Qilichboy ovulidagi 34–sonli maktabda “Besh tashabbus” doirasida tadbir boʻlib oʻtdi

Maʼlumki, joriy yil 5-aprel kuni Muhtaram Prezidentimiz Shavkat Mirziyoyev raisligida xalq taʼlimi sohasida amalga oshirilayotgan islohotlar natijadorligining tahlili yuzasidan videoselektor yigʻilishi oʻtkazilgan edi. Yigʻilish davomida Prezidentimiz tomonidan taʼlim tizimini isloh qilish boʻyicha bir qator vazifalar belgilab berildi. Mazkur vazifalar ijrosini taʼminlash maqsadida Qilichboy ovulidagi 34-sonli umumiy oʻrta taʼlim maktabda “Besh tashabbus” doirasida tadbir boʻlib oʻtdi.

Unda tuman hokimi Sultonboy Yoʻldashev, Oʻzbekiston Respublikasi Xalq taʼlimi vazirligi boʻlim boshligʻi Otabek Ibragimov, Qoraqalpogʻiston Respublikasi Xalq taʼlimi vazirligi boʻlim boshligʻi Sharafaddin Tajimuratov hamda tuman Xalq taʼlimi boʻlimi masʼul xodimlari ishtirok etishdi.

Tadbir avvalida mehmonlar maktab oʻquvchilarining ijod namunalari va ularning qoʻl mehnatlari bilan yaratilgan mahsulotlarni oʻzida jamlagan koʻrgazmani tomosha qildilar. Koʻrgazmada oʻquvchilarning “Besh tashabbus” doirasida kitobxonlik, axborot texnologiyalari, sport, madaniyat bilan qay darajada shugʻullanayotgani mehmonlar eʼtiboriga havola qilindi.

Shundan soʻng mehmonlar “Yashil makon” umummilliy loyihasi doirasida maktab hududida yangidan barpo qilinayotgan yashil hududga mevali va manzarali daraxt koʻchatlarini ekdilar.

Soʻngra tadbir ishtirokchilari sinfxonalarga, maktab kutubxonasi va musiqa xonasiga kirib, maktabda taʼlim-tarbiya jarayonining qay darajada tashkil qilingani va oʻquvchilarning “Besh tashabbus” doirasidagi tadbirlarga qanchalik qamrab olingani bilan yaqindan tanishdilar. Oʻquvchilar ishtirokida oʻtkazilayotgan intellektual oʻyinlar, texnik ijodiyotga qiziquvchi yoshlar tomonidan ishlangan turli maketlar va ishlanmalar mehmonlarda katta taassurotlar qoldirdi.

Tuman hokimi Sultonboy Yoʻldashev maktablarda maʼnaviy muhitni tubdan yaxshilash uchun eng avvalo, oʻquvchilarda yoshligidan oʻzining mahallasi va qishlogʻi hayotiga befarq boʻlmasligi, oʻqib oʻrganib bilim olishlari boʻsh vaqtini mazmunli oʻtakazishlari lozimligini taʼkidlab oʻtdi.

Shuningdek, Xalq taʼlimi vazirligi masʼullari tomonidan maʼnaviyat tadbirlarini muntazam oʻtkazish lozimligi va bunda maʼnaviy-maʼrifiy ishlar boʻyicha direktor oʻrinbosari va ijodiy masalalar boʻyicha targʻibotchilar birdek masʼul ekanligi alohida taʼkidlandi.

Mahallalardagi yoshlar yetakchilari, Maʼnaviyat va maʼrifat masalalari boʻyicha direktor oʻrinbosarlari, ijodiy masalalar boʻyicha targʻibotchilar shuningdek, maktab psixologlari oʻrtasidagi faol hamkorlik bu boradagi ishlar samaradorligini yanada oshirishi alohida qayd qilindi. Qolaversa, maktab maʼmuriyatiga ilm va sanʼat vakillari, ziyoli va nuroniylar, ilgʻor tadbirkorlar bilan doimiy uchrashuvlarni tashkil qilish boʻyicha tavsiyalar berib oʻtildi.

Shundan soʻng tadbir “Besh tashabbus” doirasidagi chiqishlarga ulanib ketdi. Tadbir davomida iqtidorli oʻquvchilar tomonidan ijro qilingan kuy-qoʻshiqlar yangradi. Tuman hokimi Sultonboy Yoʻldoshev va mehmonlar oʻquvchilar bilan samimiy suhbatlashib, ularni ilm-fan sirlarini puxta egallab, zamonaviy kasb-hunar egasi boʻlishga hamda Vatanimizga xizmat qilishga chorlashdi.

Shuningdek, kitobxonlik mushoirasi, kibersport, tikish-bichish, rassomchilik yoʻnalishlarida turli musobaqalar tashkil etilib, unda oʻquvchilar faol qatnashdilar.

Shu oʻrinda aytish kerakki, “Besh tashabbus” doirasida oʻtkazilayotgan tadbirlardan koʻzlangan maqsad − yoshlarga eʼtiborni kuchaytirish, ularni madaniyat, sanʼat, jismoniy tarbiya va sportga keng jalb etish, ularda axborot texnologiyalaridan foydalanish koʻnikmalarini shakllantirish, yoshlar oʻrtasida kitobxonlikni targʻib qilishdan iboratdir.

Tadbir yakunida musobaqalarda faol qatnashib oʻz iqtidorini namoyon qilgan barcha oʻquvchilar taqdirlandi. Shuningdek, maktabda tashkil etilgan “Barkamol avlod” toʻgaragi aʼzolariga tikuvchilik kasbini puxta oʻrganishlari uchun 2 ta tikuv mashinasi, musiqaga oshno boʻlgan bolajonlarning sanʼat sirlarini puxta egallashlari uchun doira va rubob sovgʻa qilindi.

Ayniqsa, ushbu tadbirlarning endigina unib-oʻsib kelayotgan yosh avlod hayotida joriy qilish ulardagi ijodkorlik qobiliyatlarini erta aniqlash va shakllantirishga xizmat qiladi.

Tuman hokimligining Axborot xizmati