MADANIYaT MARKAZIDA YaNGI ISTEʼDOD EGALARI YeTIShIB ChIQMOQDA
Mamlakatimizda aholi, ayniqsa olis hududlarda istiqomat qiladigan fuqarolarga madaniy dam olish xizmatlari koʻrsatish darajasini oshirish, barcha hududlarda teatr, tsirk va boshqa turdagi ommaviy-madaniy va kontsert-tomosha tadbirlarini tizimli ravishda yoʻlga qoʻyish, madaniyat va sanʼat sohasida isteʼdodli yosh ijodkorlarni izlab topish va qoʻllab-quvvatlash, isteʼdodlarini namoyon etishlariga sharoit yaratish borasidagi amalga oshirilayotgan saʼy-harakatlar oʻzining ijobiy natijalarini berayotgani quvonarlidir.
Xususan, chekka hududlardagi Madaniyat markazlari toʻgaraklarida faol ishtirok etayotgan yoshlar orasidan turli nufuzli koʻrik-tanlovlar gʻoliblari yetishib chiqmoqda, toʻgaraklar aʼzolari tomonidan muhim sanalar, qutlugʻ bayramlar munosabati bilan oʻtkazilayotgan madaniy tadbirlar, kontsert tomoshalari tobora keng qamrov kasb etmoqda.
Tumanimizning Qangli ovulida joylashgan Qangli madaniyat markazi xususida ham xuddi shunday fikrlarni bildirishimiz mumkin. Oʻtgan yillar mobaynida markaz toʻgaraklarining iqtidorli ishtirokchilaridan shakllantirilgan badiiy jamoa tumanimiz miqyosida oʻtkazilgan turli bayram tadbirlarida, koʻngilochar tomoshalarda ishtirok etishib, chiqishlari xalqimizga manzur boʻldi. Shuningdek, ular koronavirus pandemiyasi davrida onlayn oʻtkazilgan tanlovda baxshichilik, estrada qoʻshiqchiligi, rubobda kuy chalish boʻyicha gʻoliblikni qoʻlga kiritgan boʻlsalar, S.Durdiboyev “Yagonasan, muqaddas Vatan!” koʻrik-tanlovida tumanda ikkinchi oʻrinni egalladi.
Ayni kunda mazkur madaniyat markaziga Rajabboy Yeshboyev rahbarlik qilmoqda. Muassasa oʻz faoliyatini hududdagi 67-,29-, 39-, 61- va 74-sonli umumiy taʼlim maktablari bilan hamkorlikda tashkil etgan.
Ushbu taʼlim maskanlarining oʻquvchi-yoshlari madaniyat markazida faoliyat yuritayotgan milliy cholgʻulardan rubob, baxshichilik toʻgaraklari, estrada xonandaligi va gitara toʻgaraklari mashgʻulotlariga faol qatnashib, musiqa va sanʼat sohasida maktablarida olgan bilimlarini mustahkamlashmoqda. Alimjon Yeshimbetov rahbarligidagi rubob, Davronbek Yendirboyev rahbarligidagi estrada xonandaligi, Alisher Xudoyberganov rahbarligidagi gitara cholgʻusi toʻgaraklarida musiqa va sanʼat sirlarini oʻrganayotgan 35 nafar yoshlar ishtirokida yilning har choragida oʻtkazib kelinayotgan hisobot kontsertlarida soha xodimlaridan tashqari, ovul aholisi ham ishtirok etadilar va kontsert dasturini tomosha qilib, madaniy hordiq chiqaradilar.
Shuni taʼkidlash joizki, aholi, ayniqsa yoshlarning madaniy dam olishlari va boʻsh vaqtlarini mazmunli oʻtkazishlarini tizimli tashkil etishda hududlardagi madaniyat markazlarining faoliyati alohida ahamiyatga ega. Buni Qangli ovulidagi Qangli madaniyat markazi misolida ham yaqqol koʻrishimiz mumkin. Aholiga madaniy xizmat koʻrsatishni yaxshilash borasidagi qabul qilinayotgan qarorlar madaniyat markazi xodimlariga yana ham kuch-gʻayrat va ijodiy koʻtarinkilik baxsh etmoqda.
O.RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
