Amudaryo tumani hokimi Sultonboy Yoʻldashev va bir qator tuman faollari xalqaro tashkilotning esdalik nishonlari bilan taqdirlandi

12-oktyabr kuni Amudaryo tumaniga “Amir Temur” xalqaro xayriya jamoat fondi ijrochi direktori, fondning Namangan viloyati muassasasi raisi Sohiba Aʼzamova boshchiligidagi bir guruh jamoat tashkiloti vakillari tashrif buyurdi.

Amudaryo tumani hokimligida jamoat tashkilotlari masʼullari ishtirokida oʻtkazilgan yigʻilishda tuman hokimi Sultonboy Yoʻldoshev va bir guruh nuroniylar, turli sohalar vakillari ishtirok etdi.

Tadbir avvalida tuman hokimi Sultonboy Yoʻldoshev soʻzga chiqib, mamlakatimizda barcha sohalarda amalga oshirilayotgan tub islohotlar, ularning Qoraqalpogʻiston Respublikasi, xususan Amudaryo tumani aholisi hayotida oʻz aksini topayotgani, xalqimiz turmush sifati kun sayin yaxshilanayotgani haqida gapirdi.

“Amir Temur” xalqaro xayriya jamoat fondi ijrochi direktori Sohiba Aʼzamova oʻz nutqida Qoraqalpogʻistonda keyingi yillarda amalga oshirilgan qurilish va bunyodkorlik ishlari, iqtisodiyot rivojiga amudaryoliklarning qoʻshayotgan hissasi haqida toʻxtalib oʻtdi. Jamiyat taraqqiyoti va xalq farovonligiga davlat organlari, xususiy sektor qatorida nodavlat notijorat tashkilotlari ham faol hissa qoʻshib kelayotgani qayd etildi.

Xususan, buyuk davlat arbobi Amir Temurning ijtimoiy-siyosiy merosini, madaniyat va maʼnaviyat taraqqiyotiga qoʻshgan ulkan hissasini chuqur oʻrganish, yosh avlodda milliy iftixor va mustaqil Vatanimiz oʻtmishiga hurmat, kelajagiga ishonch tuygʻularini shakllantirish maqsadida tashkil qilingan “Amir Temur” xalqaro xayriya jamoat fondi ham bu borada izchil ishlarni amalga oshirib kelayotgani eʼtirof etildi.

Taniqli davlat arbobi va sarkarda Amir Temurning jahon madaniyati tarixiga qoʻshgan hissasini oʻrganish va targʻib qilish, uning nomi bilan bogʻliq nodir meʼmoriy yodgorliklarni tiklash, taʼmirlash va asrashga yordam berish, shu ishlarga munosib hissa qoʻshib kelayotgan fidoyilarni ragʻbatlantirish maqsadida “Xalqaro Amir Temur xayriya jamoat fondi” esdalik nishoni taʼsis etilgan.

Tadbirda tumanni ijtimoiy-iqtisodiy rivojlantirish, yosh avlodni har tomonlama komil insonlar qilib tarbiyalash ishlariga qoʻshayotgan hissasi uchun tuman hokimi Sultonboy Yoʻldoshev “Xalqaro Amir Temur xayriya jamoat fondi” esdalik nishoni bilan mukofotlandi.

Shuningdek, fond ijrochi direktori Ichki ishlar organlari faxriysi, Oʻzbekiston Respublikasi Prezidentining Amudaryo tumanidagi xalq qabulxonasi mudiri Erkin Rajabovga ham “Xalqaro Amir Temur xayriya jamoat fondi” esdalik nishonini tantanali ravishda topshirdi.

Fond tomonidan, shuningdek “Berdaq Qargʻabay uli” xalqaro esdalik nishoni ham taʼsis etilgan. Oʻzbek va qoraqalpoq xalqlari orasidagi azaliy doʻstlik va birodarlik rishtalarini mustahkamlashga, qoraqalpoq adabiyotini yanada rivojlantirish va yoshlar maʼnaviyatini yuksaltirish ishlariga hissa qoʻshayotgan yurtdoshlarimiz ushbu esdalik nishoni bilan taqdirlanadi.

Amudaryo tumani tarixiy-oʻlkashunoslik muzeyi rahbari, taʼlim faxriysi Shavkat Charshamov, Amudaryo tumani “Nuroniylar” jamoatchilik Kengashi raisining oʻrinbosari Bekman ota Allaberganov, tadbirkor Shuhrat Matkarimovlar ham ushbu esdalik nishoni bilan taqdirlandi.

Biz ham oʻz navbatida mukofot sohiblarini qutlab, ularning Vatan taraqqiyoti va xalq farovonligi, davlat va jamiyat ravnaqi hamda yosh avlod kamoloti yoʻlidagi faoliyatida omad va zafarlar yor boʻlishini tilaymiz.

Tuman hokimligining axborot xizmati.