PREZIDENT ADMINISTRATsIYaSI VAKILI BOShChILIGIDAGI IShChI GURUH TOMONIDAN SAYYoR QABUL OʻTKAZILDI

Amudaryo tumanida Prezident administratsiyasi vakili Akbar Jonuzoqov boshchiligidagi ishchi guruh aʼzolari ishtirokida sayyor qabul tashkil etildi.

Joriy yilning 7-avgust kuni tuman hokimligi binosida boʻlib oʻtgan sayyor qabulda ishchi guruh aʼzolari aholining sud-huquq sohasidan tashqari barcha masalalar, yaʼni ijtimoiy-iqtisodiy masalalardagi murojaatlar tinglashdi. Qabul davomida Nukus shahri, Xoʻjayli, Ellikqalʼa va Amudaryo tumanlaridan tashrif buyurgan fuqarolar ishtirok etib, oʻzlarini qiynab kelayotgan muammoli masalalar bilan masʼullarga murojaat qildilar.

Xususan, sohalar kesimida uy-joy taʼmirlash va moddiy yordam boʻyicha 8 ta, sogʻliqni saqlash sohasidan 7 ta, kommunal xizmatlar boʻyicha 7 ta, kredit boʻyicha 6 ta, kadastrga doir 5 ta, taʼlim yoʻnalishida 5 ta, bandlik masalalari yuzasidan 4 ta, yoʻllarni taʼmirlash boʻyicha 2 ta, uy-joy bilan taʼminlashga doir 2 ta va boshqa masalalarga doir yana 52 ta murojaatlar qabul qilindi.

Jumladan, Amudaryo tumanidagi Jumurovul mahallasida yashovchi Mahbuba Erkinbayeva yuragi kasal boʻlgan otasini davolatishda, Besh ovul mahallasida yashovchi Dilmurod Qurbaniyazov onkologik kasallik bilan xastalangan onasini, Qangli ovulida yashovchi Bahrom Saparov qon kasalligi bilan kasallangan qizini davolatishda amaliy yordam soʻrashdi. Shuningdek, Namuna mahallasida yashovchi Jumaboyeva Darmon davolanishi uchun respublika shifoxonasiga yoʻllanma olishda yordam soʻrab murojaat qildi.

Undan tashqari, Farovon mahallasida yashovchi Baxtiyor Doʻschanov, Qilichboy ovulida yashovchi Ixtiyor Saparbayevlar elektr energiyasi kuchlanishi past boʻlganligi sababli yangidan transformator oʻrnatib berishni, Kuyuk koʻpir ovulida yashovchi Shoira Eshchanova, Gulzor mahallasida yashovchi Nodira Yakubovalar esa ishga joylashishlariga koʻmaklashishni soʻrab masʼullarga murojaat qilishdi.

Sayyor qabulda masʼullar tomonidan 98 nafar fuqaroning murojaati koʻrib chiqildi, shundan 39 tasi ijobiy hal qilindi, 12 tasiga huquqiy maslahat va tushuntirish berildi hamda 47 ta murojaat nazoratga olindi.

Qabul davomida tuman aholisini qiynayotgan tizimli muammolar ham tilga olindi. Xususan, Amudaryo tumandagi mavjud ichki yoʻllarning 61,7 foizi, yaʼni 889 kilometri oʻta taʼmirtalab holatda boʻlganligi hududlardagi aholining noroziligini keltirib chiqarayotganligi  aytildi. Shu sababli ichki yoʻllarga qum-shagʻal qoplamasi yotqizish masalasi oʻrganib chiqib, yechim topish va taklif kiritish uchun Qoraqalpogʻiston Respublikasi Vazirlar Kengashiga kiritildi.

Shuningdek, tumanning Boʻz-yop, Kuyuk koʻpir, Oʻrta qalʼa, Bobur va Amir Temur nomli hamda Xitoy ovullarida yashovchi 6,3 ming nafar aholini ichimlik suvi va 13 ming gektar yer maydonni oqava suv bilan taʼminlovchi 1998-yilda qurilgan “Shixjamol” nasos stantsiyasi hozirda taʼmirtalab ahvoldaligi, shu boisdan aholiga ichimlik suvi va oqava suv yetkazib berishda qiyinchiliklar yuzaga kelayotganligi muammosi ham koʻtarilib, bu masalani ham oʻrganib chiqish va yechim topish, ijobiy hal qilish boʻyicha taklif kiritish Qoraqalpogʻiston Respublikasi Vazirlar Kengashiga topshirildi.

Prezident administratsiyasi vakili boshchiligidagi ishchi guruh aʼzolari ushbu muammolar oʻrganib chiqilib, bartaraf etilishida amaliy yordam berilishini aytib, aholining yashash sharoitini yaxshilash bugungi kundagi dolzarb masalalardan biri ekanligini taʼkidlashdi.

O.Xudoyberganova.