchun 352 ta fermer xoʻjaliklarining 13 ming 900 gektar maydoniga chigit ekiladi. Urugʻlik chigitlari fermer xoʻjaliklarga 16 ta chigit tarqatish shaxobchalari tomonidan yetkazib beriladi. Tuman boʻyicha chigit ekish uchun 37 mlrd 421 mln. soʻmlik moddiy resurslar zarur boʻlib, bu xarajatlar toʻliq moliyalashtirilgan.

Seminarning nazariy qismi yakunlangach, mehmonlar va nuroniy otaxonlar ishtirokida “Bekman Allaberganov” fermer xoʻjaligining dalasiga chigit sochildi. Dalada chigit ekish amaliyoti namoyish qilinib, bu borada muhim tavsiyalar berildi.

Ushbu fermer xoʻjaligining umumiy yer maydoni 139,4 gektar boʻlib shundan 61 gektariga chigitning “Sulton” navi ekiladi. Joriy yilning kuzida ushbu fermer xoʻjaligi rahbariyati 214 tonna paxta hom-ashyosini yetishtirishni maqsad qilgan.

Seminar davomida soʻzga chiqqanlar gʻoʻza navlari olimlar belgilab bergan agrotexnik talablar darajasida ekilib, parvarishlansa hamda maʼdanli va mahalliy oʻgʻitlar bilan oʻz vaqtida oziqlantirib borilsa, albatta kutilgan natijalarga erishilishini taʼkidladi.

Aytish joizki, paxtadan yuksak xirmon bunyod etish orqali mamlakatimiz iqtisodiyoti rivojlanishi bilan birga, fermer xoʻjaliklarining iqtisodiy ahvoli yaxshilanishiga va ishchilarning moddiy manfaatdorligi oshishiga zamin yaratiladi.

Tuman hokimligning Axborot xizmati