BOLAJONLAR QADRDON BOGʻChASI BILAN XAYRLAShIB, MAKTABGA UChIRMA BOʻLIShDI

Beshovul mahallasidagi 42-sonli Maktabgacha taʼlim tashkilotida “Xayr, bogʻchajon!” tadbiri boʻlib oʻtdi. Tadbir munosabati bilan muassasa hovlisi bayramona bezatildi. Tadbirga pedagog-tarbiyachilar, tarbiyalanuvchilar va ularning ota-onalari ham tashrif buyurishdi.

Muassasaning tayyorlov guruhi tarbiyalanuvchilarini maktabga kuzatish marosimini mazmunli, esda qolarli, yorqin lahzalarga boy tarzda oʻtkazish maqsadida tashkil etilgan mazkur tadbirni tashkilot direktori Gulnora Qurbonboyeva ochib berdi. U oʻz soʻzida yurtimizda yosh avlodni komil inson qilib voyaga yetkazish ustuvor masalaga aylangani, bu borada amalga oshirilayotgan islohotlar, yoshlarga yaratilayotgan imkoniyatlar xususida keng toʻxtalib oʻtdi. Shuningdek, mahalladagi kichkintoylarning sevimli maskaniga aylangan ushbu maktabgacha taʼlim tashkilotidagi shart-sharoitlar, ularga tarbiya berayotgan tarbiyachi-pedagoglar, oʻtkazilayotgan mashgʻulotlar toʻgʻrisida maʼlumot berdi.

Taʼkidlanganidek, tashkilotda 4 ta guruhda 90 nafar kichkintoylarga 8 nafar tarbiya-pedagoglar taʼlim-tarbiya berib kelishmoqda. Tayyorlov guruhida esa 25 nafar bolajonlarga “Besh tashabbus” boʻyicha tashkil etilgan 5 ta markazda mashgʻulotlar oʻtkazilib, savod oʻrgatildi. Ularga anʼanaviy tarzda oʻtkazilib kelinayotgan “Yil tarbiyachisi” koʻrik-tanlovining oʻtgan yili Qoraqalpogʻiston bosqichida gʻolib boʻlgan Feruza Oʻrozmatova qiziqarli mashgʻulotlar oʻtkazib, maktabga tayyorladi.

Bolajonlar muassasada tashkil etilgan sanʼat, til va nutq, qurish-yasash va matematika, syujetli oʻyinlar va sahnalashtirish, fan va tabiat kabi 5 ta markazda hafta davomida mashgʻulotlarda qatnashishdi va qoʻshiq, sheʼrlar aytishni, oʻyinchoqlar yasash va chizishni, ertak qahramonlari obrazlarini ijro etishni, harflar va yozuvlarni, sonlarni yozishni oʻrganib, fan va tabiat haqidagi tasavvurlarini boyitishdi. Ularga qunt bilan taʼlim-tarbiya bergan tarbiyachi-pedagoglardan Feruza Oʻrozmatova, Yulduz Bozorboyeva, Laylo Qurboniyozova, Shoira Siytimova, Shohsita Qurbonboyevalardan ota-onalar ham juda minnatdor boʻlishdi.

Tadbir davomida soʻzga chiqqan ota-onalar muassasa xodimlariga oʻz minnatdorchiliklarini bildirishdi va shu yerda tarbiyalanayotgan kichkintoylarga televizor sovgʻa qilib, kelajakda ularning komil insonlar boʻlib ulgʻayishlarini tilashdi.

Shundan soʻng, tadbir davom ettirilib, kichkintoylar ijrosida shoʻx qoʻshiq va raqslar, quvnoq sheʼrlar, sahna koʻrinishlari namoyish etildi. Tashkilot tarbiyalanuvchilari tomonidan ijro etilgan ertak qahramonlari Bilmasvoy va Buratino tomoshalari barchaga juda manzur boʻldi. Bolajonlar ushbu sahna koʻrinishi orqali bilim olishning afzalligini, ilmli boʻlishning ahamiyatini tushunib olganliklarini begʻubor, bolalarcha qarashlari bilan oʻzlarining samimiy tillarida ifodalab berishdi. Ayniqsa, ularning bogʻcha opalarga, oʻzlari ulgʻaygan tarbiya maskaniga, ota-onalariga sheʼriy rahmat aytib, qadrdon bogʻchalari bilan xayrlashishgani hammani juda taʼsirlantirdi.

Tadbir soʻngida maktabga uchirma boʻlgan bolajonlarga faxriy yorliqlar, esdalik sovgʻalari topshirilib, ushbu lahzalarni xotiralarga muhrlash uchun suratlarga tushishdi. Qiziqarli oʻtgan tadbir nafaqat kichkintoylarda, balki ota-onalar va tarbiyachilarda ham katta taassurotlar qoldirdi.

O.Xudoyberganova.