AMUDARYoDA OʻQITUVChI VA MURABBIYLAR KUNI MUNOSABATI BILAN KATTA TADBIR OʻTKAZILDI
Dunyoni ziyo nurlari bilan yoritib kelayotgan oʻqituvchi va murabbiylar katta ehtiromga, eʼtiboru-eʼzozga loyiq boʻlgan moʻʼtabar insonlardir. Kimki bu hayotda biror yutuqqa erishsa, kasbidan kamol topsa, shubhasiz bunda ustozlarning hissasi beqiyos. Shu bois bizga taʼlim-tarbiya bergan, oldida umrbod qarzdor boʻlgan, abadiy hurmatimizdagi bu fidoyi kasb egalarga minnatdorchiligimiz cheksiz.
Yurtimizda ushbu ulugʻ insonlarga yuksak ehtirom koʻrsatish maqsadida har yili 1-oktyabr sanasida Oʻqituvchi va murabbiylar kuni umumxalq bayrami sifatida keng nishonlanadi. Bayram munosabati bilan Amudaryo tumanida ham katta tadbir oʻtkazildi.
“Taʼzim sizga, Ustozlar!” deb nomlangan mazkur tadbir 30-sentyabr kuni tuman Madaniyat markazi kontsert zalida boʻlib oʻtdi.
Bayram tantanasiga tashrif buyurgan aziz mehmonlar – faxriy ustozlar, umumtaʼlim maktablari, maktabgacha taʼlim tashkilotlari, kasb-hunar taʼlimi, maktabdan tashqari taʼlim muassasalari pedagog-xodimlari, sport murabbiylarini oʻquvchilar qoʻllarida gullar bilan qarshi oldilar.
Tadbirga tashrif buyurgan mehmonlar madaniyat uyining kirish qismidagi kitoblar, turli fotosuratlar, maketlar, oʻquvchilarning ijodiy ishlari, qoʻl mehnati namunalaridan iborat koʻrgazmalarni tomosha qildilar va 9-, 21-sonli Bolalar musiqa va sanʼat maktabi oʻquvchilaridan tashkil qilingan orkestr ijrosidagi kuy-qoʻshiqlarni tingladilar.
Bayram tadbirida tuman hokimi Sultonboy Yoʻldashev, sektorlar rahbarlari, Xalq taʼlimi, Maktabgacha taʼlim boʻlimlari masʼullari ishtirok etib, masʼuliyatli va sharafli kasb egalarini bayram bilan muborakbod etdilar. Butun hayotini yosh avlodga bilim va tarbiya berishga, ularni milliy va umuminsoniy qadriyatlar ruhida kamol toptirishga bagʻishlagan, Vatanimizning ertangi kunining poydevorini yaratayotgan ulugʻ va olijanob kasb egalariga samimiy tilaklar bildirib, sohadagi yutuqlar tilga olib oʻtildi.
Taʼkidlanganidek, yurtimizda soʻnggi yillarda ilm-fan va taʼlim-tarbiya sohasini davlat siyosatining ustuvor yoʻnalishiga aylantirishga qaratilgan, oilada farzand tugʻilganidan boshlab, kamolot yoshiga yetgunga qadar uni har tomonlama qoʻllab-quvvatlaydigan, hayotda munosib oʻrin topishiga xizmat qiladigan yaxlit va uzluksiz tizim yaratildi. Davlatimiz rahbari bu jarayonda inson kapitaliga eʼtiborni yanada kuchaytirish, buning uchun barcha imkoniyatlarni safarbar etish borasida muhim dastur va loyihalarni amalga oshirmoqda.
Bu kabi islohotlar Amudaryo tumanida ham oʻz aksini topib, ijobiy samaralarini bermoqda. Bunga dalil sifatida sohadagi oʻzgarishlar, yutuqlarni keltirib oʻtish mumkin. Tumanda bundan 5-yil oldin 37 ta bogʻcha faoliyat yuritib, bolalarni maktabgacha taʼlim bilan qamrab olish koʻrsatkichi 25,7 foizni tashkil etgan boʻlsa, hozirgi kunda bunday muassasalar soni 123 taga, tizimdagi qamrov darajasi salkam 71 foizga yetdi. Shuningdek, mavjud 85 ta umumiy oʻrta taʼlim maktablarida 38 ming 496 nafar oʻquvchilar sifatli taʼlim-tarbiya olishmoqda. Oʻquvchilarga yanada qulay sharoitlar yaratish maqsadida birgina joriy yilda 55-sonli maktabga 330-oʻrinli, 76-sonli maktabga 360-oʻrinli, 14-, 18-, 36- va 69-sonli maktablarning har biriga 180-oʻrinli qoʻshimcha binolar qurilmoqda.
Prezidentimizning Farmoniga koʻra bayram arafasida taʼlim-tarbiya tizimida alohida oʻrnak koʻrsatgan xodimlardan bir guruhi davlat mukofotlari bilan taqdirlandi. Ushbu Farmonga muvofiq tumanimizdagi 5-sonli umumiy oʻrta taʼlim maktabining frantsuz tili fani oʻqituvchisi Gulbahor Saidovaning II darajali “Sogʻlom avlod uchun” ordeni bilan, 39-sonli umumiy oʻrta taʼlim maktabining biologiya fani oʻqituvchisi Saida Muratboyeva esa “Qoraqalpogʻiston Respublikasida xizmat koʻrsatgan xalq taʼlimi xodimi” faxriy unvoni bilan taqdirlangani amudaryolik ustoz va murabbiylarning mehnatlariga berilgan yuksak bahodir.
Tabriklardan soʻng, tuman hokimi Sultonboy Yoʻldashev hamda sektorlar rahbarlari taʼlim tizimini rivojlantirishga munosib hissa qoʻshib kelayotgan fidoyi oʻqituvchilarga tantanali ravishda Oʻzbekiston Respublikasi “Xalq taʼlimi fidoyisi”, Oʻzbekiston Respublikasi “Xalq taʼlimi aʼlochisi”, Qoraqalpogʻiston Respublikasi “Xalq taʼlimi aʼlochisi” koʻkrak nishonlarini, Qoraqalpogʻiston Respublikasi Xalq taʼlimi vazirligining faxriy yorliqlarini hamda tashakkurnomalar, qimmatbaho esdalik sovgʻalarini topshirdilar.
Tadbir davomida sahnaga oʻrnatilgan katta monitor orqali sohadagi ushbu islohotlarning amaldagi samarasi sifatida tumanimiz umumtaʼlim maktablarida yaratilgan zamonaviy sharoitlar va berilgan imkoniyatlardan foydalanib, mashgʻulotlar oʻtayotgan ustozlarning dars jarayonlari, oʻqituvchi va oʻquvchilarning turli tadbirlardagi ishtiroki tasvirlangan lavhalar namoyish etib borildi.
Bayram tantanasiga tuman Madaniyat boʻlimi tomonidan tayyorlangan katta musiqiy dastur yanada fayz kiritdi. Dastur davomida bayram ishtirokchilari tuman Madaniyat boʻlimi xonandalari, toʻgaraklar havaskorlari, 9-, 21-sonli musiqa maktablari, “Barkamol avlod” bolalar maktabi hamda maktabgacha taʼlim tashkilotlari tarbiyalanuvchilari ijrosidagi kuy-qoʻshiqlarni tinglab, dilrabo raqslarni tomosha qilib, madaniy hordiq chiqardilar.
Ozoda Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
