AMUDARYoDA MAMLAKATIMIZ MUSTAQILLIGINING 31-YILLIGI KENG NIShONLANDI

Mavzuga oid fotogalereya

Oʻzbekiston Respublikasining davlat mustaqilligi eʼlon qilingan kun eng ulugʻ, eng aziz bayram sifatida yurtimiz boʻylab har yili keng nishonlanadi. Bu yil ham yurtimizning har bir goʻshasida “Yangi Oʻzbekistonda el aziz, inson aziz” degan shiorni asosiy gʻoya sifatida oʻzida mujassam etgan madaniy-maʼrifiy tadbirlar oʻtkazildi. Mamlakatimizning barcha hududlarida boʻlgani kabi Amudaryo tumanida ham Oʻzbekiston Respublikasi davlat mustaqilligining 31-yilligiga bagʻishlangan bayram tadbirlari boʻlib oʻtdi.

29-avgust kuni 2-sonli bolalar va oʻsmirlar sport maktabi oʻyingohida “Yangi Oʻzbekistonda el aziz, inson aziz” shiori ostida boʻlib oʻtgan bayram tomoshasiga tuman hokimi, sektorlar rahbarlari, deputatlar, fuqarolar yigʻinlari masʼullari, tadbirkorlar, ilgʻor dehqon va fermerlar, faol yoshlar, mehnat faxriylari hamda keng jamoatchilik vakillari tashrif buyurdi.

Tantanavor shiorlar, rang-barang bayroqchalar va chiroqlar, Oʻzbekiston va Qoraqalpogʻiston Respublikalarining davlat bayroqlari, turfa gullar va sharlar bilan bezatilgan katta sahna, monitorlardagi obod goʻshalar tasviri barcha-barchasi maydonga yanada fayz kiritib, tomoshabinlarga koʻtarinki ruh baxsh etdi.

Tadbirni tuman hokimi Sultonboy Yoʻldoshev ochib berdi va tuman aholisini mustaqillik bayrami bilan muborakbod etdi. Tuman hokimi Oʻzbekistonda mustaqillikka erishilgan dastlabki yillardagi ogʻir va sinovli davrlar, shuningdek, mamlakatdagi soʻnggi yillar davomidagi oʻzgarish va bunyodkorliklar xususida soʻz yuritib, tuman miqyosidagi islohotlar, rivojlanishlar, yutuqlarni tilga oldi.

Prezidentimizning yaqindagina Qoraqalpogʻistonga qilgan tashrifi davomida aholi va tadbirkorlar uchun koʻplab imtiyozlar joriy qilingani, faqat Qoraqalpogʻiston uchun foyda soligʻi, aylanma soliq, mol-mulk va yer soligʻi stavkalari 2 barobar kamaytirilib, paxta va gʻalla maydonlarini qisqartirish evaziga har bir oilaga 2 gektardan yer ajratish, yoʻllarni taʼmirlash, elektr, gaz va suv taʼminotini yaxshilash boʻyicha topshiriqlar berilgani alohida taʼkidlab oʻtildi.

Aytish joizki, Amudaryo tumanida ham keyingi yillarda barcha sohalarda ulkan natijalarga erishilmoqda. Birgina joriy yilning oʻtgan 6 oyi davomida salkam 300 mlrd. soʻmlik sanoat mahsulotlari, 86 mlrd. soʻmlik xalq isteʼmol tovarlari, 620 mlrd. soʻmlik qishloq xoʻjaligi mahsulotlari ishlab chiqarilib, investitsiyalar hajmi salkam 250 mlrd. soʻmga yetdi.

Hududda yuz berayotgan bu kabi oʻzgarishlar, amalga oshirilayotgan bunyodkorliklar amudaryoliklarni yanada yuksak marralar sari ilhomlantirmoqda. Bu tumanda turli sohalarda erishilayotgan ijobiy natijalarda, qoʻlga kiritilayotgan ulkan yutuqlarda oʻz aksini topmoqda.

Tuman hokimi tabrigidan soʻng Oʻzbekiston va Qoraqalpogʻiston Respublikalari Davlat madhiyalari yangrab, tuman Madaniyat boʻlimi tomonidan “Yangi Oʻzbekistonda el aziz, inson aziz” nomli stsenariy asosida tayyorlangan bayram tomoshasi boshlandi. Yosh havaskor xonanda Islom Ollayorov ijrosidagi “Vatan” qoʻshigʻi bilan boshlangan tomosha “Sirli olam” deb nomlangan kompozitsion chiqish bilan davom ettirildi.

