XOTIRA VA QADRLASh KUNIDA AMUDARYoLIK MEHNAT FRONTI FAXRIYLARIGA SOVGʻALAR TOPShIRILDI

Yurtimizda 9-may umumxalq bayrami – Xotira va qadrlash kuni sifatida keng nishonlanadi. Ikkinchi jahon urushida halok boʻlgan ajdodlar xotirasiga chuqur hurmat bajo keltirib, fashizmga qarshi janglarda, mehnat frontida jonbozlik koʻrsatgan faxriylarga alohida eʼtibor va ehtirom koʻrsatiladi. Shu munosabat bilan amudaryolik bir guruh mutasaddilar tumanimizning barcha ovul va mahallalarida boʻlib, mehnat fronti faxriylari holidan xabar oldilar.

9-may kuni tuman hokimi Sultonboy Yoʻldashev ham tuman hududidagi mehnat faxriylari xonadonlariga tashrif buyurdi.

Tumanimizda 50 nafarga yaqin mehnat fronti faxriylari yashab kelmoqda. Tuman hokimi Sultonboy Yoʻldashev hududlarga borib bugungi zamonamiz qahramonlari holidan xabar oldi va ular bilan mashʼum urush yillaridagi xotiralari haqida suhbatlashdi. Bayram munosabati bilan sovgʻalar berib, oʻsha yillardagi zalvorli mehnatlar evaziga bunyod boʻlgan bugungi tinch va osoyishta hayot uchun ularga minnatdorchilik bildirdi. Tashrif davomida maktab oʻquvchilari urush yillaridagi qoʻshiqlarni kuylab, tinchlik haqida sheʼrlar aytib, nuroniylar koʻnglini xushnud etdilar.

Maʼlumki, Prezidentimizning 1-maydagi tegishli Farmonida 9-may arafasida urush qatnashchilari, kontslagerlar mahbuslari va Leningrad qamalida boʻlgan fuqarolarga 15 million soʻmdan berish koʻzda tutilgan edi. Shuningdek, ehtiyojmand aholining ijtimoiy himoyasini yanada kuchaytirish chora-tadbirlari yuzasidan oʻtkazilgan videoselektor yigʻilishida mutasaddilarga yolgʻiz yashayotgan va oʻzgalar parvarishiga muhtoj odamlardan shaxsan xabar olib, ularga sovgʻa-salomlarni yetkazish, urush qatnashchilari, kontslagerlar mahbuslari va Leningrad qamalida boʻlgan fuqarolarning har birining xonadoniga shaxsan borib, pul mukofoti va qimmatbaho sovgʻalarni  tantanali ravishda topshirish, 10 ming nafar front ortida mehnat qilgan faxriylar bilan shaxsan uchrashib, holidan xabar olish va sovgʻa-salomlar yetkazish topshirildi.

Shunga koʻra, Qoraqalpogʻiston Respublikasi Vazirlar Kengashi raisining oʻrinbosari — Oila va xotin-qizlar qoʻmitasi boshligʻi Maryam Ahmedova ham Amudaryo tumani hokimi oʻrinbosari — oila va xotin-qizlar boʻlimi boshligʻi Goʻzal Saburova bilan birgalikda amudaryolik yuz yoshdan oshgan onaxonlar holidan xabar olishdi.

Xizr eli mahallasida istiqomat qiluvchi 107 yoshli onaxon Parda Bekniyozova hamda Choykoʻl ovulida yashovchi 105 yoshli Katcha Bekanovalarga esdalik  sovgʻalarini topshirishdi. Mehmonlar onaxonlarni 9-may — Xotira va qadrlash kuni bayrami bilan muborakbod etib, urush davrida va urushdan keyingi yillarda mehnat frontida qilgan mashaqqatli xizmatlarini eʼtirof etishdi. Xalqimizning bugungi tinch va osoyishta zamonlarga yetib kelishiga oʻzlarining munosib hissalarini qoʻshgan mehnat fronti faxriylariga esdalik sovgʻalarini topshirishdi.

Shuningdek, tuman prokurori Aziz Roʻzmetov ham tuman hududidagi front orti mehnat faxriylari holidan xabar olish uchun ularning xonadonlariga tashrif buyurdi. Prokuror faxriylar bilan suhbatlashib, bayram bilan tabrikladi. Ularga Vatan tinchligi yoʻlidagi xizmati va fidokorona mehnatlari uchun minnatdorchilik bildirib, sovgʻalar topshirdi.

Shu kuni Milliy gvardiyaning tumandagi Qoʻriqlash boʻlimi, tuman Ichki ishlar boʻlimi, davlat xavfsizlik xizmati chegara qoʻshinlari harbiylari va fuqarolar yigʻini masʼullari Doʻrman ovulida yashovchi 90 yoshdan oshgan Yoʻldosh bobo Matmurodovning xonadoniga tashrif buyurdilar.

Urushda mardlarcha qahramonlik koʻrsatgan faxriylarimizning yurtimiz tinchligi uchun chekkan zahmati, urush orti mehnat frontida jonbozlik koʻrsatib, hayot qiyinchiliklarini sabot bilan yenggan ota-bobolarimizning mashaqqatli hayoti biz uchun haqiqiy ibrat maktabidir.

Ozoda Xudoyberganova