MTDP TUMAN KENGAShINING PLENUMIDA PARTIYa FAOLIYaTI TAHLIL QILINDI

Oʻzbekiston “Milliy tiklanish” demokratik partiyasi Amudaryo tumani Kengashining navbatdagi Plenumi boʻlib oʻtdi.

17-may kuni boʻlib oʻtgan Plenum majlisida Oʻzbekiston “Milliy tiklanish” demokratik partiyasi  tuman Kengashi aʼzolari, boshlangʻich tashkilotlari rahbarlari, Qoraqalpogʻiston Respublikasi Joʻqorgʻi Kengesi va xalq deputatlari tuman Kengashiga partiyadan saylangan deputatlar, partiya faollari hamda ommaviy axborot vositalari vakillari ishtirok etdilar.

Plenumda partiya tuman Kengashining va deputatlik guruhlarining 2021-yildagi faoliyati yakunlari hamda 2022-yildagi ustuvor vazifalari muhokama qilindi. Majlisda partiya saylovoldi Platformasida belgilangan vazifalar ijrosi, partiya dasturiy maqsad va vazifalarini roʻyobga chiqarish, elektorat manfaatlarini himoya qilish kabi masalalar ham koʻrib chiqildi.

Plenumda soʻzga chiqqanlar eʼtiborni, eng avvalo, oʻtgan hisobot davrida partiya tuman Kengashi faoliyatidagi yutuqlar va kamchiliklarga qaratdi.

Taʼkidlanganidek, bugungi kunga kelib, partiyaning tuman boʻyicha boshlangʻich partiya tashkilotlari soni 50 ta, partiya aʼzolari soni esa 1890 nafardan oshdi. Oʻtgan hisobot davrida elektorat manfaatlarini himoya qilish maqsadida Joʻqorgʻi Kengesdagi partiya fraktsiyasi va xalq deputatlari mahalliy Kengashlaridagi partiya deputatlik guruhlari aʼzolari tomonidan jami 12 ta deputatlik soʻrovi amalga oshirilgan.  Doimiy komissiyalarga 5 ta masala olib chiqilgan boʻlsa, tuman Kengashi sessiyalariga 4 ta masala olib chiqildi.

Uyushmagan yoshlarning bandligini taʼminlash, ularni kasb-hunarga yoʻnaltirish, “Ustoz-shogird” anʼanalarini rivojlantirish maqsadida mahallalarda istiqomat qilayotgan uyushmagan yoshlar, kam taʼminlangan oilalar farzandlari, vaqtincha ishsiz xotin-qizlarga qoʻshimcha bepul kasb-hunarga oʻrgatish uchun “Xizmat – beminnat” loyihasi doirasida oʻtgan yili davomida tuman boʻyicha 50 ta bepul oʻquv kurslari tashkil qilindi. Oʻquv kurslarida 381 nafar uyushmagan yoshlar va xotin-qizlarga qoʻshimcha bepul taʼlim, kasb-hunar oʻrgatildi. Ushbu bepul oʻquv kurslari mazkur yilda ham tashkil qilinishi belgilab olindi.

“Uyma-uy” loyihasi doirasida jami 100 dan ziyod xonadonlarga tashrif buyurildi. Loyiha doirasida yoshlar va xotin-qizlarning murojaatlari tinglanib, ishsizlik va boshqa masalalarda yordam berildi. Shuningdek, bir qancha yoshlar va xotin-qizlarga imtiyozli kredit olinishiga amaliy yordam koʻrsatildi.

Undan tashqari, oʻtgan yili partiyaning tuman Kengashida rejalashtirilgan ishlarning amalda bajarilishi borasidagi kamchiliklar tilga olindi. Bundan tashqari, Xalq deputatlari  tuman Kengashidagi deputatlar guruhi tomonidan tuman doimiy komissiyasida mansabdor shaxslar hisobotini tinglash boʻyicha bironta ham masala kiritilmaganligi eʼtirof etildi. Shu bilan birga deputatlar bilan hamkorlikni yanada faollashtirish, partiyaning “Uyma-uy”, “Deputat bilan yuzma-yuz” loyihalari doirasidagi tadbirlarni koʻpaytirish lozimligi taʼkidlanib, tuman hududidagi madaniy meros obʼektlarini oʻrganish va turizm sohasida amalga oshirilishi rejalashtirilgan ishlarni bajarish boʻyicha fikr-mulohazalar tinglanib, takliflar berildi.

Plenumda partiya faoliyatida yoʻl qoʻyilgan kamchiliklarni barataraf etish yuzasidan galdagi vazifalar belgilab olindi. Shuningdek, Plenum yakunida partiya tuman  Kengashining 2022-yil uchun ish-rejasi tasdiqlandi va muhokama qilingan masalalar yuzasidan tegishli qaror qabul qilindi.

Shirin Yangiboyeva, MTDP tuman Kengashi ijrochi kotibi.