Teatrlashtirilgan tomosha tarzidagi ushbu chiqish davomida madaniyat xodimlari va yosh havaskorlar millatimizning ulugʻ siymolari koʻrinishida namoyon boʻlib, ajdodlarimizning uygʻonish davrida ilmu-fan, saltanat ravnaqi yoʻlida amalga oshirgan olamshumul kashfiyotlari, jasoratlari haqida soʻzlashdi. Ular Amir Temur, Alisher Navoiy, Zahiriddin Muhammad Bobur obrazlarini gavdalantirib, barchani vatanparvarlikka, tinchlik-osoyishtalikni koʻz qorachigʻidek asrashga, yurt taraqqiyoti, jamiyat rivoji uchun xizmat qilishga chorlashdi. Sahnada yosh havaskorlar qatagʻon qurbonlari, ilm-maʼrifat asosiga qurilgan ilgʻor jamiyatni orzu qilgan va shu yoʻlda jonlarini fido qilgan yurt ziyolilarini ham obrazli tarzda jonlantirib, shu Vatan ozodligi, millat ravnaqi yoʻlidagi ezgu ishlari haqida soʻzlashdi.

Sahna orqasidagi monitorlarda yurtimizda, shu jumladan tumanimizda roʻy berayotgan oʻzgarish va yangilanishlar videorliklar orqali namoyish qilindi.

Aytish kerakki, oʻtgan yillar mobaynida tuman hududidagi chekka ovul va mahallalarda “Obod qishloq”, “Obod mahalla” dasturlari doirasida qurilish, taʼmirlash va obodonlashtirish ishlari bajarildi. Joriy yilda ham dastur doirasida Ayoqchi mahallasi va Toʻlqin ovulida 27,3 mlrd. soʻmlik mablagʻ evaziga yirik qurilish va obodonlashtirish ishlari amalga oshirilmoqda. Koʻp qavatli uy-joylar, ijtimoiy, xizmat koʻrsatish va servis obʼektlari qurildi. Shu qatori tumanda qishloq xoʻjaligi, taʼlim, sogʻliqni saqlash sohalarini rivojlantirish, “Ayollar daftari”, “Yoshlar daftari”ga kiritilgan fuqarolar bilan ishlash, aholi bandligini taʼminlash kabi sohalarda ham eʼtiborga molik ishlar olib borilib, bu boradagi ezgu ishlar uzluksiz davom ettirilmoqda.

Bir soʻz bilan aytganda, amudaryoliklar mustaqillikning oʻttiz bir yillik toʻyini barcha sohalardagi oʻziga xos yutuqlar bilan qarshi olishmoqda.

Tadbirda tuman yoshlari ijrosidagi “Shijoatli yoshlar – yurt qalqonlari” deb nomlangan sahna koʻrinishlari ham tomoshabinlar eʼtiboriga eʼtirofiga sazovor boʻldi.

Maʼlumki, yurtimizda istiqlol yillarida millat, yurt kelajagi boʻlgan yoshlarga alohida eʼtibor qaratilib, keng imkoniyatlar yaratildi. Bu imkoniyatlardan samarali foydalanayotgan yoshlar bugun turli yoʻnalishlarda yuqori natijalarga, muvaffaqiyatlarga erishib, Oʻzbekiston nomini butun dunyoga tanitmoqda. Shu qatori tumanimiz yoshlariga ham har tomonlama yetarli sharoitlar yaratib berilmoqda.

Maktablar yangidan taʼmirlanib, qoʻshimcha binolar, yangi sport inshootlari qurilib, yoshlarimizning zamon talablari asosida taʼlim va tarbiya olishlariga shart-sharoitlar yaratilmoqda.

Oʻz navbatida tuman yoshlari ham sport, taʼlim va boshqa yoʻnalishlarda katta yutuqlarni qoʻlga kiritib, davlatimiz tomonidan yaratilayotgan imkoniyatlardan samarali foydalanishmoqda, yurt kelajagiga munosib farzandlar boʻlib kamolga yetmoqda. Ayniqsa, maktabgacha taʼlim tashkilotlari uchun zamonaviy qiyofadagi shinam va koʻrkam binolar qurilib, davlat va nodavlat tashkilotlari soni ortmoqda. Bu esa tumanda maktabgacha taʼlim yoshidagi kichkintoylarni qamrab olish darajasi ortishida muhim ahamiyat kasb etmoqda.

Tomosha davomida tumandagi maktabgacha taʼlim tashkilotlari tarbiyalanuvchilari va “Barkamol avlod” bolalar maktabi oʻquvchilari ijrosidagi quvnoq kuy-qoʻshiqlar, jamoaviy raqslar tomoshabinlardagi bayramona kayfiyatni yanada koʻtardi. Ayniqsa, turli millat vakillarining “Oʻzbekiston – umumiy uyimiz” turkumidagi ijrolari barchaga manzur boʻldi.

Bayram tomoshasida tumanimizdagi taniqli estrada xonandalari Vatan, tinchlik, farovonlik, mehr va muhabbat haqidagi qoʻshiqlarini kuylab, hammaga zavq ulashishdi. Mustaqillik bayrami tantanalari tumanimizning ovul va mahallalarida, mehnat jamoalarida davom etmoqda.

O.Xudoyberganova.