“Kuydirgi kasalligining tabiiy oʻchoqlardan tarqalishining oldini olishda FVDqT xizmatlarining harakatlari” mavzusida taktik-oʻquv mashqi oʻtkazildi

Shu yilning 15-avgustida Amudaryo tumanining Oq oltin ovulida Oʻzbekiston Respublikasi Bosh vaziri – Fuqaro muhofazasi boshligʻining 2022-yil 14-yanvardagi 1-sonli buyrugʻi bilan tasdiqlangan rejaga koʻra “Kuydirgi kasalligining tabiiy oʻchoqlardan tarqalishining oldini olishda Favqulodda vaziyatlar davlat quyi tuzilmalari xizmatlarining harakatlari” mavzusida maxsus taktik-oʻquv mashqi oʻtkazildi. Unda favqulodda vaziyatlarda ularning oldini olish va harakat qilishda Davlat tizimi hududiy quyi tizimi xizmatlarining hamkorlikdagi harakatlari koʻrgazmali maxsus-taktik oʻquv mashqi tarzida koʻrsatib berildi.

Koʻrgazmali maxsus taktik-oʻquv mashqiga mutasaddi mutaxassislar,oʻzini oʻzi boshqarish organlari rahbarlari, ovul fuqarolari, tibbiyot xodimlari ishtirok etdilar.

Oʻquv mashqlari nazariy seminar va amaliy qismlarda oʻtkazildi.       

Tadbirning dastlabki qismi – ovul hududidagi 71-sonli maktabda boʻlib oʻtgan nazariy seminarda “Kuydirgi kasalligining tabiiy oʻchoqlardan tarqalishining oldini olishda Favqulodda vaziyatlar quyi tuzilmalari xizmatlarining harakatlari” mavzusida Amudaryo tumani Favqulodda vaziyatlar boʻlimi boʻlinma boshligʻi kapitan Behzod Tajibayev maʼruza qildi.

Taktik-oʻquv mashqining nazariy qismida esa tuman Sanitariya-epidemiologik osoyishtalik va jamoat salomatligi boʻlimi epidemiolog vrachi Mirzabek Amanqulov “Kuydirgi kasalligining epidemiologiyasi va profilaktikasi boʻyicha olib borilayotgan tadbirlar”, tuman Tibbiyot birlashmasi yuqumli kasalliklar boʻlimi shifokori Farhod Qoʻshmanov “Kuydirgi kasalligi diagnostikasi, klinikasi va davolash usullari” hamda tuman Veterinariya va choravachilikni rivojlantirish boʻlimi boshligʻi oʻrinbosari Bahodir Bekchanov “Kuydirgi kasalligi epizotologiyasi, kasallikning hayvonlardagi klinikasi va oldini olish boʻyicha oʻchoqda olib boriladigan epizootiyaga qarshi kurashishni tashkil etish chora-tadbirlari” toʻgʻrisidagi mavzularda maʼruzalar qildilar.

Taktik-oʻquv mashqining amaliy qismi Amudaryo tumani Oq-oltin ovulidagi aholi uylarida 3 ta bosqichda oʻtkazildi.

1-boskichda Oq-oltin ovuli hududidagi aholi yashash uylarida kuydirgi kasalligiga gumon qilingan bemorni aniqlash, rahbarlar va xizmatlarga xabar berish, bemorni alohidalash, tashhis qoʻyish va shifoxonaga yotqizish tartibi koʻrgazmali tarzda namoyish qilindi.

2-bosqichda esa tuman Sanitariya-epidemiologik osoyishtalik va jamoat salomatligi boʻlimi va Tibbiyot birlashmasi xodimlarining epidemiologik va epizootologik surishtiruv ishlarini oʻtkazishi va kasallikning tarqalishining oldini olish borasida aholi orasida targʻibot-tashviqot tadbirlari hamda tushuntirish ishlarini olib borish tartibi tushuntirildi.

3-bosqichda tuman Veterinariya va chorvachilikni rivojlantirish boʻlimi tomonidan oʻchoqda olib boriladigan profilaktik chora-tadbirlarni oʻtkazish tartibi va uni bartaraf etish harakatlari amalda sinovdan oʻtkazildi.

Oʻquv mashqiga jami 110 nafar fuqarolar va 7 ta maxsus texnika jalb etildi.

Oʻquv mashqi yakunida Amudaryo tumani Favqulodda vaziyatlarning oldini olish va bunday vaziyatlarda harakat qilish davlat quyi tizimi xizmatlari favqulodda vaziyatlar yuzaga kelganda ularni bartaraf etishga tayyor deb baholandi.

Hamro Matyakubov, Amudaryo tuman FVB boshligʻi, podpolkovnik.