62-SONLI MAKTABDA UCh AVLOD UChRAShUVI OʻTKAZILDI

Amudaryo tumanining Amir  Temur nomli ovulidagi 62-sonli umumtaʼlim maktabida tumandagi taniqli ustoz-ijodkorlar ishtirokidagi uch avlod uchrashuvi hamda amaliy fanlar oyligi doirasidagi tadbirlar tashkil etildi. 

19-aprel kuni boʻlib oʻtgan tadbirlarga elda taniqli va ardoqli ijodkorlar Tursunboy Abdullayev va Ahmad Nafasovlar tashrif buyurdilar. Ijodkorlar maktab oʻquvchilariga oʻzining hayotiy koʻnikmalarini, ijod sirlarini oʻquvchilarga qiziqarli tarzda soʻzlab berdi.

Ustoz-ijodkorlar hayotlari va ijodi, oʻz qalamlariga mansub nasriy va sheʼriy toʻplamlari, yangi ijod namunalari haqida oʻquvchilarga soʻzlab berdilar. Uchrashuv davomida shoir Tursunboy Abdullayev oʻzining 2021-yilda bosmadan chiqqan “1001 salom va yangi salomlar” nomli asarini ham tanishtirib oʻtdi. Muallifning ushbu asarida oʻzbek xalqining milliy urf-odatlaridan kelin salom va uning bir qancha turlari haqida aytib oʻtdi. Shuningdek, kitobdan oʻrin olgan kelin salomlarida aytiladigan turkumlardan namunalar oʻqib eshttirdi.

Ustoz-ijodkor Ahmad Nafasov taniqli salomchi Tursunboy Abdullayev hayoti va ijodiga bagʻishlab yozgan “Salomchi – mening unvonim” kitobi, uning yaratilish tarixi haqida ham maʼlumotlar berib oʻtdi. Uchrashuv maktab jamoasi va oʻquvchilarda iliq taassurot qoldirdi.

Ijodkorlar bilan oʻtkazilgan suhbatdan oʻquvchilardagi ijodga, kitobxonlikka boʻlgan qiziqish yanada oshirdi. Tadbirda maktabning 9-sinf oʻquvchisi Nazokat Rajabova, 11-sinf oʻquvchisi Mahliyo Sharipova, 10-sinf oʻquvchisi Marhabo Toʻraboyeva kabi maktabdagi havaskor shoira qizlar oʻzlarini qiziqtirgan savollarini berishdi va ijodkorlarning sheʼrlaridan namunalarni yoddan aytib, davraga joʻshqinlik baxsh etishdi.

Shundan soʻng, aprel – amaliy fanlar fan oyligi doirasida maktabning texnologiya fani oʻqituvchisi Laylo Nurmamatova 6-sinflarda “Doʻppi tikish va doʻppilarga andoza olish” mavzusida namunaviy ochiq dars tashkil qildi. Dars davomida oʻquvchilarga doʻppilarning oʻlchamini olish, tikishda foydalaniladigan iplar, ishlatiladigan choklar, tanlanadigan matolar toʻgʻrisida tushunchalar berildi. Amaliy tarzda andoza olish va chok ishlatishlar koʻrsatib berildi.

Boshlangʻich sinf oʻqituvchisi Bahor Arikova ham 1-sinfda matematika fanidan “Ikki amalli masalalar” mavzusida namunaviy dars tashkil qildi. Darslar zamonaviy uslublardan, yangi pedagogik texnologiyalardan foydalanilgan holda oʻtildi. Oʻquvchilar guruhlarga boʻlinib, oʻzlashtirilgan bilimlarni yana sinovdan oʻtkazishdi. Qiziqarli oʻtilgan mavzular oʻquvchilarga juda manzur boʻldi.

Shu kuni “Farzandimga kitob sovgʻa qilaman” aktsiyasi doirasida kitoblar koʻchma doʻkoni tashrif buyurdi. Koʻchma doʻkondagi turli mavzulardagi adabiyotlar, sheʼriy va nasriy asarlardan iborat kitoblardan har kim qiziqishiga qarab tanladi.  Oʻquvchilar va ularning ota-onalari oʻzlari yoqtirgan kitoblarni xarid qilishdi.

Ijodkorlar bilan oʻtkazilgan suhbat, qiziqarli oʻtgan ochiq oʻquv mashgʻulotlari, turfa kitoblar toʻla rastalar, maqol va shiorlar, turli ertak qahramonlari rasmlari tushirilgan bannerlar tadbir ishtirokchilarga yuqori, koʻtarinki kayfiyat baxsh etdi. Tafsilotlarga boy oʻtgan tadbirlar barchaga birdek manzur boʻldi.

Shoira Oʻrazmatova, 62-sonli maktabning ijodiy-madaniy masalalar boʻyicha targʻibotchisi.