TUMANIMIZ GIMNASTIKAChI QIZLARI RESPUBLIKA OChIQ TURNIRI GʻOLIBI BOʻLIShDI

Mamlakatimizda bolalar sportini rivojlantirishga qaratilayotgan eʼtibor  yosh avlodning irodasini mustahkamlab, oʻz kuch va imkoniyatlariga ishonchini oshirmoqda, ularning sogʻlom boʻlib ulgʻayishiga asos boʻlmoqda.

Vaxum aholi punktidagi oʻyingohda Shahodat Rajabova murabbiylik qilayotgan badiiy gimnastika toʻgaragida hududning 50 nafarga yaqin yosh qizlari sportning ushbu nafis turi bilan shugʻullanib, koʻpgina yutuqlarni qoʻlga kiritishmoqda.

Uning tuman Bolalar-oʻsmirlar sport maktabida faoliyatini boshlaganidan beri nufuzli musobaqalarda gʻoliblikka erishgan, sovrindor boʻlgan shogirdlari koʻp. Yaqinda Toshkent shahrida  2006-2017-yillar oraligʻida tugʻilgan qizlar orasida badiiy gimnastika boʻyicha “Sport – nafislik va salomatlik manbai” shiori ostida boʻlib oʻtgan respublika ochiq birinchiligida 9 nafar shogirdlari ishtirok etib, gʻoliblik shohsupasiga koʻtarildilar. Ulardan D.Jalgʻashova, A.Muxtorova, Z.Qadamboyeva, G.Toʻraboyeva, T.Davlatboyevalar jamoaviy bahslarda birinchilikni qoʻlga kiritgan boʻlsalar, R.Alimboyeva, A.Oʻrozboyeva, U.Rajabova, M.Shuhratovalar yakkalik bahslarida tengdoshlaridan mahoratli, epchil va salohiyatli ekanliklarini namoyish etdilar. Bir-yoʻla 9 nafar shugʻullanuvchilarining aynan bir musobaqada gʻoliblikka erishgani uchun musobaqa hakamlari va tashkilotchilari Sh.Rajabovaning faoliyatiga yuksak baho berib, uni maxsus diplom va statuetka bilan taqdirladi.

– Har safar shogirdlarimni musobaqalarga olib borganimda xuddi oʻzim imtihon topshiradiganday hayajonlanaman, ular sahnaga chiqqan vaqtlarida koʻzimni uzmay kuzataman. Shukurki, mehnatlarim samarasiz ketayotgani yoʻq, – deydi Shahodat Rajabova quvonch bilan.

Biz uning kelgusi ishlarida ham muvaffaqiyatlar tilab qolamiz.

Sevara Ismoilova,

QDU talabasi.