Toʻlqin ovulida 39-sonli davlat MTT binosi rekonstruktsiya qilinib, qoʻshimcha bino qurilmoqda

Mamlakatimizning ijtimoiy va ishlab chiqarish infratuzilmasini izchil rivojlantirish, qishloq va mahallalarni yanada obod qilish, joylarda qulay tadbirkorlik va investitsiya muhitini shakllantirish, shuningdek, iqtisodiyot tarmoqlari va ijtimoiy sohaga investitsiyalarni jalb qilish orqali yangi ish oʻrinlarini yaratish, aholining turmush darajasini yaxshilash maqsadida manfaatdor vazirliklar, viloyatlar hokimliklari, Qoraqalpogʻiston Respublikasi Vazirlar Kengashi bilan birgalikda 2022-2024-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish Dasturi ishlab chiqilgan.

Joriy yilda Amudaryo tumani boʻyicha 7 ta obʼektda ushbu Dasturga muvofiq qurilish-taʼmirlash ishlari olib borilmoqda. Bular 18-sonli, 36-sonli, 56-sonli maktablar binolarini rekonstruktsiya qilish va qoʻshimcha binolar qurish, Oq oltin ovulidagi suv inshootini rekonstruktsiya qilish va 17,5 km. ichimlik suvi tarmoqlarini tortish, Mangʻit arna kanalining 4,8 km. qismini rekonstruktsiya qilish, Mangʻit shahridagi “Barkamol avlod, Jumurtov, Tadbirkorlar, Shifokorlar va Xalqlar doʻstligi koʻchalarida 2,7 km. uzunlikda salomatlik yoʻlaklarini qurish, Toʻlqin ovulidagi 39-sonli davlat maktabgacha taʼlim tashkiloti binosini rekonstruktsiya qilish va 180-oʻrinli qoʻshimcha bino qurish ishlaridir.

39-sonli Maktabgacha taʼlim tashkiloti binosini rekonstruktsiya qilish va qoʻshimcha bino qurish ishlarini “Jumurtov tex taʼmir servis” masʼuliyati cheklangan jamiyati quruvchilari amalga oshirmoqdalar.

Bino rekonstruktsiyasi va qoʻshimcha bino qurilishi uchun 3 milliard 609 million 400 ming soʻm pul ajratilgan.

Quruvchilar shu kungacha loyihada belgilangan ishlarning 60 foizga yaqin qismini ado etdilar. Binoning B blokida tom qismini yopish, A blokning, birinchi qavatida gʻisht terish ishlari yakunlandi va plita yopish ishlari olib borilmoqda.

Quruvchilar obʼektni belgilangan muddatda bitkazishlari uchun ularga zarur sharoitlar yaratilgan. Vaqtida issiq ovqat, choy bilan taminlanayati. Oylik maoshlari oʻz vaqtida toʻlanmoqda.

Yaqin kunlarda bino qurilishi tugallanib, maktabgacha taʼlim tashkiloti yana bolajonlarni oʻz bagʻriga chorlaydi. Tashkilotda bolalar qamrovi qoʻshimcha bino qurilishi tufayli 180 taga oshishi toʻlqinlik oilalar uchun quvonchli voqea boʻladi. Chunki farzandini mazkur bolalar bogʻchasiga berish uchun navbatda turganlar koʻpchilikni tashkil qiladi. Qachonki farzandlaridan koʻngli xotirjam boʻlgan ota-onaning ishida unum boʻladi.

Shu boisdan ham ovul markazida, aholi gavjum yashaydigan hududda bogʻcha binosi qurilishining yuqori surʼatlarda olib borilayotganidan aholi xursand.

Oygul RAJABOVA.